Marko̱ 6
6
Ku̱i̱cha ikuya Jesuu̱ ngande Nasare
(Mt 13.53-58; Lk 4.16-30)
1Ku jaskan Nasare kijí Jesuu̱, kꞌi̱a̱ ngande xi tse̱ꞌe, ku tsuꞌbájo̱ ja xi kjibakuyáre̱.
2Nga jichú ni̱tjin xubato, Jesuu̱ tsaꞌángire̱ nga ikuya ni̱ngu̱xi̱. Tukuaxu mare̱ ngieje xu̱ta̱ nga kitꞌere:
—Jmá tu ndá ikuya najmi kui xta̱. Má tu itsjére kju̱a̱kitakun xi tsuya. Jmá tu ꞌbatsjé ngaꞌñu xi tjínre nga tsindaya xu̱ta̱. 3-4A mitsa kui xi chjine ya, kjindiꞌe chjun Maria̱ ku tsꞌe̱ ma Santia, Kuse, Juda̱ kju̱ ꞌmí Ximo. A mitsa kjáin nga kui nga̱nde tsuba̱ ndichja.
Ku kju̱a̱sixu mejénre ꞌbatsjé nga̱tꞌa changinxu kukjínre kui ja. Kuixu kju̱a̱, ku̱i̱cha kitsúre̱ Jesuu̱:
—Kui xi tsuya tetjun Enꞌen Namiña Diuu̱ tujmáni nisꞌejínre ku tujmáni nangi chjabe, tukꞌuajíre nga ngandeꞌe̱, kútsa xu̱ta̱ xi tse̱ꞌe kutsa xi tsuba̱ niꞌyaꞌe.
5Ku tsja basúnre xu̱ta̱ xi chiꞌínre, Jesuu̱ kitsindaya yakaꞌa xi tsuba̱; ta̱nga ngují najmi te̱ kuma xi kitsiꞌin, 6ꞌñuxu kua kumáre nga̱tꞌa ngují xu̱ta̱ xi kisꞌejínre nga̱tꞌaꞌe kui.
Jesuu̱ kitsingiya xi tejó ja xi kjibakuyáre̱
(Mt 10.5-15; Lk 9.1-6)
Jesuu̱ kjifué ngieje nga̱nde xi tiña nga kjibakuyare xu̱ta̱ Enꞌen Namiña Diuu̱. 7ꞌYétku xi tejó ja xi kjibakuyáre̱ ku jó jó kitsingiya. Kitsjuáre̱ ngaꞌñu nga ꞌbatsjé asen xabaꞌe̱ xindajin ngajín yajo̱ꞌe xu̱ta̱, 8ku tekuácha kitsiꞌínre manda:
«Chꞌájnu ngu yanise̱ tse̱ꞌe ndiya, ta̱nga chꞌajíjnu najmi xi chine ku tsa xi mentꞌa, kútsa tón. 9Tjiuxínde tjayajnu, ku ꞌñujín kjín najñu chꞌájnu. 10Nga bitjasꞌenjnu ngu na̱xi̱nanda, ngútse niꞌya tijñanjnu janda nga bitjujnu kui ngande. 11Tsa tjin ngande jma mejínre kjabejnu ku tꞌejnu, titjújnu ku tꞌetsunenjnu chajoꞌe tsjaíjnu. Ngatubé nga ndájín kitsiꞌin nga tsitꞌejí.»
12Ku itjuxu kui ngande ja xi kjibakuyáre̱ Jesuu̱, ku ku̱i̱xu kitsúre̱ xu̱ta̱ nga ngatꞌendu kju̱a̱xaba, ku ngakjabeni ndiyáꞌe̱ Namiña Diuu̱. 13Tekuácha kjín asen xabaꞌe̱ xindajin itsjé ku kjín xu̱ta̱ kitsindaya xi ꞌyejun iseti oliba̱.
Kuixucha kꞌien Jua xi Batenda
(Mt 14.1-12; Lk 9.7-9)
14ꞌÑuxu ndá yajín Jesuu̱ ku janda xu̱ta̱ xá Erode̱ Antipa̱ kitꞌe nga̱tꞌaꞌe kui. Tjínxu xi tsu nga Jua xi Batenda ꞌmí Jesuu̱, te̱ jiyanire ku kjín xu̱ta̱ kitsindaya. 15Tjínxu xi tsu nga Elía̱ ꞌmí, kútsa xu̱ta̱ xi kitsuya Enꞌen Namiña Diuu̱ xi tsé nu kisꞌendu nga̱sunde.
16Nga kitꞌe xu̱ta̱ xá Erode̱ nga̱tꞌaꞌe Jesuu̱, Kuaxúcha kitsikjo nga kui xi ꞌmí Jua, ku kuaxu kitsú: «Jua xi ꞌmí Jesuu̱. Án kitsiꞌinꞌan manda nga ichasin tku̱, ta̱nga te̱ jiyanire.»
17-19Kuaxúcha kuma nga Erode̱ Antipa̱ ixantsjaju chjun Erodia̱, chjunꞌen tsꞌe̱ xi ꞌmí Filipo̱, nga̱tꞌaꞌe ꞌñu tsichjáju Jua, kuaxu kitsúre̱: «Najmíri ngande nga chjunꞌen tsꞌejí mijniji.»
Ku kitsitire̱ yajo̱ꞌe Erodia̱, ku ꞌñu tsé tsangitsjaire kúcha nga tsikꞌien Jua. Ta̱nga Erode̱ kitsiꞌin manda nga chjabe ku basenꞌñu nduya. 20Ta̱nga Erode̱ tsakjúnre Jua ku basenjun, nga̱tꞌa be nga naxu ku tsjé tsuꞌba Jua. Ku janda bejí jmi xi tsiꞌin Erode̱ nga tꞌere Jua, tekui xi chan baseñajúnre.
21Ni̱tjin nga tsasꞌen nu, xu̱ta̱ xá Erode̱ Antipa̱ ngu sꞌui ꞌñu ꞌyendáya. Kitsuyare̱ xu̱ta̱ xi kꞌa xáꞌe, jun ku jaxá xi ꞌñu chjeꞌe̱ nangi Ngalilea̱. Kꞌiaxu ndá kitsikjo Erodia̱ nga sakure ngande nga tsikꞌien Jua. 22Nga inchakjien, tsakjínꞌen Erodia̱ tsasꞌen niꞌya ku kite̱ ngakjain ngieje xu̱ta̱ xi tsuba̱. ꞌÑuxu tsjua kumáre Erode̱ kúcha kite̱ tsakjín kju̱ ngieje xu̱ta̱ xi tsuba̱, ku kuaxu kitsúre̱ tsakjín xu̱ta̱ xá Erode̱:
—Tu najmi xi mejénri chji̱nengina, ku tsjuáre. 23Ndatsa basen najmi xi tjínna chji̱nengina, kju̱a̱xikjain nga tsjuáre.
24Itjuxu tsakjín jmá kite̱, ku kikasére jmá kitjián Erodia̱, kui Naꞌen, ku tsinengiyare̱:
—Mí xi ndá minengina
ku̱i̱cha kitsúre̱ Erodia̱:
—Chji̱ne̱ngi tku̱ Jua xi Batenda.
25ꞌÑuxu kitsa tsasꞌen tsakjín jmá kite̱ ku kuaxu kitsúre̱ xu̱ta̱ xá Erode̱:
—Tuxi kjatꞌei mejénna nga baꞌena tku̱ Jua xi Batenda ku tiba tꞌeyéna.
26ꞌÑuxu ngi kumáre xu̱ta̱ xá Erode̱, ta̱nga kitsjuáxu kju̱a̱ najmi xi tsinengi tsakjín, nga̱tꞌa je kitsjua enꞌen ngakjáin xu̱ta̱ xi kitsikitꞌe sꞌuiꞌe. 27Tekui ura kitsiꞌínre manda ngu jónꞌe̱n nga ndibajure tku̱ Jua. Ku kijíxu jun ngaya nduya, ku tsatesin tku̱ Jua, 28ku ngu tiba tjiyáre̱ nga kijure tsakjín. Ku jaskan, Naꞌen kitsjuáre̱.
29Nga kisꞌejínre xu̱ta̱ xi ikuyáre Jua najmi xi kuma, kikjaꞌa yajo̱ꞌe Jua ku ya ñajín.
ꞌÑu kjín xu̱ta̱ kitsikjien Jesuu̱
(Mt 14.13-21; Lk 9.10-17; Jua 6.1-14)
30Te̱ kuñajanni ja xi ikuyáre Jesuu̱, ku kitsuya ngieje najmi xi kitsiꞌin. 31Ta̱nga xu kjínma xi fue ku ndiba incha tsiꞌin, ku janda sakujíre ngande nga kjien. Ku jaskan ku̱a̱cha kitsúre̱ Jesuu̱: «Ndíbajnu, tangiña ngu ngande kjin jma nga nikjaya subaña.»
32Kui ku ja xi kjibakuyáre̱ nguxu tsutsu je tsijínre ku ngu ngande kjixu kijí. 33Ta̱nga xu̱ta̱ xi kube nga kijí kitsikjínxure yajo̱ꞌe jmá nga̱tjen kjue. Ku̱a̱cha, ngieje xu̱ta̱ na̱xi̱nanda xi tiña tsuba̱ kui ngande, ku xati jichú ngieje kui xu̱ta̱ nga Jesuu̱ kju̱ ja xi kjibakuyáre̱.
34Nga kju̱a̱jenre tsutsu je Jesuu̱, kube nga kjín xu̱ta̱ kutku ku ón xu skutꞌa, nga̱tꞌa xuku chu tsanga xi najmíre ndia̱ tjima. Ku jaskan xu tsé najmi ikuyáre.
35Nga je ngixun, jichutꞌare ja xi kjibakuyáre̱ Jesuu̱ ku ku̱i̱cha kitsúre̱:
—ꞌÑu kjixu kui ngande, ku je ꞌñu kjimangixun. 36Tingiye xu̱ta̱, tse̱ꞌe xi ngatangitsjai najmi xi chine ngajín ngijña kútsa ngatjai ngande xi tiña tsuba̱.
37Ku̱i̱cha kitsúre̱ Jesuu̱:
—Titjuajnu jun najmi xi chine.
Ku Kuaxúcha skengi ja xi kjibakuyáre̱:
—Majín mindajni ni̱pan tjeꞌñu kjínma xu̱ta̱. ¡Kuire tón xi mejenjni ngu nu machjenjni!
38Kuixucha kitsúre̱ Jesuu̱:
—Tangi chasejnu jun kó ni̱pan tjínjnu.
Ku incha kijíxu, ku ku̱i̱xu tsu nga tsꞌutjíni:
—Kjitjiánña ón ni̱pan kju̱ jó tjio̱.
39Ku kitsiꞌin manda Jesuu̱ nga xki̱ tjiꞌñuꞌen xu̱ta̱ ꞌbendujín ndexichu suse. 40Xi uchan kju̱ xi ichate xu̱ta̱ kisꞌendutku. 41Ku jaskan Jesuu̱ skabe xi ón ni̱pan kju̱ xi jó tjio̱, tsase ngakꞌa ndiu̱jmi ku kitsjuáre̱ kꞌuechji Namiña Diuu̱. Jaskan basenya̱ kitsiꞌin ni̱pan, ku kitsjuáre̱ ja xi kjibakuyáre̱ nga tsikabire ngieje xu̱ta̱; tuku ku̱i̱cha kitsiꞌin nga̱tꞌaꞌe xi jó tjio̱.
42Tuxi ndá tsakjien ngieje xu̱ta̱ janda nga kitsere. 43Ku jaskan ja xi tjibakuyare̱ Jesuu̱ kitsere tejó nisin ni̱pan ku tjio̱ xi tsꞌangi. 44¡Tsꞌatiu ón ꞌmí xu̱ta̱ xi tsakjien ni̱pan ku tjio̱!
Jesuu̱ tsuꞌbasún ngajin ndijua ndachakun
(Mt 14.22-27; Jua 6.16-21)
45Ku kitsiꞌínre manda Jesuu̱ ja xi kjibakuyáre̱ nga mijínre̱ tsutsu je ku faꞌatiu ngunda chincha ku kijí ngande Betsaida̱, ku tꞌande ndijua kisꞌejña nga kitsingiya ngieje xu̱ta̱ xi tjimatjengíre. 46Ku nga kitsingiya xu̱ta̱, na̱xi̱ tsijín nga tsichjatꞌare Namiña Diuu̱.
47Nga je kujñu, ngabasen chincha tsé je tjenjínda tsutsu je, ku tuku jmá nangi kixí tsuꞌba Jesuu̱. 48Jandaxu kꞌi̱a̱ kube xu̱ta̱ xi kjibakuyáre̱ nga ꞌñu niꞌin inchakjendare tsutsu je, Kuaxúcha tjimajín ngajín tjo̱. Nga je ndimaꞌasen, Jesuu̱ kijisunxu ngasun ndijua ndachakun nga kikasere̱ xu̱ta̱ xi kjibakuyáre̱. Ku nga je tiña jichutꞌare, xuku xi kju̱a̱ꞌa ndujúxu kitsiꞌin. 49Nga kubéxu nga tsuꞌbasún ngajín ndijua, kitsakjunxu ja xi kjibakuyáre̱ ku xuku xi senxu tsuyáre̱ ku skindia tkunxu ngieje. 50ꞌÑuxu inchatsakjun, ta̱nga ku̱i̱xucha kitsúre̱ Jesuu̱: «Xu tijñanjnu, nga tu̱ tkunjínjnu. Án xi Jesuu̱ꞌa̱n.»
51Ku tsijínxu Jesuu̱ ngaya tsutsu je, ku tsenda tjo̱. ꞌÑuxu kua kumáre ja xi kjibakuyáre̱. 52Kjijñúnre kju̱a̱kitakunꞌen, nga̱tꞌa kukjínjínre najmi xi kju̱a̱xikjain xi mare̱ tsindayaña nga̱tꞌaꞌe ni̱pan.
Jesuu̱ tsuꞌba nangi Jenesare̱
(Mt 14.34-36)
53Nga je tsꞌatiu ngunda chincha tsé, jichú ngande xi ꞌmí Jenesare̱ ku ꞌyetaꞌñu tsutsu je tꞌande ndijua. 54Nga itju ngaya tsutsu je, tuxi kube xu̱ta̱ nga Jesuu̱ xi kjuichu ku 55tsanga en ngieje kui nangi ku jichúre̱ xu̱ta̱ xi chiꞌin tjínre. Nga tꞌe xu̱ta̱ nga Jesuu̱ tsuꞌba ngu ngande, nachan ya basun xu̱ta̱ xi chiꞌínre ku fajore xu̱ta̱ janda jmá kjitjián kui. 56Tu̱jma nga fue Jesuu̱, tsa na̱xi̱nanda, tsa nginde ngijña, kútsa jmá jó ján niꞌya incha, ngaya ndiya ꞌbendu xu̱ta̱ xi chiꞌínre nga kuyare Jesuu̱. Ku nga kui faꞌa, minengi kju̱a̱ndá xu̱ta̱ xi chiꞌínre nga ma kjíngajun, ndatsa tu nguxtin tku̱ ñajñuꞌen kjingajun. Ku ngieje xu̱ta̱ xi kjíngajun tuxi mandaya.
Currently Selected:
Marko̱ 6: MZI
Tõsta esile
Share
Copy
Want to have your highlights saved across all your devices? Sign up or sign in
México © Sociedad Bíblica de México, A.C. AÑO