Mateo̱ 10
10
Xi tejó ja xi ikuyáre̱ Jesuu̱
(Mr 3.13-19; Lk 6.12-16)
1ꞌYetku Jesuu̱ xi tejó ja xi kjibakuyáre̱. Kitsjuáre ngaꞌñu nga ngu ngu, nga ma ꞌbatsjé xindajin ngajín yajo̱ꞌe xu̱ta̱ kju̱ nga ma tsindaya ngieje tku̱ya chiꞌin.
2Xi tejó ja xi kjibakuyare̱ Jesuu̱ xi jajín xu̱ta̱ xi faikakuya enꞌen kitsúre̱. Kui jínꞌen xi sindutꞌa kꞌui: Ximo̱, xi ndá yajín nga Pe ꞌmí kju̱ tsꞌe xi ꞌmí Jandree̱; Santia ku Jua, nistiꞌe̱ Sebedeo̱; 3Lipe, Bartolome̱, Toma, Mateo̱ xi faꞌachji ton xi machjitjai nga nixá, Santia tiꞌe̱ Alfeo̱, Tadeo̱, 4Ximo̱ xi kjantjai nangiꞌe̱ ku Juda̱ Iscariote̱ xi skabe ngatún Jesuu̱.
Kúcha kitsingiya Jesuu̱ xi tejó ja xi faitsuyasún Enꞌen Namiña Diuu̱
(Mr 6.7-13; Lk 9.1-6)
5Kui kjuakixi kitsingiya Jesuu̱ nga kitsikjai xi tejó ja xi kjibakuyáre̱:
«Ngatu̱ mangijíjnu ngande jma nga sindu xu̱ta̱ xi judio̱jí. Ku te̱ mangijnu nangi xi ꞌmí Samari̱a̱. 6Jma sindu xu̱ta̱ israelita̱ tangijnu, nga̱tꞌa kui xi xuku ngutku̱ chu̱tsa̱nga̱ xi kichajá tjima.
7»Nga mangijnu, kui en tixuyájnu: “Je makjichú ni̱tjin nga Namiña Diuu̱ ndiukatexuma”.
8»Tindayájnu xi chiꞌínre̱. Tikjaiyájnu̱ xi je jesún. Tindayájnu xi inchafindu tjiuxinꞌen, ku chjubaꞌajnu xindajin xu̱ta̱. ¡Nga tu̱ chjaꞌachjijíjnu nga ñaꞌánjnu kui kju̱a̱ndá, nga̱tꞌa ngaꞌñu xi kitsjuájnu Namiña Diuu̱ tekuácha ngují ton kisꞌengíjnu!
9»Nga tu̱ najmí ton chꞌajíjnu, 10ku te̱ chꞌajíjnu najmi xi machjénjnu ndiya. Tekuácha ngatu̱ chꞌajíjnu yanise kju̱ kjaꞌi nde, kju̱ kjaꞌi najñu xi chajá xi chajá. Nga̱tꞌa ngieje xu̱ta̱ xi tsixá, tjínre kju̱a̱kixi nga baꞌíre̱ xi chine.
11»Nga fichújnu ngu ngande kútsa ngu na̱xi̱nanda ꞌñu, Tinchitsjáijnu ngu xu̱ta̱ xi sꞌejínjnu nga̱tꞌaꞌe, ku kꞌi̱a̱ niꞌyaꞌe̱ tijñájnu janda nga xín manginijnu. 12Nga bitjasꞌenjnu kui niꞌya, tikundájnu ku titjuájnu kju̱a̱chꞌan ngieje xi tsuba kui niꞌya. 13Tsanga tsubáre nga sakúre kju̱a̱chꞌán, ja sakúre. Ku tsa najmí mí kju̱a̱ nga sakúre, ja sakujíre̱.
14»Tsa tjin ngu niꞌya kútsa ngu na̱xi̱nanda xi tsijaꞌójíjnu, kútsa mejínre tꞌéjnu, titjújnu kui ngande ku tꞌetsunéjnu sajún tuxi nga̱tube nga tjsuajíjnu kúcha kitsikjeyájnu. 15Tsjuájnu énꞌna nga ndiutsitsje kju̱etꞌa Namiña Diuu̱ nga̱sunde, tsꞌatiuꞌe̱ nga tse kju̱a̱niꞌin xi kjueyáre̱, tukꞌuajíre̱ nangi Sodoma̱ ku Ngomorra̱.
Nga kitsuyáre̱ Jesuu̱ ja xi tjitsingiya nga tjínre kju̱a̱niꞌin xá xi tjitsjuáre
16»Tjínre kju̱a̱niꞌin xá xi tetsingiyájnu. Xukútse tsa chutsanga tjiningiyá jmanga tjin naña ngijña. Kui kju̱a̱ nga titkukúnjnu yajo̱jnu ku ndá chaséjnu xuku ye̱, ta̱nga te̱ tiꞌindájnu anima̱jnu xuku ngu tuju.
17»Chúnjnu yajo̱jnu, nga̱tꞌa ngayatsja xu̱ta̱xá tsikasꞌenjnu xu̱ta̱, ku tjin xi ku̱a̱ꞌónjnu ngaya ni̱ngu̱xi̱. 18Nga̱tꞌa án tebakuyájnu, kuaijújnu xu̱ta̱ jma sindu jaxá tetjun xi inchabatexuma, ku jún nukjuajnu ngajoꞌna̱ ngixku̱n kju̱ nga ngieje xu̱ta̱ꞌe.
19»Nga tjin xi tsikasꞌenjnu, ngatu̱ nindusinjínjnu yajo̱jnu mí en xi tsubáre nga nukju̱a̱jnu, ku kúcha ñaꞌan nukju̱a̱jnu, nga̱tꞌa kui chu̱ba̱ Namiña Diuu̱ xi kuitsuyájnu mí en xi bixujnu. 20Jun jin xi nukju̱a̱jnu, Ngaya asenꞌen Namiña Diuu̱ xi ku̱i̱chja ngajojnu.
21»Te̱ ndsijín tsꞌéni kjabe ngatún xikjin. Nga ngu ngu tsikasꞌen xikjin tuxi manga nikjesún. Xi nami tekuini kjine kjindiꞌe, ku tekuini kjindiꞌe kjaju̱n ku tsikꞌen xi namiꞌen. 22¡Ngieje xu̱ta̱ nga̱sunde chꞌao kuasejnu nga̱tꞌa án tebakuyájnu! Ta̱nga tsa jun sꞌejínjnu nga̱tꞌaña janda nga kjuetꞌa, te̱ ánni ꞌbatsjengijnu.
23»Nga xu̱ta̱ xi chja̱ ngu nangi mangatjengíjnu nga̱tꞌa mejénre nga beꞌéjnu, tiyújnu ku kjaꞌi na̱xi̱nanda tangijnu. Kju̱a̱xikjainni, tsjuájnu énꞌna, án Kjindiꞌe xu̱ta̱ nga̱sunde, nga ndibajúniꞌa̱n ngieje ngaꞌñu xi tjínre Namiña Diuu̱, tekjie nga bitjajnu ngieje nangi xi chja̱ Israe.
24»Xi kjibakuya kuijí xi ꞌñu chjiꞌe nga chjine xi kjibakuyáre̱, ku tekuácha xi musu kuijí xi ꞌñu chjiꞌe nga ndia̱ꞌe. 25Najmi xi tsubáre tsiꞌin xi kjibakuya nga ma tsindsiji̱njún yajo̱ꞌe xi kjibakuyare̱. Tsanga tsú xu̱ta̱ nga xindajinꞌa̱n, kui nga, a kjaꞌmi jún nga sꞌeitse tebakuyájnu.
Nga kitsjua Jesuu̱ kju̱a̱texuma
(Lk 12.2-7)
26»Ngatu̱ ngují xu̱ta̱ tkúnjnu. Nga̱tꞌa ngieje najmi xi tjiꞌma tekuixi sakutsjai, ku ngieje najmi xi mejínña nga ya tekuixi fichú ni̱tjin nga matsejen. 27Tsa tjin najmi xi xinjnu jmanga jñú, jun sa nga ni̱tjin tsjuatjin tixuyájnu xu̱ta̱. Tsa en xi tjiꞌma xiyájnu, jun tꞌinya ngiejejnu xu̱ta̱. 28Ngatu̱ tkunjínjnu xu̱ta̱ xi mejénre tsichajá yajo̱jnu, ta̱nga mitsa kui kju̱a̱mijñachún xi tjinjnu. Ngisáni, chatkunjnu Namiña Diuu̱, xi tjínre ngaꞌñu nga tsixubakjínjnu ngaya ngakꞌie̱n.
29»Janda ngu ton chjiꞌeji nga jó nise. Ta̱nga ngují nise ma ꞌme tsa Namiña Diuu̱, xi Namijnu, tsjuá kju̱a̱. 30¡Namiña Diuu̱sa, bé kú tsja̱ tjínre tkujun! 31Kui kju̱a̱, ngatu̱ tkujínjnu. Jun, ꞌñu chjiꞌejnu ngisa nga ngieje nise.
Nga nikjaꞌakja jínꞌen Jesuu̱
(Lk 12.8-9)
32»Tsa bixuyájnu xu̱ta̱ nga án tjimatje̱ngijnu, tekuácha xiyána Namiꞌna nga kju̱a̱xikjain. 33Ta̱nga tsa ꞌmíjnu xu̱ta̱ nga anjín tjimatje̱ngijnu, tekuácha xiyána Namiꞌna, nga anjín tjimatje̱ngijnu.
Nga kitsuyáre̱ Jesuu̱ ja xi kjibakuyáre̱ nga niꞌin tjin ndiya
(Lk 12.51-53; 14.26-27)
34»Ngabixujíjnu tsanga jiꞌiꞌa̱n ku kju̱a̱chꞌán kjuaꞌichꞌána kui nga̱sunde. Kju̱a̱chꞌánjín kjuaꞌichꞌaꞌa̱n, kju̱a̱bixkan ku kju̱a̱si kjuaꞌiju̱ꞌa̱n. 35Jiꞌiꞌa̱n tuxi ma nga te̱ namiꞌénni ngatsichꞌao xi kjindi, xi kjindichju̱n tekuini ngatsichꞌao xi na̱ mare̱, ku xi kja̱nda ngatꞌetꞌáre nachꞌaꞌe. 36Xu̱ta̱ xi ꞌñu ta̱onre jun tekꞌiáni ngaya niꞌyájnu sakujnu.
37»Tsa namijnu kútsa najnu xi nimejénjnu tukꞌuajíre nga án, kútsa kjindi xiꞌínjnu kútsa kjindi yachjínjnu, majín bixujnu tsa án yajajújnu. 38Kutsa chakꞌajíjnu krujnu ku án ꞌbematjengijnu, tekuácha tsaꞌanjín jun. 39Tsa kju̱a̱mijñachunjnu̱tse xi mandusínjnu, tukjuandá nga chajájnu. Ta̱nga tsa tjingujnu nga baꞌíjnu kju̱a̱mijñachunjnu nga̱tꞌaꞌe xáꞌna, kju̱a̱xikjain nga sakujnu kju̱a̱mijñachun.
Nga kitsuya Jesuu̱ kúcha tsjuáre kju̱a̱ndá Namiña Diuu̱ xu̱ta̱
(Mr 9.41)
40»Nga ngu xu̱ta̱ ndá kjabéjnu, ánxi ndá tjikjabena. Ku nga ngu xu̱ta̱ ndá tjikjabena, tekuácha ndá tjikjabé Namiña Diuu̱, kuixi kitsingiyana.
41»Namiña Diuu̱ xi tsjuáre̱ ngu chjii xi ndá kjabe nga niꞌyaꞌe xu̱ta̱ xi tjitsuya Enꞌen Namiña Diuu̱, nga̱tꞌa bé nga chjineꞌenꞌen Namiña Diuu̱ kjitsuꞌba. Tuku kui chjí tsjuáre xuku xi tsiꞌin xi tsuya Enꞌen Namiña Diuu̱.
»Ku tekuácha, Namiña Diuu̱ tsjuáre ngu chjii xi ndá kjabe niꞌyaꞌe ngu xu̱ta̱ xi tjitꞌeꞌénre Namiña Diuu̱. Ku kui chjii ngundsijíntse xuku xi tsjuáre Namiña Diuu̱ xu̱ta̱ xi tꞌeꞌénre ku tsiꞌin najmi xi ndá.
42»Kju̱a̱xikjainni nga chayajíre̱ Namiña Diuu̱ nga tsjuáre̱ ngu chjii xu̱ta̱ xi tsjuáre̱ ndijua xu̱ta̱ xi an tjimatjengina, ndatsa chjiꞌejí ngamaña.»
Currently Selected:
Mateo̱ 10: MZI
Tõsta esile
Share
Copy
Want to have your highlights saved across all your devices? Sign up or sign in
México © Sociedad Bíblica de México, A.C. AÑO