Yohanes 4
4
Siku' botina' doi' Samaria tohu, obai Yesus Rajo Inyo Dijanjian Allah
(4:1-42)
1Ado boko pomimpitn agama Yahudi doi' kolompok Farisi. Sia' mondinga' kabar obai urakng banya' monjadi murid Yesus lalu dibaptis-Nyo, lobih banya' daripado inyo dibaptis Yohanes. 2(Apo sobondarnyo boko murid Yesus inyo mombaptis urakng, kinyo Yesus mombaptis). 3Watu Yesus mongotohu'i obai boko urakng Farisi mondinga' borito nantai, lalu Sio botula' doi' doerah Yudea nantai lalu botula' ko doerah Galilea.
4 Dalapm pojalatan nantai, Yesus gola' molalu'i doerah Samaria. 5Jadi, Sio datakng ko sobuah kota di Samaria nantai, damonyo Sikhar. Kota nantai kinyo jouh doi' tanah inyo Yakub onju' ko ana'nyo, Yusuf, joman komai. 6Sumur inyo kalo umputn Yakub ado di siatn. Di pojalatan Yesus kotakan kohora'an, jadi Sio dudu' di sisi sumur nantai. Kiro-kiro japm duo bolas tongah ari.
7-8Timpu nantai, ado botina', urakng Samaria, datakng honda' moncou'. Boko murid Yesus udah botula'am ko kota momboli pomakatn. Jadi, Yesus minto ko botina' nantai. Kato-Nyo, “Tulukng onji'i Ku ara'i pakai' minum.”
9Botina' nantai hiratn obai urakng Yahudi kinyo bokoncucu'an agatn urakng Samaria. Kato botina' nantai ko Yesus, “Duatn ni'in urakng Yahudi, apo aku ni'in urakng Samaria! Hibo Duatn minto minum doi' aku?”
10Timbas Yesus, “Kolai bolupm tohu mongona'i poonju' doi' Allah. Sobondarnyo kolai bolupm konal sopo Aku inyo minto minum. Aman kolai tohu boko hal nantai, pasti kolai inyo minto minum ko Aku. Lalu, Aku paca'an moonji'i kolai ara'i kohidupan.”
11Kato botina' nantai, “Bopai, Duatn co nyiant ado poncou'an. Sumur ni'in kotakan dalapm. Doi' mono Duatn dapat ara'i, kohidupan nantai? 12Angki-bayatn koi, Yakub,#4:12: Teks asli, baso Yunani, kinyo bobeda ‘koi’ agatn ‘kito’. Memang Yakub nam angki-bayatn somuo urakng Yahudi tomansu' Yesus. Apo kohonda' botina' nantai kiro honda' momastian obai Yakub nam angki-bayatn urakng Samaria jam. moonju' sumur ni'in ko koi. Timpu joman komai sio, boko poana'annyo, huatan boko hayapm-inguannyo pan minum ara'i doi' sumur ninam. Hibo Bopai bopikir, Bopai lobih pontikng doi' Yakub?”
13Kato Yesus ko botina' nantai, “Sotiap urakng inyo minum ara'i doi' sumur ni'in, io paca'an korahakan agi'. 14Apo sotiap urakng inyo minum ara'i inyo Aku onju' ko io, io co paca'an korahakan agi' somanah-manahnyo. Obai, ara'i inyo paca'an Aku onju' ko io paca'an monjadi ubo mato ara'i di dalapm dirinyo. Ara'i nantai paca'an torus-norus mongalir huatan moonji'inyo hidup somanah-manahnyo.”
15Kato botina' nantai ko Sio, “Aman ubo nian, Bopai, tulukng onji'i ku ara'i nantai, oca' aku co korahakan agi'. Lalu, aku co datakng moncou' ko si'itn agi'.”
16Kato Yesus ko botina' nantai, “Hingkascam, tingkau cam laki kolai baba' ko si'itn.”
17Kato botina' nantai, “Aku co bolaki.”
Kato Yesus ko io, “Bondaram uji kolai nan obai kolai co bolaki. 18Obai, udah lima' kali kolai kawitn saya'. Apotolagi', watu ni'in kolai hidup agatn siku' lolaki inyo kinyo laki kolai. Jadi, memang bondar kato kolai nantai.”
19Kato botina' nantai ko Sio, “Bopai, watu ni'in aku tohu obai Duatn ninam nabi. 20Angki-bayatn koi urakng Samaria monyombah Allah di bukit ninam. Apo kaitn urakng Yahudi bopandir obai somuo urakng gola' monyombah Allah di Yerusalem. Mono inyo bondar?”#4:20: Mungkitn botina' ni'in botakutn ubo ni'in oca' Yesus co molajuan pandirnyo mongona'i caro hidup io inyo salah nantai. DAMO mungkitn botina' nantai mula'i sadar obai Yesus nam Urakng doi' Allah. Jadi, io bondar-bondar honda' tohu pondapat Yesus mongona'i hal nantai.
21Kato Yesus ko io, “Indai, pocayo cam agatn pomandiran-Ku ni'in: Nononyo datakng watunyo urakng paca'an monyombah Allah Bopai di mono ja', bukainyo di bukit ni'in, bukainyo jam di Yerusalem. 22Kaitn urakng Samaria monyombah Allah apo kinyo bondar-bondar mongonal-Nyo.#4:22: Urakng Samaria bayo pocayo obai lima' buku Hukupm Torat nam doi' Allah. Sia' monula' boko buku bukai di Pojanjian manah (samo sama'an boko buku sojarah, boko buku boko nabi, Mazmur, dll.) Obai nantaiam, ado banya' hal inyo sia' co mongonal mongona'i Allah. Koi urakng Yahudi monyombah Sio inyo koi konal. Koi mongonal Sio obai kosolamant'an nantai doi' banso Yahudi. 23Apo nononyo paca'an datakng watunyo, malahan udah datakam watunyo nantai, boko urakng inyo bondar-bondar monyombah Allah Bopai, sia' paca'an monyombah Sio dalapm Roh Allah. Sia' pan paca'an monyombah Bopai sobagai Allah inyo bondar. Obai, Allah Bopai bogoyap boko urakng inyo monyombah Sio agatn caro nantai. 24Allah ni'in Roh. Jadi, somuo urakng inyo monyombah Sio gola' monyombah Sio dalapm Roh-Nyo huatan monyombah Sio sobagai Allah inyo bondar.”
25Kato botina' nantai ko Sio, “Aku tohu Rajo Inyo Dijanjian Allah paca'an datakng, inyo disobut Kristus. Watu Sio datakng, Sio paca'an momadahan la'apo pan ko kito.”
26Kato Yesus ko botina' nantai, “Aku ninam Sio nantai, inyo tongahan bopandir agatn kolai.”
27Timpu nantai, boko murid-Nyo datakam. Sia' hiratn bondar moniant Yesus bopandir agatn siku' botina'. Apo conyiant ado urakng doi' sia' inyo bopandir, “Duatn honda' la'apo?” Kata'an, “Mapo Duatn bopandir agatn botina' nian?”
28Botina' nantai moninggalan poncou'annyo di santai lalu hingkas ko kota. Katonyo ko boko urakng di santai, 29“Mara tiat bo! Ado urakng inyo mongatoan ko aku boko lapopan inyo kalo ku labuhan. Mungkitn kironyo Sio nantai Kristus, Rajo Inyo Dijanjian Allah?” 30Jadi, boko urakng nantai ko luar kota lalu datakng ko Yesus.
31Watu nantai, boko murid Yesus minto oca' Sio makatn. Kato Sia', “Guru, makatn cam.”
32Apo Yesus bopandir ko sia', “Aku ado pomakatn inyo kinyo kaitn kotohu'i.”
33Obai nantai, boko murid-Nyo bopandir siku'-monyiku', “Ku kiro ado urakng inyo udah mombaba' pomakatn pakai' Sio?”
34Kato Yesus ko sia', “Makatan-Ku ia'an: molabuhan kohonda' Allah Bopai inyo moutus Aku, ia'an monjadi'i somuo pokoroja'an inyo Sio onju' ko Aku. 35Kaitn bopandir, ‘Ompat bulatn agi' udah musipm mohanyi.’ Apo, Aku bopandir ko kaitn ni'in: Tiatbo! Boko padi di lakau mansa' am, siap dihanyi! 36Urakng inyo mohanyi, io udah monorima' upahnyo. Io mongumpulan buah pakai' hidup somanah-manahnyo. Lalu, urakng inyo monanam huatan urakng inyo mohanyi sonang bosamo-samo. 37Aku bopandir sama'an nantai obai porbaso ni'in memang bondar: ‘Ado urakng inyo monugal, apo ado urakng bukai inyo bohanyi.’ 38Aku monyiuh kaitn botula' bohanyi di lakau biar pan kaitn co monugal. Udah ado boko urakng bukai inyo bousaha huatan kaitn monorima' kountukan doi' pokoroja'an sia'.”
39Botina' nantai tontai mongisahan mongona'i Yesus ko boko urakng Samaria di kota nantai. Katonyo, “Sio bokisah ko aku boko hal inyo kalo ku labuhan.” Obai pandir botina' nantaiam, banya' doi' sia' pocayo ko Yesus. 40Pas boko urakng Samaria datakng ko Yesus, sia' kotakan muhun oca' Sio diapm agatn sia'. Jadi, Sio bodiapm di santai somanah duo ari. 41Obai pandir Yesus, jadi lobih banya' agi' urakng monjadi pocayo ko Sio. 42Sia' bopandir ko botina' nantai, “Koi siku' udah mondinga' pomandiran Sio. Jadi watu ni'in koi pocayo obai nantai bukainyo obai pomandiran kolai. Koi tohu obai Sio nam bondar-bondar Ponyolamant monsio.”
Yesus monyamani ponyakit ana' pogawai inyo bokorojo di istana
(4:43-54)
(Mat. 8:5-13; Luk. 7:1-10)
43Duo ari lopas nantai, Yesus botula' doi' doerah Samaria nantai monuju ko Galilea. 44Obai, Yesus siku' udah bopandir, “Siku' nabi kinyo dirogo'i di laman-Nyo siku'.” 45Sokomainyo, ado boko urakng Galilea inyo botula' ko kota Yerusalem honda' morayaan Paskah. Watu pogai nantai, sia' moniant boko la'apo inyo Yesus labuhan di santai. Jadi, watu Sio datakng di Galilea, boko urakng monyambut Sio agatn sonang hati.
46Di doerah Galilea nantai, Yesus botula' agi' ko laman Kana, tompat Sio bulah mujisat morubah ara'i monjadi anggur. Di kota bukai, ia'an nantai Kapernaum, ado siku' pogawai inyo bokorojo di istana. Ana' lolakinyo tongahan sakit kuat. 47Pogawai nantai mondinga' obai Yesus udah datakng di doerah Galilea doi' doerah Yudea. Jadi, pas nantai, io borangkat ko Yesus lalu momohon oca' Yesus datakng ko Kapernaum pakai' monyamani ponyakit ana'nyo inyo hampir matiam nantai.
48Kato Yesus ko io, “Kaitn bayo pocayo ko Aku aman kaitn moniant mujisat.”
49“Pogawai istana nantai bopandir ko Yesus, Bopai, copatcam datakng sobolupm ana'ku mati.”
50Kato Yesus ko io nantai, “Pulakngcam. Ana' kolai paca'an hidupmo.” Urakng nantai pocayo agatn pomandiran Yesus. Lalu, io pulakng am.
51Di tongah pojalatan io pulakng, boboropo hulutnnyo datakng ko io. Sia' momadahan obai ana'nyo udah nyamanam am. 52Jadi, io botakutn ko sia', “Japm boropo ana'ku nyamanam tai?” Timbas sia', “Somaman japm satu siakng gorikngnyo nyamanam co io gorikng agi'am.” 53Lalu bopai bobia' nantai toingant obai pas watu japm nantai jam Yesus bopandir ko io nantai, “Ana' kolai paca'an hidupmo.” Jadi, io ongko urakng sorumah agatn io pocayo ko Yesus.
54Jadi, nianam mujisat koduo inyo Yesus pulah di doerah Galilea. Samo sama'an mujisat potamo, Sio bulah mujisat ni'in lopas Sio datakng doi' doerah Yudea.
Currently Selected:
Yohanes 4: TBDS
Tõsta esile
Share
Copy
Want to have your highlights saved across all your devices? Sign up or sign in