যোহন 6
6
পাচ্ আজার্ মান্জ্যরে হাবানা
(মথি ১৮:১৩-২১; মার্ক ৬:৩০-৪৪; লূক ৯:১০-১৭)
1ইয়েন পরেদি যীশু গালীল সাগরর্ উকুলে গেলঅ। এ সাগরানরে তিবিরিয়া সাগর-অ কুয়ো অয়। 2সয়-সাগোজ্যে মানুচ্ যীশুর্ পিযে পিযে যাহ্ ধল্ল্যাক্, কিয়া পিড়েল্ল্যেগুনো উগুরে তে যে চিহ্নো ইজেবে যেদক্কানি আমক্ অবার্ কাম্ গোজ্যে তারা সিয়েনি দেক্ক্যন্। 3যীশু তা শিচ্চ্যগুনোরে লোইনে এক্কো মুড়ো উগুরে উদিনে বলঅ। 4সেক্কে যিহূদীগুনোর উদ্ধোর্-পরব সময়বো এচ্চ্যে। 5যীশু চেরোকিত্যেদি রিনি চেলঅ আর দেগিলো সয়-সাগোজ্যে মানুচ্ তা ইধু এত্তন্। সেনত্যে তে ফিলিপরে কলঅ, “এ মানুচ্চুনোরে হাবেবাত্যে আমি কুত্তুন্ হানা কিনিবোং?” 6ফিলিপরে চাগি চেবাত্যে তে সে কধাগান্ কলঅ, কিয়া কি গুরিবো সিয়েন্ তে কোই পাত্ত।
7ফিলিপে জোব্ দিলো, “ইগুনে যুনি পত্তি জনে এক্কেনা গুরিয়ো পান্ তো দ্বিশত্ দীনারর্ রুটিয়েয়ো ন-কুলেব।”
8যীশু শিচ্চ্যগুনোত্তুন্ আর একজন নাঙ্ এলঅ আন্দ্রিয়। তে এলঅ শিমোন-পিতরর্ ভেই। 9আন্দ্রিয় যীশুরে কলঅ, “ইয়েনত্ এক্কো পুয়োর্ পাচ্চান্ মোক্ক্যে রুটি আর দ্বিবে মাছ আঘে; মাত্তর্ ইদুক্কুন্ মান্জ্যর সিগুন্দোই কি অবঅ?”
10যীশু কলঅ, “মানুচ্চুনোরে বোজেই দুয়ো।” সে জাগানত্ বোউত্ ঘাস এলঅ। বেক্ মানুচ্চুনে ঘাচ উগুরে বুজিলাক্। সিয়েনত্ মরদ এলাক্কে কমেদি পাচ্ আজার্। 11ইয়েন পরেদি যীশু সেই রুটি কয়েক্কান লোইনে গোজেনরে ভালেদি জানেল আর যিগুনে বৈই এলাক্ সিগুনোরে ভাগ্ গুরি দিলাক্। সেবাবোত্যেগুরি তে মাছ-অ দিলো। যে যেদক্ মাগিলাক্ সেদ্ক্ পেলাক্।
12যেক্কেনে তারা বেক্কুনে পেট ভরে সং হেলাক্, যীশু তা শিচ্চ্যগুনোরে কলঅ, “যে কট্টানি উগুজ্যে সিয়েনি এক সমারে থুবো যেন কিচ্চু বর্বাদ্ ন-অয়।” 13মানুচ্চুনে হানার্ পরেদি সে পাচ্চান্ রুটির যিয়েনি বাগী এলঅ শিচ্চ্যগুনে সিয়েনি থুবেইনে বারবো লেই ভোরেলাক্।
14যীশুর এ আমক্ কামানি দেগিনে মানুচ্চুনে কুয়ো ধল্ল্যাক্, “পিত্থিমীত্ যে ভাববাদীবোর্ এবার্ কধা আঘে ইবে ঘেচ্চেক্গুরি সেই ভাববাদীবো।” 15ইয়েন্দোই যীশু বুঝি পারিলো, মানুচ্চুনে তারে বলে ধুরিনে তারার্ রাজা বানেবাত্যে ধুরিবাত্তে এত্তন্। সেনত্তে তে গায় গায় আরঅ সেই মুড়োবোত্ গেলগোই।
প্রভু যীশু সাগর পানি উগুরে আঢিলো
(মথি ১৮:২২-৩৩; মার্ক ৬:৪৫-৫২)
16সাজোন্যে অনার্ পরেদি যীশুর্ শিচ্চ্যগুনে সাগর পারত্ গেলাক্, 17আর নৌকোত্ উদিনে কফরনাহূম শঅরত্ যেবাত্যে সাগর পার্ ওয়া ধল্ল্যাক্। সেক্কে আন্ধার্ ওইয়্যে, আর সেক্কেয়ো যীশু তারা ইধু ন-এজে। 18ভারী বেচ্ গুরি বৈয়্যের্ বার্ বিলি সাগরত্অ দাঙর্ দাঙর্ তুবোল্ উদের্। 19পাঁচ-ছয় কিলোমিটার নৌকোগান্ বেই যানার্ পরেদি তারা দেগিলাক্, যীশু সাগর উগুরেদি আঢিনে তারা নৌকোগান ইন্দি এজের্। ইয়েন দেগিনে শিচ্চ্যগুনে অমকদ দোরেলাক্। 20সেক্কে যীশু তারারে কলঅ, “ন-দোরেয়ো; ইবে দঅ মুই।”
21শিচ্চ্যগুনে তারে নৌকোগানত্ তুলিবাত্তে চেলাক্, আর তারা যিধু যাদন্ নৌকোগান সেক্কে সিধু লুমিলো।
জিংকানি-রুটি পৌইদ্যেনে উপদেচ্
22সাগর উকুলে যে মানুচ্চুনে থিয়েই এলাক্, তার্ কেল্যে তারা বুঝি পারিলাক্, তার্ আগ দিনোত্ সিধু এক্কান্ নঅ বাদে আর অন্য কনঅ নঅ ন-এলঅ। তারা আরঅ বুঝি পারিলাক্, যীশু তা শিচ্চ্যগুনো সমারে সে নগানত্ ন-উদে বরং শিচ্চ্যগুনে গায় গায় যেয়োন্। 23মাত্তর্ যিয়েনত্ প্রভু ভালেদি জানেবার্ পরেদি মানুচ্চুনে রুটি হেইয়োন্ সে জাগান কায় সেক্কে তিবিরিয়া শঅরত্তুন্ কয়েক্কান নঅ লুমিলোগি। 24ইয়েনত্যে মানুচ্চুনে যেক্কে দেগিলাক্, যীশু বা তা শিচ্চ্যগুনে কনজনে সিয়েনত্ নেই সেক্কে তারা সে নগানিত্ উদিনে যীশুরে তোগেবাত্যে কফরনাহূমোত্ গেলাক্। 25সিয়েনত্ লুমিনে তারা যীশুরে তোগেই পেইনে কলাক্, “মাষ্টর বাবু, তুই কক্কে ইধু এচ্চ্যস্?”
26যীশু জোব্ দিলো, মুই তমারে ঘেচ্চ্যেক্গুরি কঙর্, তুমি আমক্ অবার্ কাম্ দেক্ক্য বিলি যে মরে তগর্ সিয়েন নয়, মাত্তর্ পেট্ ভরে সং রুটি হেই পেইয়ো বিলি তগর্। 27মাত্তর্ যে হানাগান্ বর্বাদ্ ওই যায় সে হানাগানত্তে খিজেহিচ্চ্যে গুরিনে লাভ্ কি? যে হানাগান্ বর্বাদ্ ন-অয় বরং উমর্অ জিংকানি দান্ গরে সিয়েনত্যে খিজেহিচ্চ্যে গরঅ। সেই হানাগান্ মান্জ্যপুয়োবো তমারে দিবো, কিয়া বাবা গোজেনে প্রমাণ গুরি দেগেয়্যেদে যে, এ কামান্ গুরিবার অধিকার্ বানা তার্ আঘে।
28ইয়েন্দোই মানুচ্চুনে যীশুরে পুযোর্ গুরিলাক্, “সালে গোজেনর্ কাম্ গুরিবাত্যে আমাত্তুন্ কি গরা পুরিবো?”
29যীশু তারারে কলঅ, “গোজেনে যিবেরে পাধেয়্যে তা উগুরে বিশ্বেজ্ গরানা অলঅ গোজেনর্ কাম্।”
30সেক্কে তারা তারে পুযোর্ গুরিলাক্, “সালে কি এমন আমক্ অইদ্যে কাম্ তুই গুরিবে যিয়েন্ দেগিনে আমি তরে বিশ্বেজ্ গুরি পারিই? 31আমা পূরোণি মানুচ্চুনে দঅ ধূল্যেচর-চাগালাত্ মান্না হেইয়োন্। পবিত্র বোইবোত্ লেগা আঘে, ‘গোজেনে স্বর্গত্তুন্ তারারে রুটি হেবাত্তে দিলো।’ ”
32যীশু তারারে কলঅ, “মুই তমারে ঘেচ্চ্যেক্গুরি কঙর্, স্বর্গত্তুন্ যে রুটিগানি তুমি পেইয়ো সিয়েনি মোশি তমারে ন-দে, মাত্তর্ মঅ বাপ্পো আঝল্ রুটি স্বর্গত্তুন্ তমারে দের্। 33স্বর্গত্তুন্ লামি এইনে যিবে মান্জ্যরে জিংকানি দে তেয়ই গোজেনর্ দিয়্যে রুটি।”
34মানুচ্চুনে তারে কলাক্, “মাষ্টর বাবু, সালে সেই রুটিগানি নিত্য আমারে দে।”
35যীশু তারারে কলঅ, “মুয়ই সেই জিংকানি-রুটিগান্। যে মইধু এজে তাত্তুন্ কনদিন্অ পেট্ ন-পুরিবো। যে মঅ উগুরে বিশ্বেজ্ গরে তাত্তুন্ আর কনদিন্অ পানি তিরেচ্ ন-পেবঅ। 36মুই দঅ তমারে কোইয়োং, তুমি মরে দেক্ক্য মাত্তর্ তো বিশ্বেজ্ ন-গরঅ। 37বাবা মরে যিগুনোরে দে তারা বেক্কুনে মঅ ইধু এবাক্। যে মইধু এজে মুই তারে কনবাবদে বারেদি ফেলেই ন-দিম্, 38কিয়া মুই মঅ মনেমন্জক্কাগুরি কাম্ গুরিবাত্যে ন-এজং, বরং যে মরে দিপাধেয়্যে তার আওজ্ মজিম্ কাম্ গুরিবাত্যে স্বর্গত্তুন্ লামি এচ্চ্যং। 39যে মরে দিপাধেয়্যে তা আওজ্চান্ ইয়েন, যিগুনোরে তে মরে দিয়্যে তারাত্তুন্ একজনরেয়ো যেন মুই ন-আঝাং বরং শেজ্ দিনোত্ জেদা গুরি তুলোং। 40মঅ বাপ্পো আওজ্চান্ ইয়েন-তমা ভিদিরে যিগুনে পুয়োবোরে দেগিনে তা উগুরে বিশ্বেজ্ গরন্ তারা যেন উমর জিংকানি পান্। আর মুয়ই তারারে শেজ্ দিনোত্ জেদা গুরি তুলিম্।”
41সেক্কে যিহূদী নেতাগুনে যীশু বিরুদ্ধে বক্বক্ গরা ধুরিলাক্, কিয়া যীশু কোইয়্যেদে, “স্বর্গত্তুন্ যে রুটিগান্ লামি এচ্চ্যে মুয়ই সেই রুটিগান্।”
42সেই নেতাগুনে কুয়ো ধুরিলাক্, “ইবে কি যোষেফর্ পুয়ো যীশু নয়? ইবের্ মা-বাবরে দঅ আমি চিনিই। সালে তে কেধোক্ক্যেন্গুরি কয়, ‘মুই স্বর্গত্তুন্ লামি এচ্চ্যং’?”
43যীশু তারারে কলঅ, “তুমি নিজো ভিদিরে বক্বক্ ন-গুরিবা। 44মঅ বাপ্পো, যিবে মরে পাধেয়্যে তে টানি ন-আনিলে কনজনে মইধু এই ন-পারন্। আর মুয়ই তারে শেজ্ দিনোত্ জেদা গুরি তুলিম্। 45ভাববাদীগুনোর্ বোইবোত্ লেগা আঘে, ‘তারা বেক্কুনে গোজেনত্তুন্ শিক্ষ্যে পেবাক্।’ যে কেঅ বাবত্তুন্ শুনিনে শিক্ষ্যে পেইয়্যে তেয়ই মইধু এজে। 46বাবারে কনজনে ন-দেগন্, বানা যে গোজেনত্তুন্ এচ্চ্যে তেয়ই তারে দেক্ক্যে। 47মুই তমারে ঘেচ্চ্যেক্গুরি কঙর্, যে কেঅ মঅ উগুরে বিশ্বেজ্ গরে তে সেক্কেনে উমর জিংকানি পায়।”
48“মুয়ই জিংকানি-রুটি। 49তমা পূরোণি মানুচ্চুনে ধূল্যেচর-চাগালাত্ মান্না হেইয়োন্, আর তো তারা মুরি যেয়োন্। 50মাত্তর্ ইয়েন সেই রুটি যিয়েন্ স্বর্গত্তুন্ লামি এচ্চ্যে, যাতে মানুচ্ সিয়েন্ হেইনে মরণত্তুন্ রেহায় পান্। 51মুয়ই সেই জিংকানি-রুটিগান্ যিয়েন স্বর্গত্তুন্ লামি এচ্চ্যে। এ রুটিগান্ যে হেবঅ তে উমরত্তে জিংকানি পেবঅ। মঅ কিয়্যেগানই সেই রুটিগান্। মান্জ্যে যেন জিংকানি পান্ সেনত্তে মুই মর্ এ কিয়্যেগান্ দিম্।”
52এ কধাগান্ শুনিনে যিহূদী নেতাগুনো ভিদিরে তর্কাতুর্কি আরাম্ভ অলঅ। তারা কুয়ো ধুরিলাক্, “কিবাবোত্যেগুরি এ মানুচ্চো তা কিয়্যেগান্ আমারে হেবাত্তে দি পারে?”
53যীশু তারারে কলঅ, “মুই তমারে ঘেচ্চ্যেক্গুরি কঙর্, মান্জ্যপুয়োবোর্ য়েরাগান্ আর লো-গান্ যুনি তুমি ন-খঅ সালে তমা ভিদিরে জিংকানি নেই। 54যুনি কেঅ মর্ য়েরাগান্ আর লো-গান্ খায় তে উমর্অ জিংকানি পায়, আর মুই শেজ্ দিনোত্ তারে জেদা গুরি তুলিম্। 55মঅ য়েরাগান্ অলঅ আজল্ হানা আর মঅ লো-গান আজল্ হেবার্ পানীয়। 56যে মর্ য়েরাগান্ আর লো-গান্ খায় তে মঅ ভিদিরে থায় আর মুইয়ো তা ভিদিরে থাং। 57জেদা বাবা মরে দিপাধেয়্যে আর তাত্যেই মুই জেদা আঘং। ঠিগ্ সেবাবোত্যেগুরি যে মরে খায় তেয়ো মত্তে জেদা থেবঅ। 58ইয়েন সেই রুটিগান্ যিয়েন স্বর্গত্তুন্ লামি এচ্চ্যে। তমা পূরোণি মানুচ্চুনে যে রুটিগান্ হেইনেয়ো মুরি যেয়োন্ ইয়েন সেবাবোত্যে রুটি নয়। এ রুটিগান্ যে হেবঅ তে উমরত্যে জিংকানি পেবঅ।”
মানুচ্চুনোর্ অবিশ্বেজ্
59কফরনাহূম সমাজ-ঘরত্ শিক্ষ্যে দিবার্ অক্তত্ যীশু এ কধাগান্ কোইয়্যে। 60তা শিচ্চ্যগুনোত্তুন্ ভালোক্জনে এ কধাগান্ শুনিনে কলাক্, “ইয়েন্ ভারী আগাত্ত্যে শিক্ষ্যে। কন্না ইয়েন্ মানি লোই পারে?”
61যীশু নিজো মনে বুঝি পারিলো যে, তা শিচ্চ্যগুনে এ পৌইদ্যেনে নানান্ কধা কদন্। সেনত্তে তে তারারে কলঅ, “ইয়েন্দোই কি তমা মনত্ দুঘ্ পর্? 62সালে মান্জ্যপুয়োবো আগেদি যিধু এলঅ তারে সিধু উদি যাদে দেগিলে তুমি কি কবা? 63মান্জ্যর্ কিয়্যেগান্ কনঅ কামর্ নয়; পবিত্র আত্মাগানে জিংকানি দে। মুই তমারে যে কধাগানি কোইয়োং সিয়েনি আত্মিক জিংকানি দান্ গরে, 64মাত্তর্ তমা ভিদিরে এমন্ কেঅ কেঅ আঘন্ যিগুনে মরে বিশ্বেজ্ ন-গরন্।”
কন্না কন্না যীশুরে বিশ্বেজ্ ন-গরন্ আর কন্না বা তারে শত্রুগুনো আঢত্ ধুরি দিবো, যীশু পৌইল্যেত্তুন্ ধুরি সিয়েন্ হবর্ পেদঅ। 65সেনত্তে তে কলঅ, “মুই তমারে কোইয়োং, বাবা বল্ ন-দিলে কনজনে মইধু এই ন-পারন্।”
পিতরে প্রভু যীশুরে স্বীগের্ গুরিলো
66যীশুর এ কধাগানত্যে শিচ্চ্যগুনোত্তুন্ ভালোক্জনে ফিরি গেলাক্ আর তা লগে আঢাউদো বন্ধ গুরি দিলাক্। 67ইয়েনত্তে যীশু সেই বারজন শিচ্চ্যরে কলঅ, “তুমিয়ো কি যেবাত্যে চঅ?”
68শিমোন-পিতর যীশুরে কলঅ, “প্রভু, আমি কা ইধু যেবং? উমর জিংকানির্ কধা দঅ তইধু আঘে। 69আমি বিশ্বেজ্ গোজ্যেই আর হবর্ পেইয়্যেই যে, তুয়ই গোজেনর্ সেই পবিত্র মানুচ্চো।”
70সেক্কে যীশু তারারে কলঅ, “মুই তমা বার জনরে কি বেঈ ন-নেযাং? অদচ তমা ভিদিরে এক্কো শত্রু আঘে।” 71ইয়েনত্ যীশু শিমোন ইষ্কারিয়োতর্ পুয়ো যিহূদার্ কধা কোইয়্যে, কিয়া তেয়ই যেরেদি যীশুরে ধুরি দিবো। তে এলদে সেই বারজন ভিদিরে একজন।
Currently Selected:
যোহন 6: CBT
Tõsta esile
Share
Copy
Want to have your highlights saved across all your devices? Sign up or sign in
Copyright © 2021 Bangladesh Bible Society