Marko̱ 16
16
¡Tjikun Jesuu̱!
(Mt 28.1-10; Lk 24.1-12; Jua 20.1-10)
1Nga jetꞌa nga inchatsikjaya nga̱tꞌaꞌe sꞌui xu̱ta̱ judio̱, Na Lena, Salome̱ ku Na Lena xi na mare̱ Santia tsꞌatse ndifasinjen xi kjuekꞌejún yajo̱ꞌe Jesuu̱. 2Kui nga ni̱tjin ndumingu tajñu, nga sꞌei kuitjútse tsuꞌbi, kijí ngasuntsjuꞌe Jesuu̱. 3-4Nga tjima ngaya ndiya, inchatsure̱ xikjin: «ꞌYáxutse xi skebaꞌa ndia̱jo xi kjiꞌbechja tsjuꞌe Jesuu̱. ¡Tuxi tséma kui ndia̱jo!» Ta̱nga nga tsasére̱ kui ngasuntsjú, kube nga kui ndia̱jo kite kjíndetju̱a̱ji tjitjiu, je xín kjitjián.
5Nga tsasꞌen ku kꞌi̱a̱ kube ngu xta̱ nisti xi najñu tiaba ndujú yajá, xi kjitjián tꞌatsju jma nga kikjañajín Jesuu̱. Tuxi ndá kitsakjún kui yachjín, 6ta̱nga ku̱i̱cha kitsúre̱ kui xta̱ nisti:
«Ngatu tkunjínjnu, Amítsa Jesuu̱ xi chja̱ Nasare tjiminchitsjáijnu, xi kꞌientꞌa kru. Kꞌuiji te̱ kjitjián; je jixꞌajín ngajore̱. Chaséjnu ngande jma nga kikjaña yajo̱ꞌe. 7Ku kjatꞌei, tangijnu ku tꞌinyaa̱jnu ja xi ikuyáre kju̱ Pe nga Ngalilea̱ je kjifai Jesuu̱ nga̱tꞌa mejénre nga kui tjún fichu. Kꞌi̱a̱ menkja xikjin xukúcha kitsú nga kje ꞌméjín.»
8Janda xi inchafatsetkꞌun kui yachjín nga tsanga jma nga kjiꞌi tsjuꞌe Jesuu̱. Ta̱nga ngují xu̱ta̱ kitsuyáre̱ nga̱tꞌa kixinchatkún.
Jesuu̱ ikúre̱ yajo̱ꞌe Na Lena
(Jua 20.11-18)
9Ndumingu Tꞌajñu nga je jixꞌajínngajore̱ Jesuu̱ ikúre̱ yajo̱ꞌe Na Lena. Ni̱tjin xi je jaꞌa, yatu xindajin itsjé Jesuu̱ ngajín yajo̱ꞌe.
10Kꞌiamáre̱ nga inchakjínda ku ngi sindure nga̱tꞌa kꞌien Jesuu̱, jichú kui ku kitsuyáre̱ nga tjikun Jesuu̱. 11Ta̱nga kisꞌejinjínre tsa tjikun Jesuu̱ kútsa kjain nga kube Na Lena.
Nga ikúre̱ Jesuu̱ yajo̱ꞌe jó ja xi ikuyáre
(Lk 24.13-35)
12Jaskánni nga Jesuu̱ ikúre̱ yajo̱ꞌe jó ja xi ikuyáre nga tjima nangi ngijña. 13Ngiajo kui ja xi ikuyáre kitsuyáre̱ xi ngisa, ta̱nga tekuácha kisꞌejinjínre.
Xá xi kjínére tsiꞌin ja xi ikuyáre Jesuu̱
(Mt 28.16-20; Lk 24.36-49; Jua 20.19-23)
14Jaskan nga ikúre̱ yajo̱ꞌe Jesuu̱ xi ngitengu ja xi ikuyáre nga inchakjien. Kitsitiju̱ nga̱tꞌa najmíre ngu kju̱a̱nisꞌejín ku tuxi taja; nga̱tꞌa kuí inchasꞌejínjínre nga kitsuyáre̱ xu̱ta̱ xi je kube nga jixꞌajín ngajore̱, nga tuku tjikun. 15Ku̱i̱cha kitsúre̱ Jesuu̱:
«Tangijnu nga ngieje na̱xi̱nanda xi tjin nga̱sunde, ku ngieje nga̱sunde nga tjakꞌinyájnu xu̱ta̱ én tjatse xi ndá kitsingiya Namiña Diuu̱. 16Xi sꞌejínre nga̱tꞌaꞌna ku batenda yajo̱ꞌe ꞌbangi. Ta̱nga xi sꞌejinjínre nga̱tꞌaꞌna, tekuácha kjabejiꞌan. 17Xi sꞌejínre nga̱tꞌaꞌna ku tsichjen jínꞌna kumaare ñaꞌan najmi xi janda sꞌejínjínña: Kumáre ꞌnatsje xindajin ngajín yajo̱ꞌe xu̱ta̱; kumaare nukju̱a̱ én tjatse xi janda bejí; 18kumare kjabe ye̱, kútsa tki xi tsikꞌienña ꞌbi, ku ngují najmi kumáre.»
Nga tsijín ndiu̱jmi Jesuu̱
(Lk 24.50-53)
19Nga jetꞌa nga tsichjáju ndia̱ña Jesuu̱ ja xi ikuyáre, Namiña Diuu̱ kitsikijín ndiu̱jmi. Ku kꞌi̱a̱ kikꞌejña ngande chakun, nga̱tjen tsja nganda Namiña Diuu̱.
20Kui nga ja xi ikuyáre Jesuu̱ kijí nga kitsuyasún én tjatse xi tjínre kju̱a̱ndá xi chja̱ kju̱a̱texumaꞌe̱n Namiña Diuu̱. Ku Ndia̱ña Jesuu̱ jña kiju̱ ku kui kixinchaju, nga kuchjenre kitsingiyare̱ chu̱ba̱ kúcha tsubáre tsiꞌin, ku ku̱a̱cha kuma nga ikú Namiña Diuu̱, nga ja xi ikuyáre Jesuu̱ xi inchabakú én xi kju̱a̱xikjain. Ku̱a̱cha ngatuma.
Kjaꞌi tku̱ya kúcha nikjetꞌa xu̱ju̱nꞌe̱n Marko̱
9-10Ngiaján yachjín kikasere̱ Pe kju̱ ja xi ngisa xi ikuyáre Jesuu̱ ku kitsuyáre̱ én xi tsitꞌe. Jaskan kitsingiya Jesuu̱ nga ngieje nga̱sunde ja xi ikuyáre, nga ngatjaitsuya én xi ꞌñu chjiꞌere̱ Namiña Diuu̱, xi najmi ni̱tjin nga chaja.
Currently Selected:
Marko̱ 16: MZI
Tõsta esile
Share
Copy
Want to have your highlights saved across all your devices? Sign up or sign in
México © Sociedad Bíblica de México, A.C. AÑO