PUDUT 4
4
Kain Idi Abil
1Idi Adam nepamung dengan awanneh Hawa. Idi ieh mali' idi nenganak aceh anak deléi, ieh ineh Kain. Idi kebalaneh, “Ui pangeh nengalap aceh anak deléi ngaceku Tuhan ngedengan negku.” 2Muci ratnan ineh teh ieh nenganak aceh anak deléi, ieh ineh Abil. Idi Abil ineh mangun ku lun matar dumba, idi Kain ineh mangun ku lun amé' lati'. 3Idi mio-mio kareb udung lak, idi Kain nenguit bua'-bua' luk tinibuneh mangun ku baré kuan Tuhan. 4 Idi Abil pana' nenguit anak-anak dumbaneh luk atun idi nengeret nedeh idi nemaré babpat luk do' kuan Tuhan. Idi Tuhan mawang niat ni Abil ku baréneh. 5Iamo' na Allah mawang niat ni Kain ku baréneh. Idi Kain pelaba useh idi netekedamut. 6Idi kebala Tuhan ni Kain, “Ngudeh iko museh idi tekedamut? 7Kudeng iko nganau' luk do', naké iko merimud? Idi kudeng iko na nganau' luk do', idi sala' ineh ngabang munung tanga' niatmu. Idi sala' ineh sikal ngimet namu, iamo' do' iko metueh rat neneh.”
8 Idi kebala Kain ni Abil, kinanakneh ineh, “Do' kiteh amé' bang pulung.” Idi kareb didueh nalan bang pulung ineh, petacu Kain nenecat ni Abil, idi ieh nengaté neneh.
9Idi kebala Tuhan ni Kain, “Iapehké Abil, kinanakmu ineh?”
Idi kebala Kain, “Na kali'ku. Uiké luk matar kinanakku?”
10 Idi kebala Tuhan, “Ngudehké iko nenganau' kudeng ineh? Arod dara' kinanakmu pindengerKu ngitang ratnan tana', mepad kudeng tang luk sikal ngua'. 11Idi nekini iko ngalap kediman idi uen masut ratnan tana' luk netenganga' miak ngalap dara' kinanakmu ineh ratnan ticu'mu. 12Kareb iko ngasa' tana' ini, kali' rungen ieh na ngeruat bua'; idi iko na ruma', iamo' lawé-lawé mo'.”
13Idi kebala Kain nan Tuhan, “Ukumku ini pelaba berat kuanku. 14Idi nekini Iko masut negku ratnan tana' ini idi rat pa kiungMu teh. Idi ui na ruma' iamo' lawé-lawé mo', idi kareb lemulun papu' negku, kali' rungen ui pitayendeh.”
15Idi kebala Tuhan ni Kain, “Ngacheku ineh idé luk ngaté Kain ineh miak uen ngua' tudu' kua'.” Idi Tuhan nenganau' aceh etu luun Kain, pad ieh na miak pitayen idé-idé luk papu' neneh. 16Idi Kain neburo rat pa kiung Tuhan, idi netudo déi' tana' luk titen Lawé-Lawé, pa busat aco Kabun Eden.
Inul Kain
17Idi Kain nepamung dengan awanneh. Idi awanneh ineh mali'. Idi ieh nenganak aceh anak luk titen Enok. Idi Kain nemudut aceh bawang, idi ieh nenganau' ngadan bawang ineh Enok, maya' ngadan anakneh. 18Idi Enok ineh pana' nenginul Irad, Irad nenginul Mekuyal, Mekuyal nenginul Metusail, idi Metusail nenginul Lamék. 19Idi Lamék nengalap dueh burur ku awanneh. Ngadan sebuleng Ada, idi sebuleng Sila. 20Idi Ada ineh pana' nenginul Yabal, ieh ineh taman amung-amung lemulun luk tudo bang ruma' kibung idi luk ngasa' sapi'. 21Idi ngadan kinanakneh luk isuut Yubal, ieh ineh taman amung-amung lemulun luk nateg giula' idi ngiup suling. 22Idi Sila ineh pana' nenginul Tubal Kain, ieh ineh lun mileh nganau' amung-amung luk metadem ratnan tekaling idi belawan. Idi ngadan kinanak decur Tubal Kain ineh, Naama.
23Idi kebala Lamék kuan dueh awanneh ineh,
“Ada idi Sila, ninger medueh ratnan balaku.
Ui pangeh nengaté seburur anak adi', ngaceku ieh nemepag negku.
24Kudeng Kain uen ngua' tudu' kua',
idi Lamék uen ngua' tudu' ngepulu' kua' tudu'.”
Inul Set
25Idi Adam nepamung dengan awanneh teh, idi awanneh nenganak aceh anak deléi, idi anak ineh titenneh Set, kebalaneh, “Allah pangeh nemaré kuanku aceh inul luk baken, ku libal Abil ngaceku ieh pangeh pinaté Kain ineh.” 26Idi Set ineh pana' nenginul aceh anak deléi luk titenneh Enos. Idi rat kareb ineh lemulun ngimun sembayang idi nawar ngadan Tuhan.
Currently Selected:
PUDUT 4: BLD
Tõsta esile
Share
Copy
Want to have your highlights saved across all your devices? Sign up or sign in
BALA LUK DO' Lun Bawang Bible © The Bible Society of Malaysia 1982, Second Edition 1998.