Jean 5
5
Jesus ubelusa ebelusi yimbolutu
1Amana manovioga baJuif bamavaga feta na Jesus amawenda o Jerusalem. 2Kabogu o Jerusalem va mugula udikotulu diBindombu vamaba yiduna yimamba ayimanengulungu Bethzatha mu Hebreu na ayimaba na piasu yiranu. 3Mu piasu tsieni mumaba bibedu bipuela abimasilama vana; bidunga na bitsondu na bimboiutu. [Bamavivanga temu mamba mefunduyili. 4Diwendi rie: yiansa yiFumu yimasunduganga uyefundula mamba. Yibedu yitega ayimasunduga o mamba ava mamafunduyilanga yimabeluga.] 5Avana vamaba dibaala adimabeianga yitsingu yineni, diwendi rie: magumariem na yinana yibilima. 6Jesus anomulaba asilama na anojaba yiri amaba nobela yitsingu yineni amamuwivula rie: Ndeʼ guirondi ubeluga?
7Yibedu amamugabusila rie: Mulonsi ngaa na mutu uputiga mu mamba ava mefunduyili na ava nyiwendili ususu eteyili usunduga.
8Jesus amamutsingula rie: Relama, bonga tangi agu na wendanga.
9Dibaala dieni amabeluga vana vana. Amabonga tangi andi na amayenawenda.
Dionyi dimavagu mu yilumbu yitsona. 10Kabogu baJuif bamavosa nandi rie: Namunyi yivu yilumbu yitsona; gugaa na musuga ubega tangi agu.
11Amabagabusila rie: Jandi otsimbelusa atsinsingula rie: Bonga tangi agu na wendanga.
12Bamamuwivula rie: Anyi atsigutsingula rie: Bonga tangi agu na wendanga?
13Tumba agumabelusu asamajaba mutu eni mu mbari Jesus amatsiemuga va gari yinombu ayimaba va mbura eni.
14Ava tsisiga Jesus amamurasuna o Ndagu Nsambi na amamutsingula rie: Labati gumabelusu. Guyamuevaga masumu yiri gugolaba disusu adiviolila uroga.
15Dibaala dieni amayenawenda na amatubulila baJuif rie: Agumambelusa la Jesus. 16Kabogu baJuif bamabanda ukuana Jesus mu mbari amabelusa mutu mu yilumbu yitsona. 17Tumba Jesus amabagabusila rie: Taji ami esalingi na menu wami nyisalingi.
18BaJuif banodigulu bamamuerombanga umuboka. Bamajaba yiri amasumuna mugaga mu diambu ditsona mbana va julu vana evosi yiri Nsambi aji tindi Taji andi na aji dedi nandi.
Musuga uMuana Mutu
19Kabogu Jesus amavosa nogu rie: Dingensa nyidutsinguli rie: Muana agorungula usala yisalu jaʼ beni; esali yika ayi Taji esali. Biotsu abi Taji esali Muana ebisali munongu mosi. 20Taji erondi Muana na emulonsi biotsu abi jandi esali na jandi omulonsa bisalu abiviolila bibi te na dukambulu. 21Mu mbari nana Taji erambusili bamfumbi nobavega monyu anana Muana wandi eveyili monyu ombu agu erondi umuvega. 22Taji agetabulili mutu bunsonsi tumba amavega bunsonsi buotsu ombu Muana 23yiri botsu boyitsa Muana nana beyitsili Taji. Uotsu agugeyitsi Muana ageyitsi Taji omamusindiga.
24Dingensa nyidutsinguli rie: Oyigulu mambu mami na evayili omansindiga yitu, jandi ana monyu umutubu na agovegu mbela tumba amagusuga o dufu na amavioga o monyu. 25Dingensa nyidutsinguli rie: Diweru diruyi na dimaruga kala adi bamfumbi bogululu diufi diMuana Nsambi na bodila monyu. 26Mu mbari Taji jaʼ beni ana monyu kabogu amavega Muana musuga ugaba monyu. 27Amamuvega musuga utabula bunsonsi mu mbari jandi aji Muana Mutu. 28Duyakambulu mu dionyi mu mbari diweru diuruga adi botsu abavu mu mangila bogululu diufi diandi 29na bopala. Jogu abamavaga maboti borambuga na ndunga tumba jogu abamavaga mabi borambuga na mbela.
Bilimba bimusuga uJesus
30Ngorungula usala yisalu meʼ beni; yika nana nyigululu anana nyitabulili burisonsi na bunsonsi buami buvu busungama mu mbari ngerondi duganu duami tumba duganu dujandi omansindiga. 31Pa nyikesingisila bumbeji, bumbeji buami bugaa yilimba yiwelimina. 32Va mutu ususu aguinsingisili bumbeji na nyijabi yiri bumbeji abu ensingisili buvu bungensa. 33Dumasindiga bilumbi ombu Jean na amasingisila bumbeji bungensa. 34Digewendi rie: Bumbeji buami buvu na tsongu mu mbari bumasingusulu na mutu; nyivosi motsu mana yiri dugobulu. 35Jean amaba nderi lambi ajimabangusu na ajimadumonitsa; dumalaba ubueji na yijalala yiandi. 36Tumba nyina bumbeji abuiviolili abu Jean uroga; bisalu abi nyisali Tata amabipega, bisalu bieni bilasi yiri Tata amansindiga. 37Taji omansihdiga jaʼ beni amasingisila bumbeji mu diambu diami. 38Dusakagulu diufi diandi na dusakamulaba; mambu mandi magetsani nenu mu mbari dugevayili agu jandi amasindiga yitu. 39Duikeluli Bisonu mu mbari duitasi anana dudilila monyu umutubu; dingensa bionyi bisingisili bumbeji buami. 40Tumba dugerondi uruga ombu gami udila monyu aguvu ngensa.
41Ngerondi ukakusu na batu. 42Tumba nyidujabi na nyijabi yiri dugaa na durondu duNsambi. 43Nyimaruga na musuga uTaji ami na dusamandila; ava mutu ususu oruyila na musuga ujaʼ beni nyijabi dumudila. 44Duirondi dikakisa dijenu beni na jenu beni tumba dugerondi dikakisa adiruyili ombu Nsambi kabogu tsie durungulila uvaga yitu? 45Duyatasa yiri menu nyudufuengilila va gusu Taji. Jandi oyidufuengilila la Moise o jenu duitasili. 46Pa ngensa dumavayila Moise yitu mbe dupayila yitu wandi mu mbari amatubula mambumami. 47Tumba pa dugevayili Bisonu biandi yitu tsie duvayila mambu mami yitu?
Currently Selected:
Jean 5: PUU1992
Tõsta esile
Share
Copy
Want to have your highlights saved across all your devices? Sign up or sign in
La sainte Bible en langue Yipunu © Alliance Biblique du Cameroun, 1992.