Matta 7
7
Dakimiye lijo liter
1Athathanya akimiyo lijo liter no, a nyaŋa lati laji lakimini no. 2A gwiro ŋinena athanyan akimiye lijo liter, nyaŋa laji lakimini; a gwiro ŋinena athanyan yece, a nyaŋa laji layecini ko. 3Kworaŋ athaŋabaŋa kajilero gina gijo ke ganu ga magalo, athaŋa baŋudhi dhure dhina dhijo ke ganu guŋa na? 4I au gwuthi ŋoma gwabiŋaijo magalo, gwaŋaici, Abriciny ŋa wala kajilero ke ganu guŋa; abi dhure je ke ganu guŋa? 5Kwiji gwai gwina gwuthi dhuŋuna ganu ram, wali dhure kwereny dhina dhijo ke ganu guŋa; a ŋa gwaji gwuthi ŋoma gwawal kajilero ke ganu ga magalo. 6Athaŋa dhedhi nyinu ŋida ŋina ŋiŋir didirel no, i athaŋa gathijo judhura lulua galo ŋwora ganu ŋwegen no, dildota galo ŋwora ŋwai, alothatha ganu no.
Bir nono dabiŋaijo Kaloŋa
7Athanya othaije galo, a ŋajildhedha; athanyabupe, a nyaŋa labuje; pidhul gibura, a gibur gaji igiejinu galo. 8Liji peth lina lathothaije galo laji lapai; a lina lathibupe laji labuje ŋida ŋina ŋibupilo; a gwina gwathipi gibura a gwaji gwa gibur igiejinu galo. 9I ada kwiji gweta dagalo gwima ŋari ŋuŋun othaije galo ⓐesh yai, ŋaji ŋuŋwdhedha kolya a? 10I ada gwimuŋw othaije galo lum lai, ŋwudhedha dhumeo a? 11Ada nyaŋa, lina liro liji like, limaliŋa didhedha keleŋa galo ŋida ŋina ŋiŋir, abi Babo gwalo gwina gwathije Sama gwati gwiliŋidhanu didhedha lijo ŋida ŋiŋiranu lina lathothaije galo na?
Naamuus gwina gwiŋir
12Dhuŋun peth dhina dhathaji liji urijo dhathanyal urijo ko; ŋinena ruŋw dhuŋun dha naamuus a dha nebiŋa.
Dai ram
13Udhul kour ina imadhi ganu; our yoraŋ ganu, a dhai dhina dhathilodha dhela dai, athin liji loinyadho ela. 14Our imadhi ganu, a dhai dhina dhathilodha di midhe athin liji coŋ ela dogo.
Dhina dhiro titiganu a dhina dhadhi dhudhe
15Athanya ethadhini dhuŋuna galo dha nebiŋa lina liro lidhuŋun, lina lathajilijo ciraŋ jai jina jiro jola ja jaŋal, abi gi dugor ganu degen albiro ŋinena jamarainy jina jathare. 16Gi dhuŋun dha fruuta gwegen dhaji dhanya liŋa. Liji lathuthe dugura gi cugi alaŋ, i aluthe gwudha karo alaŋ gina giro kwira a? 17Gwiro minoŋ ko jari peth jina jiŋir jathirire fruuta gwina gwiŋir; abi kwari gwina gwidigiro gwathirire fruuta gwina gwidigiro. 18Kwari gwina gwiŋir gwati gwaudhi dirire fruuta gwina gwati gwiŋir no, a kwari gwina gwidigiro gwati gwaudhi dirire fruuta gwina gwiŋir no. 19Jari peth jina jati jathirire fruuta gwina gwiŋir no jathi urtudhini galo, alguthini kiga. 20A minoŋ maji malrire fruuta gwegen a janyal liŋa.
Dhuŋun a ŋiro
21Gwati liji peth lina lathinyaicinu Kweleny gwai, Kweleny gwai, laji luni kidhila ga Sama no; abi kwiji dogo gwina gwathapai dhuŋuna dhina dhathiŋiriye Babuŋw gwiny dhugore gwina gwathije Sama. 22Gi lamun ibile liji loinyadho laji linyaicinu, Kweleny gwai, Kweleny gwai, anaŋa lati labiŋaijo lijo dhuŋuna dhiro ŋinena dha nebiŋa gi jiriny juŋa na? a anaŋa lati liteyo nyurinya gi jiriny juŋa na? a gi jiriny juŋa anaŋa lati lapo ŋiro ŋina ŋathi alije lijo galo dir na? 23A liji linyil abiŋaijo, linyilaici, Nyi gwati gwiliŋidhaje gatur no; idhul nyabire diginy, nyaŋa lina lathapai ŋida ŋina ŋike.
Dugul ram
24Liji peth lina lidiŋinu dhuŋuna dhiny, aluthejo nyuni, laji laro ŋinena kwiji gwina gwibebra, gwina gwaico duna gwuŋun kol alaŋ. 25A ma kau ni, a kwuru ira, a karun are gipa, ŋwupe duna, athuŋwbi ido no; ŋinena ucinuŋw momaŋ kol alaŋ. 26A liji peth lina lathidiŋini dhuŋuna ibidha dhiny, athil bapo no, laji laro ŋinena kwiji gwina gwiro girila gwina gwaico duna gwuŋun kamur alaŋ. 27A ma kau ni, a kwuru ira, a karun are gipa, ŋwupe duna ibigwe; ŋwun ida ganu; a ide gwuŋun ro gwipa ŋwal. 28A dina ma Yasuuⓐ meaje odaijuŋw ibigwe, a liji peth ali galo dir gi taⓐliim dhuŋun. 29Lalimiyuŋwulo gwiro ŋinena kwiji gwina gwuthunu ŋelenya, athuŋw rui ŋinena jathib no.
Currently Selected:
Matta 7: HBN
Tõsta esile
Share
Copy
Want to have your highlights saved across all your devices? Sign up or sign in
First published by the British and Foreign Bible Society in 1966.