Yohanes 19
19
1Lalu, Pilatus mansu' ongko monyiuh oca' Yesus dihombat. 2Boko projurit nantai moanyam lou' sama'an mahkota duri, lalu mongona'an di pucu' kopala'-Nyo. Sia' mongona'an jubah ungu ko Sio. 3Opat bondar sia' datakng ko Sio, mouyu'-uyu' Sio. Kato sia', “Hidup, Rajo urakng Yahudi!” Lalu, sia' monompilikng mato-muho-Nyo.
4Pilatus koluar agi' doi' istananyo lalu bopandir ko urakng banya' di santai. Katonyo, “Dinga'ancam! Aku mombaba' Urakng ni'in ko luar, ko kaitn. Oca' kaitn tohu obai aku co mondapat'an sobuti' kosalahan pan doi'-Nyo.” 5Ongko, Yesus dibaba' koluar ija' momakai mahkota duri huatan jubah ungu nantai. Kato Pilatus ko sia', “Tiatbo Urakng nantai!” 6Pas boko imam kopala' huatan boko ponjago Rumah Allah moniant Yesus, sia' mondongkakng-mondorah, “Hukupm mati cam Sio di kayu salib! Hukupm mati cam Sio di kayu salib!”
Kato Pilatus ko sia', “Kuti' Io lalu hukupm mati cam di kayu salib. Obai, aku co bodapat sobuti' kosalahan pan doi'-Nyo.”
7Kato boko urakng Yahudi nantai ko io, “Koi ado poraturan agama. Monurut poraturan nantai, Sio gola' dihukupm mati. Obai, Sio mongatoan diri-Nyo Ana' Allah!”
8Pas Pilatus mondinga' pandir nantai, io mongkitn gola' moadili pokaro nantai. 9Jadi, io mansu' agi' ko dalapm istana. Lopas Yesus dibaba' mansu' jam, Pilatus botakutn ko Sio, “Kolai boasal doi' mono?”
Apo Yesus co monimbasi. 10Jadi, Pilatus bopandir ko Sio, “Co Kolai honda' bopandir agatn aku, bai!? Kolai gola' tohu obai aku bokuaso pakai' mombebasan Kolai. Aku pan bokuaso pakai' bulah Kolai dihukupm mati di kayu salib!”
11Timbas Yesus, “Kolai bokuaso tohadap Aku obai Allah inyo moonji'i kolai kuaso nantai. Obai nantai, urakng inyo monyorahan Aku ko kolai, io udah bulah dosa inyo lobih bosar daripado dosa inyo tajahan kolai pulah.”
12Tangga'i nantai, Pilatus honda' molopasan Yesus. Apo, boko urakng Yahudi mondorah, “Urakng ni'in mongatoan diri-Nyo rajo. Sotiap urakng ubo nian molawatn Kaisar, Rajo Roma. Jadi, aman kolai molopasan-Nyo, boroti kolai pan molawatn Kaisar.”
13Pas Pilatus mondinga' pandir nantai, io monyiuh oca' Yesus dibaba' ko luar. Pilatus dudu' di krosi tompat io moadili pokaro inyo tolota' di tompat inyo bodamoan ‘Lantai Batu’. (Damo tompat nantai dalapm baso Ibrani Gabata.) 14Watu nantai hampir japm duo bolas tongah ari watu ari Jumat, ia'an ari urakng Yahudi monyodia'an posiapan pakai' Ari Rayo Paskah. Pilatus bopandir ko boko urakng Yahudi nantai, “Tiatbo! Ninam rajo kaitn!”
15Sia' mondongkakng-mondorah, “Hukupm mati Io! Hukupm mati Io di kayu salib!”
Kato Pilatus ko sia', “Kata'an kaitn honda' aku mohukupm mati rajo kaitn di kayu salib bai?”
Timbas boko imam kopala', “Ongkah Rajo Roma am rajo koi!” 16aKoponsuahannyo Pilatus monyorahan Yesus ko sia' oca' Sio dihukupm mati di kayu salib.
Yesus dipaku di kayu salib
(19:16b-27)
(Mat. 27:32-38; Mrk. 15:21-27; Luk. 23:26, 33-43)
16bJadi, sia' mombaba' Yesus ko luar kota Yerusalem. 17Yesus siku' mo momikul kayu salib-Nyo ko tompat inyo disobut “Tompat Tongkorak”. (Dalapm baso Ibrani tompat nantai disobut “Golgota”.) 18Di santai Sio dipaku di kayu salib. Timpu nantai pan ado duo urakng bukai dipaku di kayu salib, siku' di sopia' kanan ongko siku' di sopia' kiba' Yesus. 19Pilatus udah monyiuh pakai' momasakng tulisan ni'in di dipucu' kayu salib nantai. Bunyinyo, “Ninam Yesus, urakng Nazaret, Rajo urakng Yahudi.” 20Banya' urakng Yahudi inyo mombaco tulisan nantai obai tompat Yesus disaliban dampikng kota mo. Solaitn nantai, pomandiran nantai ditulis dalapm baso Ibrani, baso Latin ongko baso Yunani.
21Boko imam kopala' bopandir ko Pilatus, “Jangan monulis ‘Rajo urakng Yahudi’. Apo tulis ja' ubo ni'in, ‘Urakng ni'in mongatoan Sio ninam Rajo urakng Yahudi.’ ”
22Apo timbas Pilatus, “Inyo udah ku siuh pakai' ditulis, kinyo paca'an ku ubaham!”
23Lopas jadi boko projurit momaku Yesus di kayu salib nantai, sia' monguti' pakai'an-Nyo. Pakai'an nantai dibagi ompat, tiap projurit mondapat sobirat. Sia' pan monguti' jubah-Nyo. Jubah nantai conyiant ado sambukan johitan, apo ditenun doi' pucu' ko babah. 24Boko projurit nantai bopandir ko siku'-monyiku', “Jangan kito birat-birat jubah ni'in. Mara kito boundi pakai' monontuan sopo inyo mondapat'annyo.” Nantai tojadi oca' lapo inyo ditulis di Buku Suci digonapi. Bunyi tulisannyo ni'in:
“Sia' mombagi-bagi pakai'an-Ku.
Sia' boundi pakai' jubah-Ku.”#19:24: Doi' buku Mazmur 22:19
Hal nantai inyo dilabuhan boko projurit.
25Indai Yesus bodiritn di dampikng kayu salib-Nyo. Di santai jam bordiritn somadikan indai-Nyo, Maria (bini Klopas), ongko Maria Magdalena. 26Di dampikng indai Yesus ado murid inyo kotakng dikasihi Yesus. Pas Yesus moniant sia' duo, Sio bopandir ko indai-Nyo, “Indai, anggap ja'am io ana' duatn watu ni'in!” 27Sio jam bopandir ko murid-Nyo nantai, “Watu ni'in Sio monjadi ubo indai kolai!” Soja' doi' nantai, murid-Nyo nantai monorima' indai Yesus diapm di rumahnyo.
Yesus mati
(19:28-37)
(Mat. 27:45-50; Mrk. 15:33-37; Luk. 23:44-46)
28Yesus tohu obai boko pokoroja'an-Nyo udah tuntukam. Obai nantai, Sio bopandir, “Aku korahakan!” Sio mongatoan nantai oca' pomandiran inyo ditulis di Buku Suci digonapi.#19:28: Tiat buku Mazmur 22:16 ongko 69:22.
29Di santai ado tompat boisi ara'i anggur mansapm. Ado projurit inyo moncolupan somacapm sosuatu monyorap ara'i anggur nantai. Ongko di bolit'an ko batakng hisop, lalu dijulukan ko nyao Yesus. 30Lopas Yesus mominum ara'i anggur nantai, Sio bopandir, “Tuntukam!” Lalu, Sio monundu'an kopala'-Nyo, monyorahan kosih-Nyo.
31 Ari nantai ari Jumat, ia'an nantai ari pakai' posiapan sobolupm ari Sabat. Boko pomimpitn urakng Yahudi kinyo honda' boko bangkai nantai totap ado di kayu salib watu ari Sabat, hususnyo obai ari Sabat watu nantai am Ari Rayo Paskah. Jadi, sia' datakng ko gubernur Pilatus mominto oca' kaki boko urakng nantai dipatahan, oca'nyo copat mati. Lalu, boko bangkainyo hoyu' diturutan sobolupm ari Sabat mula'i watu malapm nantai. 32Jadi, boko projuritnyo botula' ko tompat boko urakng inyo dihukupm mati di kayu salib. Sia' momatahan kaki urakng inyo potamo lalu momatahan kaki urakng inyo koduo inyo di hukupm mati di kayu salib timpu samo agatn Yesus.
33Apo, pas sia' sampai ko Yesus, sia' moniant obai Sio udah mati. Jadi, sia' kinyo momatahan kaki-Nyo. 34Apo ado projurit inyo monumba' porut Yesus. Darah agatn ara'i lansukng mongalir koluar. 35(Urakng inyo momboritoan mongona'i nantai udah moniantnyo agatn mato kopala'nyo siku'. Sio tohu kojadian nantai bondar-bondar tojadi. Io momboritoannyo agatn bondar oca' kaitn pan pocayo). 36Nantai tojadi ko bangkai Yesus oca' lapo inyo ditulis di Buku Suci digonapi. Ni'in pomandirannyo: “Conyiant tulakng-Nyo inyo dipatahan.”#19:36: Doi' buku Kel. 12:46, Bil. 9:12, Mzm. 34:21 37Ado jam ditulis di Buku Suci: “Sia' paca'an moniant Sio inyo udah sia' tumba'.”#19:37: Doi' buku Zakharia 12:20. Tiat buku Wahyu 1:7.
Yesus dipasar di dalapm gua
(19:38-42)
(Mat. 27:57-61; Mrk. 15:42-47; Luk. 23:50-56)
38Lopas jadi nantai, Yusuf datakng ko gubernur Pilatus minto ijitn pakai' monurutan bangkai Yesus oca' dipasar. (Yusuf nantai boasal doi' kota Arimatea. Io nantai pan murid Yesus, apo kinyo socaro torakng-torakan, obai io gola' agatn boko pomimpitn Yahudi.) Pilatus moijitan io. Jadi, io botula' momocaki bangkai Yesus. 39Nikodemus pan datakng ko santai. (Io inyo holu datakng monomu'i Yesus watu malapm.)#19:39: Pomandiran di antaro Yesus huatan Nikodemus ado di Yohanes 3:1-2. Nikodemus mombaba' campuran minya' mur ongko minya' garu pakai' bangkai Yesus, sokitar tigo puluh kilu. 40Sia' monguti' bangkai Yesus, lalu momututnyo agatn koitn putih borosih bosamo agatn rorompahan nantai. Nantai sosuai agatn caro urakng Yahudi monyiap'an bangkai pakai' dipasar. 41Dampikng tompat Yesus disaliban ado kobutn. Di dalapm kobutn nantai ado gua tompat pasaran inyo bolupm kalo dipakai. 42Sia' gola' hagar momasar Yesus obai ari Sabat hampikam. Jadi, obai pasaran nantai dampikngmo, ongko sia' momasar Yesus di santaiam.
Currently Selected:
Yohanes 19: TBDS
Tõsta esile
Share
Kopeeri
Want to have your highlights saved across all your devices? Sign up or sign in