Marko̱ 9
9
1Kuaxúcha kitsúre̱ Jesuu̱:
—Kju̱a̱xikjain nga yakaꞌa xi tsuba̱ kui fesunjín janda nga be jmá batexuma Namiña Diuu̱.
Kisasenkajo asenꞌen Jesuu̱
(Mt 17.1-13; Lk 9.28-36)
2Xima jun ni̱tjin, Jesuu̱ kiju̱ Pe, Santia kju̱ Jua ngu na̱xi̱ kꞌa, jmá ꞌbendu subá. Ngakjáin kui ja, kisasenkajo asenꞌen Jesuu̱: 3ꞌñu Tiaba kuma ñajñuꞌen ku fatꞌai, ngují ni̱tjin nga nangi sakuña najmi xi ꞌñu tiaba. 4Ku jaskan, ja xi ján kjibakuyáre̱ kube nga itju ngaꞌasen Elía̱ kju̱ Moise nga kjibasenijmijun Jesuu̱.
5Jaskan Pe ku̱i̱cha kitsúre̱ Jesuu̱: «Jí kua Chji̱ne, ¡ku tu ndá nga kꞌui tijñaña! jan niꞌya xka̱ jmeten nindaña: ngu xi tsi, ngu tse̱ꞌe Moise kju̱ ngingu xi tse̱ꞌe Elía̱.»
6ꞌÑuxu inchasakjun ja xi kjibakuyáre̱, tuchuba tsichjaxu Pe tjúnjín kitsikjo najmi xi kitsú.
7Trátse jajen ngu yufi ku kꞌi̱a̱ tsenda jmá tsuba̱. Janda ngajín yufi kinuꞌyare ngu en xi kuaxu: «Kui xi kjíndiꞌna, ku ꞌñu mejénna. Jun tsubáre nga ñaꞌánjnu xki̱.»
8Ngu najmi xi ngutju, tsasexu ngatjun ku ngujíxu xi te̱ tjin. Jesuu̱ tsa kjitjián.
9Nga je kju̱a̱jén na̱xi̱, kitsiꞌin manda Jesuu̱ nga ngují xi tsuyare̱ najmi xi kube janda nga kui, kui kjindiꞌe xu̱ta̱ nga̱sunde, faꞌakun. 10Pe, Santia kju̱ Jua tukuitsa tsuꞌbajínre̱, ta̱nga minengiyaxu mí xi mejénre tsu nga te̱ fueyánire. 11Ku tsinengiyaxure:
—Mí xá kuatsu Jí kua Chji̱ne kju̱a̱kixiꞌe ni̱ngu̱xi̱ nga tjunxu Elía̱ fueꞌe nga kjindiꞌe Diuu̱.
12Kuaxúcha skiengi Jesuu̱:
—Kju̱a̱xikjain kui najmi. Elía̱ tjún fueꞌe kꞌendaya ngieje najmi. Ku kjáinni najmi xi tjichja Xu̱ju̱n Enꞌen Namiña Diuu̱ nga kjindiꞌe xu̱ta̱ nga̱sunde niꞌin kju̱a̱ꞌá ku on kjueyáre. 13Ta̱nga án xi kuaxijnu nga Elía̱ je jiꞌi, ku kjínma xi on kitsikjeyare̱. Je ku̱i̱cha tjitsuya Xu̱ju̱n Enꞌen Namiña Diuu̱.
Jesuu̱ kitsindaya ngu xu̱ta̱ nisti
(Mt 17.14-21; Lk 9.37-43)
14Nga jichú jmá tsuba̱ xu̱ta̱ xi kjibakuyáre̱, kubéxu nga ꞌñu kjín xu̱ta̱ jatjíandaire, ku incha chjasijuxu xu̱ta̱ xi be kju̱a̱kixiꞌe ni̱ngu̱xi̱.
15Nga kuyaxu Jesuu̱, ꞌñu xu tsjua kumáre xu̱ta̱, bejixu tsa kꞌi̱a̱ menkja. Ku tsanga ngieje nga kitsikunda.
16Ku tsinengiyaxu Jesuu̱:
—Mí najmi xi tjinchutíjnu jun
17Ngu xu̱ta̱ xi kꞌi̱a̱ kjisian kuaxu tsure:
—Jí kua Chji̱ne, kju̱a̱ꞌejure kjíndiꞌna, asenꞌen xindajin tjinjín yajo̱ꞌe ku tsjuajire̱ ngande nga tsikichja. 18Nga asenꞌen xindajin basꞌenjín yajo̱ꞌe kjíndiꞌna, mején tꞌa nangi ku xu ꞌbatsjé tsꞌua. Ku janda xi sa sꞌon fane naꞌñu ku sꞌetajá yajo̱ꞌe. Tsinengina ja xi kjibakuyeri nga nga̱tꞌa tsjére kjíndiꞌna asenꞌen xindajin, ta̱nga majín xi.
19Kuaxúcha kitsú Jesuu̱:
—Mí xá nga sꞌejinjínjnu nga̱tꞌaꞌe Namiña Diuu̱. A majínjnu ñaꞌan tsa najmíꞌan. Kjia kumajnu. ¡Ndibajujnuꞌan kui Tjiao̱!
20Tjeꞌñu tsangijure. Ku asenꞌen xindajin nga kube Jesuu̱, tuxi ꞌñu kitsikjatse yajo̱ꞌe tsakjin. Tsejen tꞌanangi kui tsakjin ku xu itsjé tsꞌua.
21Ku Jesuu̱ tsinengiyare̱ namiꞌen tsakjin:
—Kjia ndá ku̱i̱cha kumáre.
Ku̱a̱cha skengi namiꞌen:
—Janda nga chubachi. 22Janda kui ni̱tjin, asenꞌen xindajin mejénre tsikꞌien, ku nganjín ndiꞌi tsikjaꞌajín kútsa ngajín ndijua. Ngu kju̱a̱ndá, Tiꞌin ngu ngaꞌñu nga tisinjínjni. ¡Tichatꞌejni jí!
23Ku tsinengiyaxu Jesuu̱:
—A sꞌejínri Namiña Diuu̱. Nga̱tꞌa xi sꞌejínre nga̱tꞌaꞌe kui, ngieje najmi nga kuma.
24Trátse skindaya namiꞌen tsakjin:
—Jun, sꞌejínña Namiña Diuu̱. ¡Tisijínna tuxi ndá ngasꞌenjínna nga̱tꞌaꞌe kui!
25Nga kube Jesuu̱ nga ꞌñu kjín xu̱ta̱ jatjíandaire, ꞌñu tsichjáju asen xabaꞌe̱ xindajin ku ku̱i̱cha kitsúre̱:
—Asen xaba xi baꞌijíri ngande nga chja̱ kui tsakjin, ¡tsiꞌinre manda nga bitjui ku ngingu jí ni̱tjin bitjasꞌejínri!
26Ku skindaya asen xabaꞌe̱ xindajin, ku te̱ kitsikꞌenyani kui tsakjin. Jaskan itju ku matsikꞌienma. Kjín xu̱ta̱ xi kuaxu: «¡Je kitsikꞌien!» 27Ta̱nga Jesuu̱ skabe tsja kui tsakjin nga kitsikisitjen.
28Nga je kungixun, nga tsꞌutjíni niꞌyaꞌe Jesuu̱, ku ja xi kjibakuyáre̱ tꞌaxin kiju̱ tsuba̱ ku tsinengiyare̱:
—Mí xá nga kumajínjni kiꞌnatsje asenꞌen xindajin.
29Ku̱a̱cha kitsúre̱ Jesuu̱:
—Kjiátse bitju kui tku̱ya asen xabaꞌe̱ xindajin nga betsꞌuare Namiña Diuu̱.
Jesuu̱ tsuya xima jó ndiya nga nikꞌen
(Mt 17.22-23; Lk 9.43-45)
30Jesuu̱ kju̱ ja xi kjibakuyáre̱ itju kui ngande, ku nangi Ngalilea̱ kijí. Nga tjima ndiya, mejínre Jesuu̱ tsa xu̱ta̱ sꞌejínre nga kꞌi̱a̱ kju̱a̱ꞌá, 31nga̱tꞌa tu kuitse mejénre bakuyare ja xi kjibakuyáre̱. Ku̱a̱cha kitsúre̱: «Án, kjindiꞌe xu̱ta̱ nga̱sunde, baꞌíre̱ án ngaya tsja xu̱ta̱ xi mejénre tsikꞌienna, ta̱nga xi ma ján ni̱tjin faꞌakun ñaꞌan.»
32Já xi kjibakuyáre̱ Jesuu̱ makjínjínre najmi xi tjiꞌmire, ta̱nga tsakjunxu nga minengiyare̱.
ꞌYá xi ꞌñu chjiꞌe
(Mt 18.1-5; Lk 9.46-48)
33Jesuu̱ kju̱ ja xi kjibakuyáre̱ jichú nangi Kafarnau̱n. Nga je tsuba̱ ngaya niꞌya, kui tsinengiyare̱: «Mí najmi xi tjinukju̱a̱jnu nga ndibajnu ndiya.»
34Já xi kjibakuyáre̱ ngují en chja̱, nga̱tꞌa incha tsiti ꞌyá xi ꞌñu chjiꞌere̱ nga ngieje.
35Ku jaskan Jesuu̱ yaxile kisꞌejñasun, tsichjáre̱ xi te̱ jó ja kjibakuyáre̱ ku ku̱i̱cha kitsúre̱: «Tsa tjin xi mejénre nga ꞌñu machjeꞌe, tsubáre nga kjabe ngande xi kjuetku ku baseñajun ngiejere xu̱ta̱ xi ngisa.»
36Jaskan tsichjáre̱ ngu tichi ku kitsikasen ngakjáin jmá tsuba̱ ngieje. Ku tsakꞌa nga skabe ku ku̱i̱cha kitsúre̱: 37«Tsa jun chjabejnu ngu tichi xuku xikꞌui, tjini mejenjnuꞌan. Kutsa nimejenjnuꞌan, tekuácha mejenjnu Namiña Diuu̱, nga̱tꞌa kui xi kitsingiyáni.»
Xu̱ta̱ xi kijí kju̱a̱ndáꞌe̱ Jesuu̱
(Mt 10.42; Lk 9.49-50)
38Jua, ngu xi te̱ jó xu̱ta̱ꞌe xi kjibakuyáre̱, ku̱i̱cha kitsúre̱ Jesuu̱:
—Jí kua Chji̱ne, kuyani ngu xu̱ta̱ xi tsichjen jínri nga ꞌbatsjé asenꞌen xindajin ngajín yajo̱ꞌe xu̱ta̱, ta̱nga jín kua kiꞌmijni ngatu̱ kuajícha ngatsiꞌin, nga̱tꞌa kuiji tjejúnjni.
39Ta̱nga ku̱i̱cha kitsú Jesuu̱:
—Ngatu ꞌbechjajíjnu, nga̱tꞌa ngují xi kuichjaꞌónna nga je tsitkire xu̱ta̱ ndatsa jínꞌna tsichjen. 40Tsa tjin xi chꞌojíre ñá, kju̱a̱xikjain nga kjifue kju̱a̱ndaña.
41»Kju̱a̱xikjain nga tsjuáre kju̱a̱ndá Namiña Diuu̱ xi tsjuájnu ngu baso ndijua nga̱tꞌa xu̱ta̱ꞌna jun.
Najmi xaba xi mare̱ kutꞌakakunña
(Mt 18.6-9; Lk 17.1-2)
42»Tsanga tjin xi ku̱i̱cha xi tjimatjingina tsa sꞌejinjínre nga̱tꞌaꞌna, tusá ꞌbetaꞌñu ngisin ngu ndia̱jo tsé ku nikjaꞌajín ndachakun.
43-44»Tsa najmi xi ꞌnijín ndsaji ku tsikjínri nga̱tꞌaꞌe Namiña Diuu̱, tusá tichakjai. Tusá chan tjin nga ngútse ndsaña mijñajunña, tukꞌuajíre nga ngiajo ndsaña nga nikjaꞌajín ngakꞌien, jma nga ngují ni̱tjin tsꞌao ndiꞌi.
45-46»Tsa tjin najmi xi tsjairi ku niꞌinji xki̱ Namiña Diuu̱, tusá tichjakjai. Tusá chan tjin nga ngútse tsjaiña mijñajunña, tukꞌuajíre nga ngiajo tsjaiña nga nikjaꞌajínña ngakꞌien.
47»Tsa tjin najmi xi be xkuji ku tsikjínri Namiña Diuu̱, tusá ꞌnatsje. Tusá chan tjin nga ngútse xkunña bitjasꞌen jmá batexuma Namiña Diuu̱, tukꞌuajíre nga ngiajo xkunña nga nikjaꞌajínña ngaya ngakꞌien, 48jma nga tjin nchubi xi ngují ni̱tjin fesun, ku jma nga ngují ni̱tjin tsꞌao ndiꞌi.
49»Namiña Diuu̱ xi tsitsjeña ngiejeña xukúcha ñaꞌan nitsjeña ngu najmi nga minchaña na̱xa̱ kútsa ndiꞌi nichjenña. 50ꞌÑu ndá na̱xa̱. Ta̱nga tsa chjubaꞌare xi ndia, kúcha ñaꞌánjnu jun nga baꞌinire sinjénꞌen. Kui kju̱a̱, xukúcha ndá na̱xa̱ tiꞌánjnu: najmi xi ndá tiaꞌánjnu ku chꞌan tijñanjnu ngieje xu̱ta̱.
Currently Selected:
Marko̱ 9: MZI
Tõsta esile
Share
Copy
Want to have your highlights saved across all your devices? Sign up or sign in
México © Sociedad Bíblica de México, A.C. AÑO