Yoane 12
12
Nter asing Maria mikor mia Yes sari a bonko
1Matu masiampr buso bu rusu ru nkira mu Asamp Ntsampe, Yes kuwiy u Betania irak rawak Lazaro nyiu muaumun ya u kat iwa.
2Ona bamanamps bisima bikokoro, Marta aukubakersi, di Lazaro awar nto a bene bawar nto ante u mes u yinta ri bisima.
3Maria kurab ireng ra rari a bonko, mu mant munono, mu masek mu inang, ya kusing matampi ma Yes, kukanumun nto a punyu siante si ntshue, di sor kuyor to, u kat a mpuru.
4Mwetshi ntshu baronk bante Yuda Iskariot ntshuawar nsariy ante, ya kuror yampe :
5Isin ye ba usariy bonk bune nto birok masanke makuem masat isina kuwek tshumpua a sinta ?
6Ya kuatot mey mas isin tshumpua bo, di isina ya awar muempo, awar nont a kuempe ntshi atshuerk ba birok.
7Di Yes kunor yampe : Mompr iker ya iront sari a bonko isin rusu rumareir mami.
8Isin binu buwar i tshumpua matankua makima, di binu bak war ami matankua makim.
9Basi Yuda ba buiki nter aoka ba ampe, Yes angwa ona, ba kuwiy, ba kebawiya isin na Yes bo, di isin kutar Lazaro ntshu aumun yante kat iwa.
10Bakumu bu bampank bakump bawont kukadjak Lazaro.
11Isin basi Yuda ba buiki bamakobu, uyes Yes isina mey mu Lazaro.
Yes anyingin u Yerusarem nto ruton
12Nyies muna bat ba buiki bawiy rusu ru nianko, nter aok ba ampe, Yes iwiy kuwiy ra Yerusalem.
13Ba kurab mang ma sampa, kuto isina kuamwens nto ante, ba bamabok minor bampe : Hosana ! Ntshu awiya i rukompua ra Kumu, Kumu basi Israer angwar i nianko.
14Yes amon ya muan kabaro, ya kunyangm ruk rante, nko mene mungwak mapunt ampe :
15Muan ngat ntshu a Sion, rek upak bo, rent, Kumu awo amawiy ruk ra muan kabaro.
16Baronk bante uok mey mene buso bo, di nter atonos Yes, keka banta kukan mey mene mawak mapunta isina yante, manta mamamuir.
17Bat bawar nto ante nter aur yante Lazaro kat marompa, nter amangumn yante kat minyiu, bawar binkongot biante.
18Isin kankos awe bat buso buante, isin aok banta aker ya isana rine.
19Bafarisai kutot ba banta bampe : Rent ana burab biye ; Bat bakima bumarabs ampis ante.
Basi Greke bawont kutar Yes
20Basi Greke bamwetsh bawar u kat a bene bawiy bentui isin kuwiromp Ntsampe rusu ru nianko.
21Ba kuwiy ngwa Firipo nsi Betsaida kat a sin a Garirea, ba kunor bampe : Kumu, bitu tshungont kuntor Yes.
22Firipo kuwiy kusuengs Andere, Andere nto Firipo kuwa- suengs Yes.
23Yes kubaror yampe : Itankua rumawiy, Muan a Muot iton kuton.
24Barabara, barabara, minyi rik birori, mpe ru nker ra “blé” #12:24 Ble : ipua ri iyong. rawar rek uwa nter irupis banta kat a man, rinta ruwar ri amet, di mpe rawa, rinta rutshui ntompa sekra sia buiki.
25Ntshu uwont mony muante ikak mudimis, ntshu uber uwont mony muante u kat a bat bene, ya ipawar a munta isin mony usir bo.
26Mpe muot akers minyi ngun, ya irabs ami irak yeruwar minyi, nker ngun muami yeiwar kuwar ake ; mpe muot akers minyi ngun, Tata apampuiminy.
27Kekanko ntem muami mukunyisiri, rutot mpuenyi ? Tata, mpants minyi itankua rine, di isina kankos awiy minyi itankua rine.
28Tata ! Tonos rukompua rawo. Rutot kutou u ruk kutot ampe : Minyi rumarutons rapakarutons ake.
29Tong a bat awara ona, baok rutot rine, kutot bampe : Ikum ra mpur runkuma, bekra bampe : Wandjo ntot nto ante.
30Yes kuror yampe : Rutot risu rek rawiy isina minyi bo, di rungwiy isin binu.
31Ikuak ra bat ba man mene rumawiy kekanko busot bing kumu a man mene kekanko.
32Nto ake minyi nter yeiumu minyi u kat a man, minyi yerupanan bat bakim nto ami.
33Ya atota nkos isin kebayeb iwa yeruwa yante.
34Bat kunsaks bampe : Bitu tshuamaok u kat ibo ra Ntsampe, Kristo yeiwar sera sera ; isin ye inor wene ampe, Muan a Muot bumentes? Muan a Muot yos angwar nake ?
35Yes kubaror yampe : Muer mukawar a binu isin itankua kakek, sampa ana nter ingwar binu a muer, isina muimin yar mubiwat ; isina ntshu sampa u kat a muimin keanyebak mpok ingwe yante.
36Nter ingwar binu a muer, yes ana muer, mene, ya kuwe, ya, yesa ana muer, isina keka binu bawar bana ba muer. Nter aror Yes mey mene, ya kuwe ya kuwaba- suaman.
37Yante amaker bisana bia buiki u mis ma banta, ba unyes ya bo.
38Keka mey matot profete Isay mamakok ampe : Kumu ! nake ayesa rutot ra bitu, rou ra Kumu rasoru ngwa nake ?
39Banta bakeyeb uyes bo isina Isay amakatot ampe :
40Yante amabamp mis ma ba, amanangs mitem mia banta, nkos mis ma banta utarar bo, mitem mia banta uok bo, banta bak sekuo bo, mpe minyi rek babers.
41Isay atot mey mene isina atar yante ruton rante, keka atot ya mey mante.
42Bat banene bamanyes, di banta utot ankon bo, bapakr Bafarisai yar bubabing u mpuru ntshi romp.
43Isin areb ba uwont ruton ra bat urek ra Ntsampe.
44Yes kuwam ankon yampe : Muot ntshu ntshyes minyi, keintshyesak minyi a minyi bo, di yante iyes yone ntshu amatom minyi,
45Ntshu tar minyi, itar yone ntshu amatom minyi.
46Minyi ramawiy u kat a bat nko muer, isin keka ntshu ntshyes minyi, yak kawar kat a muimin bo.
47Mpe muot aoka rutot rami, aber uront, minyi rak ntentes bo isin minyi kerawiy isina kutentes bat ba man bo, di isin kubants bat ba man.
48Ntshu mper minyi, iber ake ruey rami, angwar i butente buante; mey masuengen minyi manta yemuntents rusu ri buso.
49Isina minyi keratot isin miamet bo, di Tata ntshu amatom minyi, yante amapek meye yemutot minyi nto ake yemu- suengen minyi.
50Minyi rumayeb ikin rante rungwak mony usir bo. Mey munor minyi, runtot nko amasuengs Tata a manta. Nter awebes Yes mikor mi baronki bante
Currently Selected:
Yoane 12: EJK2012
Tõsta esile
Share
Copy
Want to have your highlights saved across all your devices? Sign up or sign in
Copyright © 2012, ASAREB, Suisse MiDi BIBLE