Genesis 5
5
Adomren bõskoakʼ katha
(1 Bõsbudạ 1.1-4)
1 #
Gen 1.27,28 Noa do hoyokʼ kana Adam bõsrenkoakʼ katha. Isor do acʼleka, acʼakʼ muṭhạn lekage manwae sirjạukedea; 2#Mat 19.4; Mrk 10.6 Uni do herel ar maejiukategeye sirjạuketʼkinạ are bhoratʼkinạ. Ar unkin do manwae ńutumketʼkinạ. 3Adamakʼ mitʼsae pegel bochor umer tahẽkanre uniren do mitʼṭen koṛa hopone hoyena. Uni hopon do acʼlekageye hoyena. Adam do uniyakʼ ńutum Sethe dohoketʼtaea. 4Seth janam tayom Adam do irạl sae bochor jiwetʼe tahẽkana. Ar onako dinre uniren do ạḍi utạr hopon ar hoponerako hoyena. 5Adam do jotote are sae pegel bochor jiwetʼe tahẽkana ar ona tayom doe gocʼena.
6Seth do mitʼ sae mõṛẽ bochor umer tahẽkanre uniren hopon Enose janamena. 7Enos janam tayom Seth do irạl sae eae bochor jiwetʼe tahẽkana. Onako dinre uniren do ạḍi utạr hopon ar hoponerako janamena. 8Seth do aresae gelbar bochor jiwetʼe tahẽkana ar ona tayom doe gocʼena.
9Enosakʼ aregel bochor umer tahẽkanre uniren hopon Kaine janamena. 10Kain janam tayom Enos do irạlsae gelmõṛẽ bochor jiwetʼe tahẽkana. Onako dinre uniren do arhõ hopon ar hoponerako janamlena. 11Enos do jotote aresae mõṛẽ bochor jiwetʼe tahẽkana ar ona tayom doe gocʼena.
12Kainakʼ eaegel bochor umer tahẽkanre uniren hopon Mahalalelakʼ janam do janamena. 13Mahalalelakʼ janam tayom Kain do arhõ irạlsae pongel bochor jiwetʼe tahẽkana. Inạko dinre uniren do arhõ hopon ar hoponerako hoylentaea. 14Kain do jotote aresae gel bochor jiwetʼe tahẽkana ar ona tayom doe gocʼena.
15Mahalalelakʼ turuigel mõṛẽ bochor umer tahẽkanre uniren hopon Jared doe janamena. 16Jared janam tayom Mahalalel do arhõ irạlsae pegel bochor jiwetʼe tahẽkana. Inạko bhitrire uniren do arhõ hopon ar hoponerako hoylentaea. 17Mahalalel do jotote irạlsae aregel mõṛẽ bochor jiwetʼe tahẽkana ar ona tayom doe gocʼena.
18Jaredakʼ mitʼsae turuigel bar bochor umer tahẽkanre uniren hopon Enok doe janamena. 19Enokakʼ janam tayom Jared do arhõ irạlsae bochor jiwetʼe tahẽkana. Inạko dinre uniren do arhõ hopon ar hoponerako hoylentaea. 20Jared do jotote aresae turuigel bar bochor jiwetʼe tahẽkana ar ona tayom doe gocʼena.
21Enokakʼ turuigel mõṛẽ bochor umer tahẽkanre uniren hopon Mathusala doe janamena. 22Mathusalawakʼ janam tayom pesae bochor hạbicʼ Enok do Isor sãote jopoṛao tahẽkantaea. Onako dinre uniren do arhõ hopon ar hoponerako hoylentaea. 23Enok do jotote pesae turuigel mõṛẽ bochor noa dhạrtire jiwetʼe tahẽkana. 24#Ibr 11.5; Jihu 14Inạ tayom uni do okare hõ ar bae ńellena. Isor sãote uniyakʼ jopoṛao tahẽkante Isor do acʼ ṭhene idikedea.
25Mathusalawakʼ mitʼsae irạlgel eae bochor umer tahẽkanre uniren hopon Lameke janamena. 26Lamekakʼ janam tayom Mathusala do arhõ eaesae irạl gel bar bochor jiwetʼe tahẽkana. Onako dinre uniren do arhõ hopon ar hoponerako hoylena. 27Mathusala do jotote aresae turuigel are bochor jiwetʼe tahẽkana ar ona tayom doe gocʼena.
28Lamek do mitʼsae irạlgel bar bochor umer tahẽkanre uniren do mitʼṭen hopone hoyena. 29Uni doe menkeda, “Aboakʼ khaṭaoakʼko modre, bạ̃ṛtikaete Probhu Isor do ote sarapatʼ tayom aboakʼ oka khaṭao hoyokʼkan onate nui gidrạge abo do jiwiye raṛejtabona.” Noa menkate uni do Noha#5.29: Noha: Hebrewte noa reakʼ mane do “babańcao.” ńutume dohoketʼtaea. 30Nohawakʼ janam tayom Lamek do arhõ mõṛẽsae aregel mõṛẽ bochor jiwetʼe tahẽkana. Noako dinre uniren do arhõ hopon ar hoponerako hoylena. 31Lamek do jotote eaesae eaegel eae bochor jiwetʼ tahẽkana ar ona tayom doe gocʼena.
32Nohawakʼ umer mõṛẽsae bochor paromen khan uniren hopon Sem, Ham ar Japhet tekoko janamena.
Currently Selected:
Genesis 5: SBT
Tõsta esile
Share
Copy
Want to have your highlights saved across all your devices? Sign up or sign in
Santali Bible © Bangladesh Bible Society, 2021.