Yohanes 2
2
Yesus bulah mujisat morubah ara'i monjadi anggur#2:1: Rasul Yohanes monulis mongona'i tujuh mujisat Yesus doi' pasal 2 sampai pasal 12. (2:1-11 morubah ara'i monjadi anggur, 4:46-54 monyamani ana', 5:1-18 monyamani urakng lumpuh, 6:5-14 moonji'i lima' ribu urakng pomakatn, 6:16-24 bojalatn di pucu' ara'i, 9:1-7 monyamani urakng buto, 11:1-45 mohidupan Lazarus agi'.) Kotujuh mujisat ni'in monjadi tando inyo monunju'an obai Yesus bondar-bondar doi' Allah.
(2:1-11)
1Kotigo arinyo, ado pogai kawitn di laman Kana di propinsi Galilea. Indai Yesus ado di santai. 2Yesus huatan boko murid-Nyo dihundakng jam ko pogai kawitn nantai. 3Watu pogai nantai ija' bolanjut, anggur udah habis. Jadi, indai Yesus bopandir ko Sio, “Sia' kohabisan anggur!”
4Kato Yesus koindainyo, “Indai, Aku cuku campur tangan dalapm urusan nantai. Bolupm datakng watunyo Aku monunju'an kuaso-Ku.”
5Apo indai Yesus bopandir ko boko hulutn di siatn nantai, “Haja' kato labuhan nam la'apo inyo Io padahan ko kaitn.”
6Di santai ado onam buah roga' bosar tompat ara'i, inyo dipulah doi' batu. (Ara'i dalapm boko roga' nantai dipakai, pakai' kopontikan pobasu'an monurut adat urakng Yahudi.) Isi sotiap roga' nantai kiro-kiro [dolapatn puluh sampai soratus duo puluh liter.] 7Yesus bopandir ko boko polayatn nantai, “Isi'i ara'i cam boko roga' nantai bisi-bisi.” Lalu, sia' moisi roga' nantai sampai bisi. 8Lopas jadi nantai, Yesus bopandir ko sia', “Kuti'cam sodikit ara'i nantai ninam lalu baba' ko pomimpitn pogai.” Jadi, sia' molabuhan nantai.
9Pomimpitn pogai nantai mooso'i ara'i inyo udah Yesus ubah monjadi anggur nantai. (Io co tohu doi' mono anggur nantai, apo boko hulutn inyo bogoyap ara'i nantai tohumo.) Pomimpitn pogai nantai moningkau pongantitn lolaki, 10lalu bopandir ko io, “Biasonyo urakng mombagi anggur inyo kotakng boi' lobih doholu. Aman boko tamu' udah tokosiham minum, hoyu' urakng mombagian anggur inyo biaso. Apo kolai monyimpatn anggur inyo kotakng boi' sampai ni'in!”
11Yesus molabuhan mujisat nantai di laman Kana di propinsi Galilea. Nantai inyo potamo doi' somuo tando inyo monunju'an sopo Sio sobondarnyo. Agatn tando nantai, Yesus monunju'an komulia'an-Nyo. Lalu, boko murid-Nyo pocayo ko Sio.
Yesus mousir boko podagakng doi' tongahlamanan Rumah Allah
(2:12-25)
(Mat. 21:12-17; Mrk. 11:15-19; Luk. 19:45-48)
12Lopas jadi nantai, Yesus botula' ko kota Kapernaum bosamo-samo agatn indai-Nyo, boko somadikan-Nyo huatan boko murid-Nyo. Sia' diapm di santai bayo boboropo ari mo. 13Watunyo udah dampikam urakng Yahudi morayaan Paskah.#2:13: Urakng Yahudi moingant joman komai sia' dibebasan doi' hulutn-pacal di Mesir. Allah mohukupm urakng Mesir. Sotiap ana' kojula'an urakng Mesir mati, sampai boko hayapm-inguannyo. Apo urakng Israel disolamant'an. Jadi, Yesus botula' ko kota Yerusalem.
14Di santai, Sio moniant ado boko podagakng di tongahlamanan Rumah Allah! Ado inyo monjual sapi, domba ongko burukng daro. Ado jam boko urakng inyo mohurupan duit inyo dudu' di siatn tai.#2:14: Pasar ni'in momudahan boko urakng inyo datakng doi' jouh pakai' momboli posombahan. Apo pasar nantai soharusnyo ditompatan di tompat bukai. Lopas nantai, sia' gola' mohurupan duit obai bayo ulih momakai duit husus pakai' Rumah Allah. Urakng inyo mohurupan duit nantai hala kinyo jujur jam. 15Jadi, Sio bulah sobuti' pohombat doi' tali lalu mousir somuo sia' nantai doi' Rumah Allah, tomansu' somuo domba ongko sapi sia'. Sio pan botikapm tikapan boko meja inyo dipakai boko urakng inyo mohurupan duit. Jadi, duit sia' dihambur ko mono-mono. 16Sio pan bopandir ko boko urakng inyo monjual burukng daro nantai. Kato-Nyo, “Koluarancam somuo burukng ni'in. Rumah Bopai-Ku Jangan dipulah monjadi rumah tompat bodagakng!” 17Hal nantai bulah boko murid Yesus toingant, pomandiran ni'in inyo totulis di dalapm Buku Suci: “Cinta-Ku pakai' Rumah Duatn, oi Allah moloburan hati-Ku.”#2:17: Pomandiran doi' buku Mazmur 69:10 Ninam pomandiran Rajo Inyo Dijanjian Allah. Rotinyo, Yesus mousir somuo podagakng nantai obai Sio moncintai Rumah Allah. Apo obai porbuatan nantai, ado urakng inyo mula'i bonci'an Sio sampai Ponjadi'nyo bulah hajat pakai' mombunuh Sio.
18 Boko pomimpitn agama Yahudi inyo ado di santai molawatn Yesus. Kato sia', “Butianbo aman Duatn ado hak pakai' molabuhan hal inyo ubo hoyu' Duatn labuhan nantai. Cubo Duatn mombulah mujisat oca' ado tando pakai' koi!”
19Timbas Yesus, “Robahanbo Rumah Allah ni'in. Lalu, dalapm tigo ari, Aku paca'an mombangunnyo agi'!”
20Kato sia' ko Sio, “Rumah Allah ni'in dipulah somanah ompat puluh onam tohutn! Co mungkitn Kolai ulih mombangunnyo agi' dalapm tigo ari?” 21Apo Yesus co bomasud Rumah Allah nantai. Agatn pomandiran ‘Rumah Allah’, masud Sio bukakng-Nyo siku'. 22Boko murid-Nyo toingant pomandiran-Nyo nantai lopas jadi Sio hidup agi' doi' komatian. Jadi, sia' pocayo ko somuo pomandiran inyo totulis di Buku Suci huatan ko somuo pomandiran Yesus.
23Somanah Pogai Paskah nantai dirayoan, Yesus ada'an di Yerusalem. Sio mombulah boko mujisat sobagai tando inyo monunju'an sopo Sio sobondarnyo. Jadi, banya' urakng pocayo ko Sio obai sia' moniant boko mujisat-Nyo nantai. 24Apo Yesus siku' co pocayo agatn sia', obai Sio mongonal somuo monsio. 25Sio co pontikng siku' urakng pakai' momadahannyo ko Sio mongona'i monsio, obai Sio tohu somuo inyo ado di dalapm hati monsio.
Currently Selected:
Yohanes 2: TBDS
Tõsta esile
Share
Copy
Want to have your highlights saved across all your devices? Sign up or sign in