Joni 3
3
Ko Jisu kei Nikotimo
1Sa dua na tamata vei ira na Farisi, a yacana ko Nikotimo, e dua na nodra turaga na Jiu. 2Sa lako mai ko koya oqo vei Jisu e na bogi, ka kaya vua, “Vakavuvuli, keitou sa kila ni kemuni sa lako mai vua na Kalou mei vakavuvuli, ni sa sega e dua na tamata e cakava rawa na veika-mana oqo ko ni sa cakava, kevaka erau sa sega ni tiko kaya na Kalou.”
3Sa vosa ko Jisu, ka kaya vua, “E dina, e dina, au sa kaya vei iko, kevaka sa sega ni sucu tale na tamata, ena sega ni raica rawa na matanitu ni Kalou.” 4Sa kaya vua ko Nikotimo, “Sa sucu rawa vakaevei na tamata ni sa qase mai ko koya? Sa curu rawa vakarua ki na kete i tinana, me sucu mai?” 5Sa kaya ko Jisu, “E dina, e dina, au sa kaya vei iko, kevaka sa sega ni sucu e dua e na wai kei na Yalo Tabu, ena sega ni curu rawa ki na matanitu ni Kalou. 6Sa vakayago ko koya sa sucu e na yago, ia sa vakayalo ko koya sa sucu e na yalo. 7Kakua ni kurabui ni'u sa kaya vei iko, ‘E dodonu mo dou sucu tale.’ 8Sa liwa na cagi ki na yasana sa digitaka, ia ko sa rogoca na kena rorogo, ka sega ni kila na yasana sa lako mai kina, se na yasana sa lako yani kina. Sa vaka talega kina ko koya yadua sa sucu e na Yalo Tabu.”
9Sa vosa ko Nikotimo, ka kaya vua, “Sa rawa vakaevei na veika oqo?” 10Sa vosa ko Jisu, ka kaya vua, “O iko na nodra i vakavuvuli na Isireli, ka sega ni kila na veika oqo, ne? 11E dina, e dina, au sa kaya vei iko, keitou sa vosataka na ka keitou sa kila, ka tukuna na ka keitou a raica, ia dou sa sega ni vakabauta na neitou i tukutuku. 12Kevaka ka'u sa tukuna vei kemudou na veika vakavuravura, ka dou sa sega ni vakabauta, dou na vakabauta vakaevei, kevaka ka'u sa tukuna vei kemudou na veika vakalomalagi? 13A sa sega e dua na tamata sa lako cake ki lomalagi, ko koya ga sa lako sobu mai lomalagi, a Luve ni Tamata, ko koya sa tiko mai lomalagi. 14#Tiko 21.9Ia me vaka sa laveta cake na gata ko Mosese mai na loma ni vanua lala, e dodonu me laveti cake vaka talega kina na Luve ni Tamata, 15me kakua kina ni rusa ko ira yadua sa vakabauti koya, me ra rawata ga na bula tawa mudu.
16 “Ni sa lomani ira na kai vuravura vakaoqo na Kalou, me solia kina na Luvena e dua bauga sa vakatubura, me kakua ni rusa ko ira yadua era sa vakabauti koya, me ra rawata ga na bula tawa mudu.
17 “Ni sa sega ni tala mai na Luvena ki vuravura na Kalou me cudruvi ira na kai vuravura; me bula ga ko ira na kai vuravura e na vukuna. 18O koya sa vakabauti koya sa sega ni cudruvi, ia ko koya sa sega ni vakabauta sa qai cudruvi, ni sa sega ni vakabauta na yaca ni Luve ni Kalou, e le dua bauga sa vakatubura ko koya. 19Ia sai koya oqo na ka eda sa lewai kina: ni sa lako mai na rarama ki vuravura, ka ra sa vinakata na butobuto ko ira na tamata, ka cata na rarama, ni sa ca na nodra i valavala. 20Ni sa cata na rarama ko koya yadua sai valavala ca, ka sa sega ni lako mai ki na rarama, de kunei na nona i valavala. 21Ia ko koya sa muria nai valavala dina sa lako mai ki na rarama, me vakaraitaki na nona i valavala, ni sa vinaka vua na Kalou.”
Ko Jisu kei Joni na Dauveipapitaisotaki
22Ni sa oti na veika oqo, sa lako ko Jisu kei ira na nona tisaipeli ki na vanua ko Jutia, a sa tiko mai kina kei ira, ka veipapitaisotaki. 23A sa veipapitaisotaki ko Joni talega mai Inoni sa voleka ki Selimi, ni sa levu kina na wai; a ra sa lako mai eso ka ra sa papitaisotaki 24#Maciu 14.3; Mari 6.17; Luke 3.19,20—ni se bera ni biu ki na valeniveivesu ko Joni.
25Sa qai veileti ko ira na tisaipeli i Joni kei na dua na Jiu e na vuku ni veivakasavasavataki. 26A ra sa lako mai vei Joni, ka kaya vua, “Vakavuvuli, ko koya drau a tiko kaya e na tai kadua ni Joritani, ko koya ko a tukuna, raica, sa veipapitaisotaki tiko ko koya, a sa lako mai vua ko ira na tamata kecega.” 27Sa vosa ko Joni, ka kaya, “E sega e dua na tamata sa rawata e dua na ka, kevaka sa sega ni soli vua mai lomalagi. 28#Joni 1.20Dou sa tukuni au ni'u sa kaya, ‘Au sa sega ni Karisito koi au, ia ka'u sa talai mai me'u liutaki koya.’ 29Sa nei koya na tagane sa qai vakawati ko koya na watina. Ia na weka ni tagane, ko koya sa tu ka rogoca na nona vosa sa rekitaka vakalevu na domo ni tagane. Sa qai vakayacori vakakina na noqu reki oqo. 30Sa dodonu me levu cake tiko ko koya, ia me'u lailai sobu tiko koi au.”
Ko Koya sa Lako mai Lomalagi
31O koya sa lako mai cake, sa uasivi vei ira kecega na tani. Ko koya sa tubu ga e vuravura sa vakavuravura, a sa vosataka na ka vakavuravura. Ko koya sa lako mai lomalagi sa uasivi vei ira kecega na tani. 32Ia na ka sa raica ka rogoca ko koya, sa tukuna oqori, a sa sega e dua na tamata sa vakabauta na nona i tukutuku. 33O koya sa vakabauta na nona i tukutuku sa vakadinadinataka oqo, ni sa dina na Kalou. 34O koya sa tala mai na Kalou, sa vosataka na vosa ni Kalou, ni sa solia vakayauyau na Yalo Tabu na Kalou. 35#Maciu 11.27; Luke 10.22Sa lomana na Luvena ko Tamana, a sa solia na ka kecega ki ligana. 36O koya sa vakabauta na Luvena, sa rawata na bula tawa mudu; ko koya sa sega ni vakabauta na Luvena, ena sega ni raica na bula, a sa tiko ga vei koya na cudru ni Kalou.
Currently Selected:
Joni 3: FRV21
Tõsta esile
Share
Copy
Want to have your highlights saved across all your devices? Sign up or sign in