Mateo̱ 4
4
Jesuu̱ kitsiꞌínre xindajin
(Mr 1.12-13; Lk 4.1-13)
1Jaskan nga Ngayaꞌa̱senꞌen Namiña Diuu̱ kiju̱ Jesuu̱ jan nangi kixí, tuxi ma nga sakúre ngande xindajin tsatuꞌa nga ma tsiꞌin ndsen.
2Nga je xi yachan ni̱tjin nga tjitsikjaꞌa kjindia yajoꞌe Jesuu̱ jan nangi kixí, kjia janda kubajóre̱. 3Ku kjia jichutꞌare xindajin nga mejénre kitsiꞌin ndsen, ku kitsúre̱:
—Tsa kjain nga Kjindiꞌe Namiña Diuu̱ji, tiꞌinri manda kui ndi̱a̱jo̱ nga ni̱pan ngatꞌuya.
4Ku̱i̱cha skengi Jesuu̱:
—Ku̱i̱cha tsú Xu̱ju̱n Enꞌen Namiña Diuu̱:
“Mítsa tu ni̱pantse tjima xu̱ta̱;
tekuácha machjénre nga tꞌeꞌénre
ngieje najmi xi tsú Namiña Diuu̱.”
5Jaskan nga kitsiꞌin xindajin nga kiju̱ Jesuu̱ na̱xi̱nanda xi ꞌmí Jerusalen. Ku kꞌi̱a̱ kitsikijín janda jma ꞌñu kꞌare̱ niꞌya ni̱ngu̱xi̱, 6ku ku̱i̱cha kitsúre̱:
—Tsanga kjain nga Kjindiꞌe Namiña Diuu̱ji, tikjaꞌi yajo̱ri janda nangi, nga̱tꞌa ku̱i̱cha tsú Xu̱ju̱n Enꞌen Namiña Diuu̱:
“Namiña Diuu̱ tsingiya xi incha tsixatꞌare
tuxi baseri.
Kuí xi bakꞌangiri,
tuxi maꞌonjíre̱ saji
ndatsa mentꞌáre ndi̱a̱jo̱.”
7Ku̱i̱cha skengire Jesuu̱:
—Ta̱nga tekuicha tsú Xu̱ju̱n Enꞌen Namiña Diuu̱: “Nga tu̱ ngují ni̱tjin nga Namiña Diuu̱ri mejénri nga che̱n nikenyéi”.
8Ku nga kju̱etꞌa te̱ kitsiꞌínni xindajin nga kiju̱ Jesuu̱ ngu naxi xi tuxi ꞌñu kꞌa. Janda kui na̱xi̱ tuxi cha̱n tsejen ngieje na̱xi̱nanda teya xi tjin nga̱sunde, xi tjínre tao̱n ku sindungatsja ngaꞌñu. 9Ku te̱ tjitsúni xindajin:
—Ngieje kui na̱xi̱nanda teya tsí kumá, tsa basentꞌaina tkuri kútsa án yitkínna.
10Ku̱i̱cha kiskengi Jesuu̱:
—Tꞌáin kꞌui xindajin, nga̱tꞌa ku̱i̱cha tsú Xu̱ju̱n Enꞌen Namiña Diuu̱:
—“Chatkunjnu Namiña Diuu̱ ku tu̱kuitse nuꞌya énjnu”.
11Kui nga kijí xindajin, ku kjínma xi inchatsixatꞌare Namiña Diuu̱ xi jiꞌitsiꞌin xki̱ Jesuu̱.
Tsaꞌangire̱ xáꞌe Jesuu̱
(Mr 1.14-15; Lk 4.14-15)
12Nga tsitꞌe Jesuu̱ nga nduya kjisián Jua xi Batenda, kijí nangi xi chja̱ Ngalilea̱. 13Ta̱nga ngite niꞌyaꞌe̱ jma ꞌmí Nasare̱t kijí, kui nga jmanga ꞌmí Kafarnau̱m kikꞌejña. Kui ngande tꞌandeꞌe Chincha Ngalilea̱ kjitjián. Kꞌi̱a̱ nangiꞌe̱ kuma xu̱ta̱ xi chja̱ Israe, xi kixincha tetjúnre̱ Sabulon kju̱ Netali.
14Ku̱a̱cha kumá nga itjusún Enꞌen Namiña Diuu̱, xukúcha kiski Isaia̱ xu̱ta̱ xi tsuya Enꞌen Namiña Diuu̱:
15«Nuꞌyéi, nangiꞌe̱ Sabulon,
xi tiñá tijniri ndachakún ꞌñu;
nuꞌyéi nangiꞌe̱ Netali,
xi nga̱tjen nga fai tsuꞌbiꞌe ndana Jorda̱n tijni;
Nuꞌyéi ji Ngalilea̱,
nangi xi xín na̱xi̱nanda chja̱.
16Ndatsa ni̱tje̱n tjimajín xu̱ta̱ri,
tekui xi sku̱e̱ ndiꞌi xi ꞌñu.
Ngu ndiꞌi tsitsejenre
xi sindu
ngajin jma kjiꞌñure kjabeyá.»
17Kjia janda tsaꞌangire̱ Jesuu̱ nga ku̱i̱cha kitsúre̱ xu̱ta̱: «Namiña Diuu̱ tangitjengijnu, nga̱tꞌa kui xi je ndiukatexuma kꞌui.»
Jesuu̱ ñujún ja xi kjeꞌinjín jajin
(Mr 1.16-20; Lk 5.1-11; 6.17-19)
18Nga kju̱a̱ꞌá Jesuu̱ tsꞌua Chincha Ngalilea̱, kube Ximo̱ Pe kju̱ Jandre, jó ja xi tsꞌe̱ma xikjin. Kui ma chu̱ba̱ nga inchakjeꞌinjinju̱n naꞌyaꞌe̱, 19tsichjajú Jesuu̱: «Ndibatjengíjnu. Nga ti̱ jmájnu ndubá, tu̱kꞌu̱a̱re nga bakujnu kúcha minchitsjai xu̱ta̱ xi sꞌejínre nga̱tꞌaña.»
20Tekuini chu̱ba̱ Pe ku Jandre ꞌyendu naꞌyaꞌe̱ ku kijitjengíre̱ Jesuu̱.
21Kijí Jesuu̱ nga kjitsuꞌbandái tsꞌua chincha ku kube Santia ku Jua, jó ja xi tekuácha tsꞌema xikjin. Ngiajó kui ja nga naꞌyaꞌe inchaꞌbendá ngaya tsutsu je xi tjimaju̱n, tjiujún namiꞌen xi ꞌmí Sebedeo̱. Jesuu̱, tsichjare̱ ngiajó. 22Tjeꞌñu itjú ngaya tsutsu je, ku kꞌi̱a̱ yeꞌe namiꞌen ku kitjengire Jesuu̱.
23Kisꞌebixi Jesuu̱ ngieje nangi Ngalilea̱. Bakuyare ngaya ni̱ngu̱xi̱ judio̱, jmanga kitsuya én tjatse xi tjínre kju̱a̱nda xi chja̱ jma kjibatexuma Namiña Diuu̱ ku kitsindaya ngieje xu̱ta̱ xi ndáji sindure.
24Tuxi ndá kuyajín Jesuu̱ ngieje nangi xi chja̱ Siria̱. Fichujúre̱ xu̱ta̱ xi on yajoꞌe kju̱ xi ndáji sindúre, ku̱tsa xi xindajin tjimajín yajo̱ꞌe. Tekuácha fichujúre̱ xi fesunya ku̱tsa xi majín fue, xi majín tsikjani yajo̱ꞌe, ku ngieje nga kitsindaya.
25Tuxi kjín xu̱ta̱ xi chja̱ Ngalilea̱, xi chja̱ Judea̱ kju̱ xi chja̱ Ndekapo̱li̱, kisꞌematje̱ngire Jesuu̱. Tekuácha fichutꞌare xu̱ta̱ xi ndiba na̱xi̱nanda ꞌñu Jerusalen kju̱ xi chja̱ nangi xi sindu ngunda xinguá ndana xi ꞌmí Jordan.
Currently Selected:
Mateo̱ 4: MZI
Tõsta esile
Share
Copy
Want to have your highlights saved across all your devices? Sign up or sign in
México © Sociedad Bíblica de México, A.C. AÑO