Genesa 18
18
O Isako sî šinado pale khă data.
1O Dell sikadi'lo ka le stejarea le Mamre, kana o Avraamo bešelas koa uluw la çărako, ando tatimos le desăsko.#Cap. 13.18; 14.13.
2O Avraamo vazdea le iakha, thai dikhlea: thai dikta kă trin manuši bešenas paša leste ande pînrănde.Kana dikhlea le, prastaia angla lende, kata o uluw la çărako, thai muklea pe ji kai phuw.#Cap. 19.1. Evr. 13.2. 1Pet. 4.9.
3Pala kodea phendea: „Raia, kana sî ma nakhlimos ande Te iakha, na nakh, rudi Tu, paša o robo Tiro.
4Mekma te anau xançî pai, kaste xalavau tumară pînŕă; thai xodinin tala o kašt kadoa.#Cap. 19.2; 43.24.
5Sî te jeau te lau khă kotor manŕo, kaste astarăn koa illo, thai pala kodea daštin te dikhăn tumară dromesa; kă anda kodea nakhăn paša tumaro robo.” „Kăr sar phendean”, phende lekhă on.#Cap. 19.8; 33.10. Kris. 6.18; 13.15; 19.5. Ps. 104.15.
6O Avraamo gălo iekhatar kai Sara ande çăra, thai phendea: „Le iekhatar, trin masurea aŕo diuno, kovlear thai kăr bokolea.”
7Thai o Avraamo prastaia kal gurumnea, lea khă guruviçî tărno thai lašo, thai deales kha slugakă te tirave les iekhatar.
8Pala kodea lea thud thai čill, andekh than le guruvicăsa kai tiradeasas les, thai thodea angla lende. O bešlo angla lende, tala o kašt, thai kanglea lengă ji pune xale.#Cap. 19.3.
9Atunčeara on phende lehkă: „Kai sî ti romni e Sara?” „Itala ande çăra,” phendea o.#Cap. 24.67.
10Iekh anda lende phendea: „Băršeste pe kadoa čiro, amboldava Ma biathadimahko tute; thai dikta kă e Sara ti romni, sî te avelala khă šeav.” E Sara ašunelas koa uluw la çărako, kai sas pala leste.#Vers. 14. Cap. 17.19, 21; 21.2. 2Thag. 4.16. Rom. 9.9.
11O Avraamo thai e Sara sas phură, phurilesas andel bărši; thai e Sara či mai avelas lakă o soroko le juvleango.#Cap. 17.17; 31.35. Rom. 4.19. Evr. 11.11, 12, 19.
12E Sara asaia ande peste, phendindoi: „Akana, kana phurilem, te mai aven ma pofte? Raina muro rom sakadea i o sî phuro.”#Cap. 17.17. Luka 1.18. 1Pet. 3.6.
13O Dell phendea le Avaamohkă: „Anda soste asaia e Sara, phendidoi: „Čeačimasa te mai daštiu te avel ma khă šeau man, kai sîm phuri?”
14Sî vareso prea pharo andoa o Rai? Băršeste pe kadoa čiro, Me amboldaua tute, thai e Sara avela la khă šeau.”#Vers. 10. Cap. 17.21. 2Thag. 4.16. Ier. 32.17. Zax. 8.6. Mat. 3.9; 19.26. Luka 1.37.
15E Sara amboldeala, thai phendea: „Či asaiem.” Kă sas lakă dar. Ta O phendea: „Ba e, asaian.”
O Avraamo rudilpe anda e Sodoma.
16Le manuši kodola uštile te jeantar, thai dikhline karing e Sodoma. O Avraamo, gălotar lença, kaste nigrăle.#Rom. 15.24. 3Ioan 6.
17Atunčeara o Rai phendea: „Te garavau Me le Avraamostar so sî te kărau? …#Ps. 25.14. Amos 3.7. Ioan 15.15.
18Kă o Avraamo arăsăla bidošako khă neamo baro thai zuralo, thai ande leste sî te aven dinedumadămišto sa le neamurea la phuweakă.#Cap. 12.3; 22.18. Kărd. 3.25. Gal. 3.8.
19Kă Me prinjeanau les thai jeanau kă sî te mothol pehkă šeavengă thai lehkă khărăhkă pala leste te nikrăn o Drom le Raiehko, kărindoi so sî orta thai čeačeo, kadea ta o Rai te kărăl le Avraamohkă sa so šinadea lehkă”…#Deut. 4.9, 10; 6.7. Ios. 24.15. Efes. 6.4.
20Thai o Rai phendea: „O ašundimos la došako anda e Sodoma thai e Gomora bari'lo, thai e bezex lendi sî ande čeačimaste but pharo.#Cap. 4.14; 19.13. Iak. 5.4.
21Anda kodea Me uleaua akana te dikhau kana čeačes kărdine kadea buti pala sar ašundileape ji Mande; thai te na avela kadea, sî te jeanau.”#Cap. 11.5. Exod. 3.8. Deut. 8.2; 13.3. Ios. 22.22. Luka 16.15. 2Kor. 11.11.
22Le manuši kodola durile, thai găletar karing e Sodoma. Ta o Avraamo bešelas sa angla O Dell.#Vers. 1. Cap. 19.1.
23O Avraamo pašilo thai phendea: Mudarăsa Tu i le mai lašes andekh than le jungalesa?”#Num. 16.22. 2Sam. 24.17.
24Daštil pe kă ando maškar la četateako te aven panvardeši manuši laše: mudarăsale i len, thai nai te iertis o than kodoa anda le panvardeši le manuši laše, kai sî ando maškar lehko?#Ier. 5.1.
25Te mudarăs koles le lašes andekh than le jungalesa, kadea ka kukoa o lašo te aveles sa kodea soarta sar o jungalo, dur Tutar kadea vareso! Dur Tutar! Kukoa kai krisînil sa e phuw te na kărăl čeačimos?”#Iov 8.2, 3; 34.17. Is. 3.10, 11. Ps. 58.11; 94.2. Rom. 3.6.
26Thai o Rai phendea: „Kana arakhaua ande Sodoma panvardeši manuši laše ando maškar le forohko, ieriua sa o than kodoa anda lende.”#Ier. 5.1. Ezec. 22.30.
27O Avraamo lea pale o divano thai phendea: „Dikta, lem te dau duma le Raiehkă, me kai či sîm numai poši thai ušar.#Luka 18.1.
28Daštil pe kă anda panvardeši manuši laše sî te na aven panji: anda panji, sî te mudarăs Tu sai četatea?” Thai O Dell phendea: „Či xasaraua la, te arakhaua ande leste štarvardeši thai panji manuši laše.”
29O Avraamo dea Lehkă duma mai angle, thai phendea: „Daštil pe kă arakhadeona ande late štarvardeši manuši laše.” Thai o Rai phendea: „nai te xasarauala anda kola štarvardeši.”
30O Avraamo phendea: „Te na, xoleaos Raia, kana mai daua duma. Daštil te arakhadeolape ande late dăsar treanda manuši laše. Thai o Rai phendea: „Nai te xasarau la, te arakhaua ande late treanda manuši laše.”
31O Avraamo phendea: „Dikta, lem te dau duma le Raiehkă. Daštil pe kă arakhadeona ande late dăsar biši manuši laše. Thai o Rai phendea: „Nai te mudarau le, anda biši manuši.”
32O Avraamo phendea: „Te na xoleaus Tu Raia, te mai daua duma numai anda kadea data. Daštilpe te arakhadeon ande leste numai deši manuši laše.” O Rai phendea lehkă: „Nai te mudarau la, anda deši manuši laše.”#Kris. 6.39. Iak. 5.16.
33Pala so isprăvisardea te del duma le Avraamosa, o Rai teleardea. Thai o Avraamo amboldi'lo ka pehko than.
Currently Selected:
Genesa 18: KALD2020
Tõsta esile
Share
Copy
Want to have your highlights saved across all your devices? Sign up or sign in
Bible translated into Kalderash Romani by Luminita Cioaba 2020, from the Cornilescu version of the Romanian Bible. Rights are held by the British and Foreign Bible Society and the Interconfessional Bible Society of Romania.