Luk Itase ja buku wa Itundu ja mbɛ ja Luk akwɛlɛsɛ
Itase ja buku wa Itundu ja mbɛ ja Luk akwɛlɛsɛ
Moto akwɛlɛsɛ buku otɛ, jinɔ jeji Luk. Mujasa zufi, mujasa o ngabo ya bayokwɛ jonwu na mba ba Zɛzi. Nde, ahucɛkɛsɛ Pɔli wa ntɔtu o bocɛyi na inyamwaka ango o behaji bya Zambe. Luk okayi te akwɛlɛsɛ Buku wa mambo ma batɔtu. Atasɛsɛ itundu jeji ja mbɛ, te, ahakasa ilazɛcɛ obwɛji bemba byahajɛ bya Zɛzi abekasa. Akwɛlɛsɛ mambo mɛ mahajɛ bosina bwa ba-Zufi, na baji teka ja ba-Zufi; bosina bwa bango eyebaka te mambo ma batandasa bango majasa mombo. Atandasa bemba buce na njanga mwa Zɛzi anɔnɔkɔsɔ bato, ba mabiya, ba babyaza, bayito, na mencɛyi.
Ngwɛnɛ etɛ ya bamukaba buku otɛ:
O bebwayi 1 na 2, Luk asɔhɔkɔsɔ jambo ja ijibwe ja Zabatisi, na ijibwe ja Zɛzi na bopaka bweji. Na ilazɛcɛ nda Mali, Zakali, na Simeyɔn basomɛkɛsɛ Zambe na beboka. Bemba byɛ bata kwɛlɛ bya ango o banɛ babuku ba itundu ja mbɛ.
Imanyaka ebwayi 3 etatanga 1, ngu na ebwayi 4 etatanga 13, Luk ahɛlɛkɛsɛ nda Zabatisi ayasa iyebɛcɛ pɛyi ya Zɛzi, na etɛ ya Zɛzi akwasa nso mwa ndonga na Za, na njanga mwa Satan amamasa ango.
Imanyaka ebwayi 4 etatanga 14, ngu na ebwayi 9 etatanga 50, Luk alazɛkɛsɛ bemba bya Zɛzi abekasa o njɛnjamɔngɔ ya Ngalile yahajɛ, na ihɛlɛcɛ bato ceko mwa Zambe, na iyonjɛcɛ membɛlu.
Imanyaka ebwayi 9 etatanga 51, ngu na ebwayi 19 etatanga 28, Luk atandakasa nda Zɛzi amanyasa Ngalile na ilwaka bya Zɛlizalami. O panga etɛ, Luk asɔhɔsɔ bemba buce bya teka ja o banɛ babuku ba itundu ja mbɛ, na ibyate bemba buce bya Zɛzi ahɛlɛkɛsɛ bato, na melembya mya nda lembya mwa moto wa bɔnhu wa Samali, lembya mwa moto wa bokumani wa teka bocɛngu, na lembya mwa mwana amulapa wa bakumɛsɛ.
Imanyaka ebwayi 19 etatanga 29, ngu na ebwayi 21 etatanga 38, Luk atandakasa bemba bya Zɛzi abekasa bya Zɛlizalami na maheya ma ango ahɛlɛkɛsɛ bya imɛnɛ.
O bebwayi 22 na 23, Luk asɔhɔkɔsɔ jambo ja mezuku mya ilɛlɛ ja Zɛzi, na njanga mwa ango eyomwaka o malonga, na etɛ ya ango ehɛlɛcɛ nyo eji na bayokwɛ beji.
O ebwayi 24, Luk ahijɛsɛ buku eji usiya ango atandasa nda Zɛzi abetasa bya iko.
Currently Selected:
Luk Itase ja buku wa Itundu ja mbɛ ja Luk akwɛlɛsɛ: KOQ
Tõsta esile
Share
Copy
Want to have your highlights saved across all your devices? Sign up or sign in
©Seed Company in partnership with COORDINATION INTER EGLISES POUR L’ALPHABETISATION ET LA TRADUCTION EN LANGUES GABONAISES