Matius 4
4
Rajo Sitatn moncubo'i oca' Yesus bodosa
(4:1-11)
(Mrk. 1:12-13; Luk. 4:1-13)
1Lopas nantai, Roh Allah moirikan Yesus ko padakng pasir inyo langunt oca' dicubo'i Rajo Sitatn. 2Di su'utn, Yesus bopuaso somanah ompat puluh ari, ompat puluh malapm. Koponsuahannyo Sio mooso kolaparan. 3Ongko Rajo Sitatn, tukakng tumbukan nantai, datakng ko Yesus. Rajo Sitatn bopandir ko Sio, “Aman Duatn bondar-bondar Ana' Allah,#4:3: Ana' Allah = Dalapm ayat ni'in, sotilah husus pakai' Yesus doi' Mazmur 2:7-9, bukainyo umum pakai' urakng Kristen sobagai boko ana' Allah. pulahbo batu ni'in monjadi roti.”
4Apo Yesus monimbas, “Ado pomandiran Allah inyo ditulis dalapm Buku Suci: Monsio hidup bukainyo bayo doi' pomakatn apo doi' pomandiran Allah jam.”#4:4: Doi' buku Ulangan 8:3
5Lopas nantai Rajo Sitatn moirikan Yesus ko kota Yerusalem inyo suci nantai. Io monyiuh Yesus bodiritn di tompat inyo kotakan tinggi di pucu' hatap Rumah Allah. 6Io bopandir ko Yesus, “Aman Duatn bondar-bondar Ana' Allah, molansakngcam doi' si'itn ko babah!#4:6: Biasonyo ado banya' urakng inyo bokumpul di tongahlamanan Rumah Allah pakai' bodoa huatan moonji'i posombahan. Rajo Sitatn honda' oca' Yesus bodosa agatn moncubo'i kosotiaan Allah. Rajo Sitatn honda' nantai tojadi di hadapan urakng banya' nantai. Apo, Yesus kinyo molabuhan la'apo pan inyo di kohonda'i Rajo Sitatn. Obai ado pomandiran Allah inyo ditulis dalapm Buku Suci, ‘Allah paca'an monyiuh boko molekat-Nyo molinduki Duatn. Sia' paca'an monantaian jari sia' oca' kaki Duatn co moninggakng batu!’ ”#4:6: Doi' buku Mazmur 91:9-12
7Apo Yesus bopandir ko Rajo Sitatn, “Ado jam pomandiran Allah inyo ditulis dalapm Buku Suci, ‘Jangan moncubo'i Tuhatn, Allah kolai.’ ”#4:7: Doi' buku Ulangan 6:16
8Lopas nian Rajo Sitatn moirikan Yesus botula' ko pucu' bukit inyo kotakan tinggi. Rajo Sitatn monunju'an ko Sio somuo koraja'an di dunia agatn somuo kodampuannyo. 9Kato Rajo Sitatn ko Yesus, “Aku paca'an moonju' somuo ni'in aman Duatn monyombah aku.”
10Apo Yesus bopandir ko io, “Oi Sitatn, jouhancam diri kolai doi' Aku! Obai, ado pomandiran Allah inyo ditulis dalapm Buku Suci, Sombahcam Tuhatn Allah kolai. Layati Sio ja'am.”#4:10: Doi' buku Ulangan 6:13-15
11Pas, Rajo Sitatn moninggalan Yesus. Ongko boko molekat datakng molayati Sio.
Yesus mula'i polayatan-Nyo di doerah Galilea
(4:12-17)
(Mrk. 1:14-15; Luk. 4:14-15)
12Lopas nantai, Yesus mondinga' obai Yohanes dimansu'an ko dalapm ponjara. Jadi, Yesus moninggalan doerah Yudea ongko bobali' ko doerah Galilea. 13Apo, Sio co bodiapm di kota Nazaret agi'. Sio pindah ko kota Kapernaum di pinggir danau Galilea di doerah Zebulon ongko Naftali. 14Kojadian nantai tojadi oca' pomandiran Allah monjadi nyata. Timpu joman komai nabi Yesaya monulis pomandiran Allah nantai dinga' ni'innan bunyinyo:
15“Doerah Zebulon, doerah Naftali, jalatn inyo monuju ko lout, doerah soborakng sungai Yordan, Galilea, doerah boko banso inyo bukainyo banso Yahudi.
16Banso inyo hidup dalapm potakng,
udah moniant Torakng inyo bosar huatan
torakng udah timbul pakai' sia' inyo hidup
dalapm bayakng-bayakng komatian.” #4:16: Doi' buku nabi Yesaya 8:23–9:1
17Doi' watu nantai, Yesus mula'i momboritoan. Kato Sio, “Koraja'an Sorugo udah dampikam! Jadi, botongga'cam kaitn bulah dosa ongko monyonangan Allah.”
Yesus moningkau ompat nolayatn pakai' monjadi boko murid-Nyo inyo potamo
(4:18-22)
(Mrk. 1:16-20; Luk. 5:1-11)
18Timpu Yesus tongahan bojalatn di pantai Danau Galilea, Sio moniant duo urakng nolayatn, ia'an Simon (inyo jam ditingkau Petrus) ongko Andreas, somadikannyo. Sia' tongahan monjalo ikatn di danau. 19Kato Yesus ko sia', “Huncapm monjadi pongikut Aku. Kaitn bogoyap ikatn, apo Aku paca'an moutus kaitn pakai' bogoyap urakng inyo monjadi murid-Ku.”#4:19: Torjomahan ni'in pakai ponjolasan pakai' kiasan ‘monjalo monsio’. 20Watu nantai jam, Simon ongko Andreas lansukng moninggalan jalo sia' lalu tuyut Yesus.
21Yesus bojalatn torus lalu moniant duo urakng somadikan bukainyo agi', ia'an Yakobus ongko Yohanes. Sia' tongahan monambali jalo sia' di dalapm porohu bosamo agatn Bopai sia' inyo bodamo Zebedeus. Yesus moningkau Yakobus ongko Yohanes pakai' monjadi pongikut Sio. 22Watu nantai jam, sia' duo lansukng moninggalan porohu ongko Bopai sia', lalu tuyut Yesus.
Yesus mongajar, momboritoan Kabar Boi' huatan monyamani urakng banya'#4:23: Boboropo ayat ni'in sama'an pombukaan pakai' pasal 5–9. Obai, Yesus mongajar di pasal 5–7 huatan monyamani boko urakng di pasal 8–9.
(4:23-25)
(Luk. 6:17-19)
23Yesus bokolilikng di somuo doerah Galilea. Sio mongajar di boko rumah sombayakng urakng Yahudi. Sio momboritoan Kabar Boi' mongona'i Koraja'an Sorugo. Sio jam inyo monyamani somuo urakng inyo sakit ongko lomah. 24Borito mongona'i Sio tosebar doi' doerah Galilea sampai ko somuo doerah Siria. Jadi banya' urakng datakng ko Sio. Sia' mombaba' boko urakng inyo boponyakit huatan kosusahan. Ado inyo korasu'an boko roh jahat. Ado inyo gogilo babi. Ado inyo lumpuh. Yesus monyamani sia'. 25Jadi, banya' urakng tuyut Sio. Ado inyo boasal doi' doerah Galilea, doi' doerah sopuluh kota inyo disobut Dekapolis, doi' doerah Yudea, tomansu' kota Yerusalem, agatn doi' doerah soborakng sungai Yordan.
Currently Selected:
Matius 4: TBDS
Tõsta esile
Share
Copy
Want to have your highlights saved across all your devices? Sign up or sign in