NINGPAWT NINGHPANG 3
3
Shinggyim Masha A N Madat N Mara Ai Lam
1Ya dai lapu gaw dai Madu Karai Kasang e galaw da nu ai dusat hta zai hpaji rawng htum nga ai. Dai lapu gaw numsha hpe, “Ndai sun hta tu ai gara hpun hta na asi hpe rai tim, nan n sha lu na rai myit dai, nga nna Karai Kasang nan hpe kaja wa tsun a ni?,” ngu nna san wu ai. #Shr 12:9; 20:2.
2Dai numsha gaw, “Ndai sun a ka-ang hta tu ai hpun hta lai nna, gara hpun na asi hpe mung an sha mai nga ga ai. 3Karai Kasang gaw an hpe dai hpun a asi hpe n sha hkrup na matu mung, dai hpe hkra pyi n sa hkra na matu mung, tsun da mani ai; dai hpe an sha hkrup ai rai yang, an si na ga ai,” ngu nna htan wu ai.
4Lapu gaw, “Dai ga teng nga ai n rai; nan si lu na myit dai n rai. 5Dai asi hpe nan sha ai shaloi Karai Kasang zawn nan tai wa nna kaja ai hte n kaja ai lam hpe nan chye ginhka wa na hpe shi chye ai majaw Karai Kasang tsun da ai re,” nga nna bai htan wu ai. 6Dai hpun gaw kade wa tsawm nga ai mung, de a asi hpe sha dat yang kade wa mai kaja nga ai mung, dai gaw hpaji rawng ai wa tai wa yang kade sha mauhpa rai nga ai hpe shi myit lu nga ai hpe mung, dai numsha mu wu ai. Dai majaw dai hpun hta na asi di la nna sha wu ai. Dai hpang shi gaw nkau mi hpe shi a madu wa hpe jaw wu ai rai nna shi mung sha kau nu ai. 7Dai asi hpe shan sha ngut ai shaloi jang, chye na hkawn hkrang ai hpaji shan lu la nna, shan singgu krin rai nga ma ai hpe dum chye ma ai; dai majaw shan gaw lakum lap ni hpe chywi matut nna tinang hkum ni hpe magap da ma ai.
8Shan gaw dai shana de na aten hta e dai Madu Karai Kasang sun hta sa hkawm nga ai hpe na ma ai; shan gaw Karai Kasang a myi man kaw nna makoi lu hkra nga, hpun ni a kata e gawp nga ma ai. 9Rai ti mung Madu Karai Kasang gaw shinggyim lasha hpe, “Nang kanang nga nga n ta?,” ngu nna shaga wu ai.
10Shi gaw, “Ndai sun e na a nsen hpe ngai na nna, singgu shakrin rai nga nngai majaw ngai hkrit nna gawp makoi nga nngai,” ngu nna htan wu ai.
11Karai Kasang gaw, “Nang singgu shakrin rai nga ndai hpe kadai wa tsun dan a ta? Hkum sha ngu nna nang hpe ngai tsun da ai hpun hta na asi hpe nang sha kau nu ni?,” nga nna san wu ai.
12Shinggyim lasha gaw, “Ndai shara e ngai hte rau nga na matu nang ap ya ai numsha gaw ngai hpe namsi jaw nna dai hpe ngai sha kau ni ai,” ngu nna htan wu ai.
13Dai Madu Karai Kasang gaw, “Nang hpa majaw ndai amu hpe galaw kau nu ni?,” ngu nna numsha hpe san wu ai.
Shi gaw, “Dai namsi hpe sha na matu, lapu mahtang ngai hpe lau la ni ai,” ngu nna htan wu ai. #2Ko 11:3; 1Tm 2:14.
Karai Kasang Tara Jeyang Ai
14Dai hpang Madu Karai Kasang gaw lapu hpe, “Ndai amu a majaw nang ari hkrum sha na rin dai; dusat yam nga ni yawng hta nang chyu sha ndai dagam dala ga hkrum na ndai. Nang gaw ya kaw nna na a kan hte gumrawt hkawm lu na ndai, nang hkrung nga ai nhtoi hte yang, ga nhpu sha lu na rin dai. 15Ngai gaw nang hte shinggyim numsha a lapran hta mung, na a amyu matu hte shi a myu matu hpe mung n ju n dawng shangun nna galoi mung gumlau hpyen atai shangun nga na nngai. Shi a amyu matu gaw na a baw hpe abrep nna nang mung shanhte a lahtin hpe achye na ra ai,” ngu nna tsun wu ai. #Shr 12:17.
16Shi gaw numsha hpe mung, “Na a na-um nasin re ai tsin-yam hte shinggyim machyi ai nchyi nmu lam hpe ngai shalaw ya na nngai. Dai zawn hkrum hkra nga ti mung, nang gaw na a madu wa hta myit manoi nga nna, shi mung na a ntsa e up nga na ra ai,” ngu nna tsun wu ai.
17Shi gaw lasha hpe mung, “Na madu jan a ga hpe nang madat nna, hkum sha ngu nna ngai tsun da ai hpun hta na asi hpe nang sha kau nit dai. Nang galaw kau nit dai amu a majaw aga gaw dagam dala hkrum na ra ai. Nang hkrung nga ai hte yang bungli shaja sha ra nna na a matu lusha hpe mung dai hta alaw alam galaw shapraw ra na ndai. 18Dai hta na aju ni hte atsing ni tu pru wa nna, nam na namlaw namlap ni hpe nang sha lu na rin dai. 19Ga hte nang shachyaw da ai hkrum nga ndai majaw ga de nang bai nhtang wa ai aten du hkra, ga kaw nna hpa hpe mung tu shaprut lu na matu nang gaw salu salat hte bungli shaja sha ra na ndai. Nang gaw ga hte shachyaw da nga ndai majaw ga bai tai na rin dai,” ngu nna tsun wu ai.
20Adam #3:20: Adam: Ndai mying hpe Hebre ga hku “Shinggyim masha” ngu ai. gaw shi a madu jan hpe Ewa ngu nna shamying wu ai; hpa majaw nga yang shi gaw shinggyim masha ni yawng a kanu rai nga ai. 21Dai Madu Karai Kasang gaw Adam hte shi a madu jan a matu shanhpyi hpun palawng galaw nna shan hpe shabu jahpun wu ai.
Adam Hte Ewa Hpe Eden Sun Kaw Nna Shapraw Kau Ai
22Dai hpang Madu Karai Kasang gaw, “Ya chyawm gaw masha wa gaw anhte hta na langai mi zawn tai wa nna kaja ai hte n kaja ai a machye machyang hpaji hpe lu la nga nu ai. Shi gaw htani htana ahkrung nga na matu, asak jaw ya ai hpun a asi hpe di sha na ahkang lu nu ai n rai,” ngu nna tsun wu ai. #Shr 22:14. 23Dai rai nna Madu Karai Kasang gaw shan hpe Eden sun kaw nna shapraw kau nhtawm shan a hkrang shachyaw la hkrum ai ga hta shan hpe galaw sha shangun wu ai. 24Dai hpang shi gaw sun a sinpraw maga de ahkrung nga ai hkrung kanu ni hte man maga shagu de shi chyu nwat shadang chye ai wan nhtu hpe tawn da wu ai. Dai gaw asak jahkrung ya ai hpun de ni sa wa ai kadai hpe mung hkap shingdang na matu rai nga ai.
Currently Selected:
NINGPAWT NINGHPANG 3: JCLB
Tõsta esile
Share
Copy
![None](/_next/image?url=https%3A%2F%2Fimageproxy.youversionapi.com%2F58%2Fhttps%3A%2F%2Fweb-assets.youversion.com%2Fapp-icons%2Fet.png&w=128&q=75)
Want to have your highlights saved across all your devices? Sign up or sign in
Jinghpaw Common Language Bible © Bible Society of Myanmar, 2009.