Santia 2
2
Ngatu̱ chjajinjínjnu xu̱ta̱
1Jun kua tsꞌeña ndichjaña, xi sꞌejínjnu nga̱tꞌaꞌe Ndia̱ña Kjesukristo xi tjínre ngaꞌñu, tsubajíre̱ nga yaji̱ntse xu̱ta̱ xi cha̱n ñaꞌánjnu xki̱ ku tjin xi chajín ñaꞌánjnu xki̱. 2Kꞌuejñáña tsanga ngu xu̱ta̱ xi tjínre tón, xi najñu ndá yajá ku tjiyáre tungu tao̱nsiné basꞌen jma nga matkujnu, kútsa tekuini chu̱ba̱ fichu ngu xu̱ta̱ xi ni̱ma̱ tsuꞌba ku najñutu yajá. 3Tsa jun, ndá ñaꞌánjnu xki̱ xi tjínre ku bixujnu: «Jabí, kꞌui jma nga ndá ngande tjinjni», kútsa bixujnu xi ni̱ma̱: «Kꞌi̱a̱ tisín kixi» kútsa bixujnu: «Nangi tijnitꞌái», 4xuku nai xi xaba ꞌnatséjnu yajo̱jnu, xi yajíntse xi chꞌa xki̱ kukuajíre nga xi ngisa.
5Ndá nuꞌyájnu tsꞌeña ndichjaña xi tjona jun: Namiña Diuu̱ jajin xu̱ta̱ xi ni̱ma̱ tjima kui nga̱sunde tuxi ngatsisꞌejin nga̱tꞌaꞌe, ku kui kju̱a̱nisꞌejin xi najmi chji ngatꞌuyare, tuxi sakure ngande chakun jma nga kjibatexuma Namiña Diuu̱, xukucha tsu én xi kitsjuáre xu̱ta̱ nga kuacha tjin kju̱a̱ndá xi sakure xi ngieje anima̱ꞌen nga inchatsimején Namiña Diuu̱. 6Kúcha májnu jun nga jnune jnufejnu ku nichꞌojnu xi ni̱ma̱ tjima. A yajíjnu nga xi tjínre tón xi chꞌo inchatsꞌijúnjnu ku kui xi inchaminchájnu nduya. 7A mitsa yájnu nga xi tjínre tón xi tsaꞌa inchatsure Ndia̱ña.
8Tsa jun nikitjusúnjnu kju̱a̱kitakun, xi chjiꞌe, xi kitsjuáña Namiña Diuu̱, tuxi ndá ñaꞌánjnu. Kuícha tsu kui kju̱a̱kitakun: «Tikjaitsjénjnu nga ngungújnu, tsubáre̱ nga nimejenña xingiña, xukúcha mejenña yajoña.» 9Ta̱nga tsa yajíntse xu̱ta̱ xi ꞌñu tkúnjnu ku kuitse xi ndá ñaꞌánjnu xki̱ ku ndáji ñaꞌánjnu xki̱ xi kjaꞌi, jee tjiminchijnu yajo̱jnu ku tjinitajajnu, mejínjnu nikitjusúnjnu kju̱a̱kixiꞌe Namiña Diuu̱.
10Tsa jun nikitjusunjnu ngieje kju̱a̱kixi ta̱nga tsa ngu xi nikitjusunjínjnu, xikutse tsa ngieje xi tjinikitjusunjínjnu. 11Nga̱tꞌa tuku kui Namiña Diuu̱ xi kitsú: «Ngatu̱ ñaꞌantꞌajíjnu kju̱a̱ xingijún nga je ixantsjajnu», ku tuku kui xi kitsú: «Ngatu̱ nikjesunjínjnu xingijun». Kui kju̱a̱, tsa jí ndá tsutjai nga je jña tijñájnu, ta̱nga tsa xu̱ta̱ tjinikjesín, tekuini tjinri jee nga̱tꞌa itjusunjínri kju̱a̱kixiꞌe Namiña Diuu̱.
12Ni̱tjin nga matsje kju̱a̱, kju̱a̱kixi xi yajá Namiña Diuu̱ kúcha nitsje xi tjínre jee, kui tsichjen nga kusúnre najmi xi tjiñaꞌánña. Kui kju̱a̱, tsubáre̱ nga chusunña najmi xi tjiñaꞌánña, najmi xi tjinukjuáña. 13Nga̱tꞌa Namiña Diuu̱ onjín skutꞌa xi kitsitjoji xikjin. Ta̱nga xi kitsitjo xikjin, ndá kuitju ni̱tjin nga matsje kju̱a̱.
Kju̱a̱nisꞌejín ku nga najmi xi ndá tsubáre̱ ñaꞌan
14Tsꞌeña ndichjaña xi sꞌejínña Kristo̱, tsamí xi chjíꞌe tsa tjin xi tsu nga ndiyáꞌe Namiña Diuu̱ tjima, ku ngují najmi xi ndátjin inchatsiꞌin. Nga kju̱a̱cha ñaꞌan najmi xi bitjungi.
15Tsa tjin tsꞌeña ndichjaña xi ngu ni̱ngu̱xi̱ tjimájnu, xi najmíre najñu, xi najmíre xi chine, 16kútsa baꞌijíri najñu xi fatjikja kju̱ najmi xi chine, tsamí xi chjiꞌe, tsa bixiri «Ndándá tꞌain, chajei najñu ku ndá tichí janda nga tséri» 17tekuácha ma nga̱tꞌaꞌe ndiyáꞌe Namiña Diuu̱: tsamí xi chjiꞌeña, tsa tjibixúña nga ndiyáꞌe Namiña Diuu̱ tjimaña, ku ngují najmi tjiñaꞌánña jma nga tjibakúña nga kju̱a̱xikjain. Ndiya kjabeya xi kuacha ñaꞌan.
18Xi tsu nga ndiyáꞌe Namiña Diuu̱ tjima, ta̱nga ngují najmi xi ndá mare̱ ñaꞌan, ku̱i̱cha xínna: «Jí, tjibixí nga ndiyáꞌe Namiña Diuu̱ kjitsutjai, tjibixi: ánsa najmi xi ndá tetsiꞌinꞌan. Takína tsanga ma nga ndiyáꞌe Namiña Diuu̱ kjitsuꞌbaꞌa̱n bixú ku ngují najmi xi ndá tjiñaꞌanña; ku bakúra án nga ndiyáꞌe Namiña Diuu̱ kjitsuꞌba nga̱tꞌa kju̱a̱ndá tetsiꞌinna xu̱ta̱. 19A sꞌejínri nga ngutséma Namiña Diuu̱. Ndátjin, ta̱nga janda xindajin sꞌejínre nga̱tꞌaꞌe ku fatsetku̱nre. 20Ngatu̱ ndsenjín ꞌnatsjei yajo̱ri. Tsubáre̱ nga nijaꞌói nga tsamí xi chjiꞌere nga sꞌejínna Namiña Diuu̱ bixi, tsa niꞌínji najmi xi ndátjin. 21Xu̱ta̱ changaña xi ꞌmí Abran, kitsjuáre kju̱a̱tsjua Namiña Diuu̱ nga yasun nachan kjindiꞌe xi ꞌmí Isaa̱ ku kju̱a̱tsikꞌen tsakain nga kju̱a̱tsikasꞌenre̱ Namiña Diuu̱. Ku kitsijaꞌo̱ Namiña Diuu̱ Abran nga̱tꞌa kuacha kitsiꞌin. 22Nga kitsisꞌejin Namiña Diuu̱ Abran ikú yajo̱ꞌe nga̱tꞌa tu najmi xi tsinengire ku kitsikjitjusún, ku tusá ndá kisakúre ngaꞌñu».
23Ku̱a̱cha itjusún én xi kjitꞌa Xu̱ju̱n Enꞌen Namiña Diuu̱ jma nga tjitsu: «Kitsisꞌejín Abran én xi kitsjuáre Namiña Diuu̱, kui kju̱a̱ nga kitsijaꞌo̱ Namiña Diuu̱». Ku̱a̱cha kumá nga xu̱ta̱ xi ndá tsaꞌa Namiña Diuu̱ tsꞌuya Abran.
24Je kuyájnu nga tsijaꞌóña Namiña Diuu̱ nga̱tꞌaꞌe najmi xi ñaꞌánña, mitsa ngatu nisꞌejíntseña.
25Ku̱a̱cha kumataꞌin chjun basen xi ꞌmí Raha̱b. Kitsijaꞌo̱ Namiña Diuu̱ nga̱tꞌa ndá itju ngixku̱n, nga kitsjuáre ngande niꞌyaꞌe ku kitsikangaꞌma xu̱ta̱ xi kikaseꞌma na̱xi̱nanda, ku tuku kisasejun nga kjaꞌi ndiya kitsikanga.
26Xukúcha je kꞌien ngu yajo xi najmíre anima̱, tekuácha je kꞌien kju̱a̱nisꞌejin xi tjinña nga̱tꞌaꞌe Namiña Diuu̱ tsanga kju̱jí najmi xi ndátjin tjiñaꞌánña.
Currently Selected:
Santia 2: MZI
Tõsta esile
Share
Copy
Want to have your highlights saved across all your devices? Sign up or sign in
México © Sociedad Bíblica de México, A.C. AÑO