Luc 21
21
Okuuli owuha
1Zezi okeesi o paani e nde, omoni anga osolo ma leehi ndamini e Ndziami ntsa anguli a mo ndzo e Ndziami. 2Nde se omoni okaasi okuuli owuha, alehi adoro a nkoso vuele ma akiehe. 3Ŋa nde ndi: «Me eduha be sisiele, okaasi okuuli owuha yu omi vula abuha aso ompa. 4Obila abuha alehi adoro a bo ma ali kaama kali. Ŋa nde ampi a nde aki na bo aso ma lebihi le nde.»
Zezi atooso etsalihi e ndzo e Ndziami
5Baari ake aki ma wobo mo ndzo e Ndziami, ma aduha ndi yo na owali na akele a yo ma awali, na biibi ma ampi Ndziami. Ŋa Zezi ndi: 6«E be lemono bi eso, etsuhu me edze oya, ma aka ma mono kele o yula kele ni. Ma tsala dzo eso.» 7Bo apisi Zezi ndi: «E Nkumu maami maa ma dze oya o dzini ntini? Ndiimi elaha maami maa edze oka ma?» 8Zezi okaali na bo ndi: «Leesa ayiba, leka nyiliha akiisi be ni! Obila baari kuna ma aya o nkuumi e me, bo aduha ndi: “Yu me Krisi!” Na “Antini ami to!” Ŋa leka luonoho bo ni. 9Ntini e be ledze oyuha ma wobo ma eta, na baari ma saraha, leka monoho vuoho ni, obila ove maami ma asa aya. Ŋa ntini ekini to ni.» 10Ŋa Zezi oluusi ndi: «Osi omo edzuana bla osi okima, nkani omo se adzuana bla nkani okima. 11Ntsie edila onyuha na mpari, ma ebiri kuna, na ndzala eva bla angaa a nkala, ma adze omono maami a luari, bla andiimi o yulu. 12Ŋa levusu le maami ma aso, ma kuara be, be lemono ampasi. Ma adze na be ntsa andzo ma avuonoho ma opama be. Omana alehe be ma ongeneŋe. Ma bira be o miisi ma ankani na apatima, obila o me. 13Maami a be leedze omono maa, ma mpa be lengulu ma o siisa enyua o me. 14Lelehe ntsa etima e be mbri: be leka sa baana oyeese maami a be leduha ni. 15Obila me anku empa be mbari bla ntsimi eli abuha ma ombangu i sa ekemi ni, bo aso se i buuna obisa yo ni. 16Na ataara a be bla anguhu se, na baana ma anguhu, na nkuono bla andihi a be, ma adze ompa be na ankani. Bo se ma adze obuma kuna o mpanihi e be. 17Baari aso ma bele be obila o me. 18Ŋa si lemfu lemo le ma otsui a be leka nyuoho ni. 19Lesa nkomoho! Lya lemihi le be le edze ovusuha lebihi le be.»
Zezi atooso etsalihi e Zerizaleme
20«Ntini e be le edze omono aworo ma abuha ma ombangu, ama dzenehe Zerizaleme, be leyaa mbri ntini eya tuha ma tsala Zerizaleme. 21Ŋa baari ma adze oka o Zide, ove bo adimi mpili ekuri. Baari ma adze oka ntsa onguundu, ove bo atsuuhi. Baari ma adze oka ntsa anguunu i ma nyuniha ntsa onguundu ni. 22Obila bia ma edze oka etsuhu e mpasi. Maami ma ama teende o ntsa Osaangumu o Ndziami, ma adze oya. 23Etsuhu bia, ma eka etsuhu e ndoho ma akaasi ma ali na ayimi, na ma ampa baana abiele! Mpasi yo mini edze oka ma osi ki. Ŋa nkala e Ndziami edze oya o yula baari ama osi ki. 24Ma adze obuma ake ma ekuere, ma adze obira bo mbri engenehe ntsa esi eso. Ŋa baari ama esi ekema, atsala Zerizaleme, tii ngo antini a baari baa ma adze oyira.»
Edzihi e Muana mvuuru
25«Andiimi ma adze oka o ntsa tari bla ngondo na anyari. O yula ntsie, esi ma edze omono onguo bla vuoho bo mini. Obila ma lesuhu le mpari na epuhi ma okeri onini. 26Baari ma adze okua mo vuoho o ntini e bo ma tsimiha maami ma adze oya o yula ntsie. Obila, mpari e biibi ma eli o yulu eso me dze o triha. 27O ŋa ma adze omono Muana mvuuru aya o ntsa lenguri bla mpari na lekuma le nde le eso. 28Ntini e maami maa ma adze obaana oya, be letemehi, lesaari etsui, obila evusihi e be eya tuha.»
Ntsintsami oti a figie
29Ŋa Zezi oti bo ntsintsami ndi: «Lekeese oti a figie bla eti ma emo eso. 30Ntini e be lemono ntsuusi ebaana otsuuha, be leyaa mbri osibi ove oya tuha. 31Ma osuumbu dzudzua, ntini e be lemono maami maa ma aya, ove be ledziabi mbri Onkani o Ndziami oya tuha. 32Me eduha be sisiele ntini e maami maa ma adze oya, ndzubu e lobi eka adze okua eso ni. 33Yulu bla ntsie me edze oyira, ŋa mbari e me eka adze oyira ni.»
Leeka muo
34«Leesa ayiba! Lekaa nyiliha otima a be olemi ntsa atsinda na mali a kuna ni, si kali ma ampasi ma lebihi ni, obila tsuhu Opami edze oya be o limihi. 35Mva oyere, yo edze oka tsuhu e kruhu o baari a yula ntsie aso. 36Lekaa tsiaha tolo ni, levuono antini aso. Ŋa be lebaha okiini o maami ma adze oya aso. Mo vua be le edze obuuna oka ma etele o mua Muana mvuuru.»
37Na mui, Zezi ayisiha ntsa ndzo e Ndziami, ŋa na ekikolo nde oyeni yula okuri eti ma Eliive, lempiibi le tsiina. 38Ŋa baari aso nkara entsiere ayi ndzo e Ndziami ma oyuha nde.
Currently Selected:
Luc 21: MDT
Tõsta esile
Share
Kopeeri
Want to have your highlights saved across all your devices? Sign up or sign in
©Seed Company in partnership with COORDINATION INTER EGLISES POUR L’ALPHABETISATION ET LA TRADUCTION EN LANGUES GABONAISES