Liikë 24
24
Luvulumuku lu Yeesu
(Mat 28.1-10; Mak 16.1-8; Za 20.1-10)
1Mu menë-ngwaali yi cilumbu ci lumiingu, bëcyeetu bisë kweendë ku libuumbë i bisë natë mëfutë më n'fiimbu mo bëbelikë#24.1 23.56.. 2Baawu bisë monë ti limanyi lilëkaangë nkotulu libuumbë balivenjikë ku nteku. 3Baawu bisë kotë, kasi bësye monë ko nyitu yi Fumu Yeesu. 4Bunë baawu bisë ba mu kunyotëkënë, bëbakëlë bwaali bëvwaatë binkutu bilë lesikë bisë bëmonikinë fanë baawu bëba. 5Bo babë mu boomë i bisë butikë mboku mu si, baatu beenë bisë bëkaambë : « Cibilë-mbici beeno luke tombilaangë muutu wuke moonyi mu kati ku baatu bëfwa? 6Naandi wukeeli faafë ko, kasi wavulumukë mu befwa. Tebukaanu moonyi mu maambu manë naandi kulukaambë bo kwabë ntetë ku Ngalilee : 7“Bufwenikini Mwaanë Muutu kuvakulu kuke bisumuci, kubaandu fë kuluusu, i naandi wun'vulumukë cilumbu ci cin'tatu#24.7 9.22; 17.25; 18.32-33..” »
8Baawu bisë kutebukë moonyi mu manë Yeesu kutubë. 9Baawu kubotukë ku libuumbë i bisë ke yendaangë mu ke leelë saangu, ke kuumi m'bunzi mweekë i ke bilaanzi byooso bin'ka. 10Yabë Maali li Magëdaalë, Zaanë, i Maali li mamë Zaakë. Bëcyeetu bën'ka bo babë yaawu, bisë kaambë maambu mo mëmweekë ke mimbunzi. 11Kasi mimbunzi bëbalë ti maambu manë bëcyeetu bëtubë, mabë maambu mëkaambu nteende i baawu bësye më n'vitikë ko. 12Kosuku Pyeelë wusë telëmë i wukumbelëlë ntiinu ku libuumbë. Naandi wusë betëmë i wutalilë tokë biteendë bi milelë yi liinë. Fë mbusë, naandi wuvutukë ku n'zwaandi, i wusë bwa libobo mu maambu manë mëvangënë.
Mu nzilë Emayuusë
(Mak 16.12-13)
13Munë cilumbu beenë, bilaanzi byooli bëlëkwendë ku bwaalë bu Emayuusë. Bwaalë beenë bwabë kwaasu ku zoolë wali li kulyaatë mu kutuukë ku Yelusaleemë. 14Baawu bisë ke bulilaangë sinkuungu mu maambu manë mëvangënë. 15Ntaangu yo baawu bëyetubënaangë, naveekë Yeesu wusë bëbelëmë i ke lyaataangë yaawu. 16Baawu bëm'monë, kasi cin'viipë ci bëkakini mu ku bën'zaabë. 17Yeesu wusë bëkufulë: « Lyaambu mbici beeno lulë mu kubulilë sinkuungu mu nzilë? » Yi cyaali cyooso, baawu bisë sikëmë. 18Wumweekë mu baawu, awu bëlëteelë Kelopaasë, wusë kun'kaambë : « Mu baatu bakë booso bë Yelusaleemë, wo njeeyi wun'ziimbë maambu mavangënë mu bilumbu abi? » 19Naandi wusë bëkufulë: « Maambu mbici? » Baawu bisë n'vutulilë : « Maambu makwisilë Yeesu li Nazaleetë! Naandi wabë m'bici wunenë, wusë leesi lyaawu fë ntwaalë Nzaambi i fëke baatu bakë booso mu mëvaangë i mu ndongulwaandi. 20Bëkuluutu bë singangë-Nzaambi i sifumu siitu sisë n'vakulë mu kun'tabë lufwa i bisë m'baandë fë kuluusu. 21Beeso twabë yi civuufu ti naandi na wufwenikini kuvuuci mboongo Islayeelë. Kasi mu makë mooso omo, mati bubwayi aci cilumbu cin'tatu kutoonë maambu be moomë misë vangënë. 22Mwa ndaambu bëcyeetu bë cinguuku ciitu batutulumisi, lyaawu licyelikë. Baawu bëyendë mu menë-ngwaali ku libuumbë, 23kasi baawu bësye monë ko nyitwaandi. Baawu bëvutukë mu kutuzabisi ti siyaanzi sisë bëmonikinë i bisë bësisiminë ti naandi ke moonyi#24.23 24.1-11.. 24Bayiitu bën'ka bisë kweendë ku libuumbë i bisë ke monë makë mooso mo bëcyeetu bëtubë, kasi naandi, baawu bësye monë kuve. » 25Mu lyalyooli, Yeesu wusë bëkaambë : « Baatu bëkaambu mëlyeelë, beeno mu kuta maanë mpasi mu maambu makë mooso mëtendulë mibici! 26Lisye fwaanë ko ti Kliistu kumonë simpasi simpilë osyo ntetë naandi kukotë mu bumpumu bwaandi#24.26 nkanë kusye podi ko : 9.22; 17.25. ? » 27Fë mbusë, Yeesu wusë bëzimuninë maambu makë mooso bunë mësonëmë, kutoninë mu mëbuuku më Moyiizë tee kulandilë mu mëbuuku më mibici.
28Bunë batuuci belë-belë fë bwaalë kunë baawu bëlëkwendë, Yeesu wusë sya bukë ti naandi wuzolë kuvyookë bwaalë beenë. 29Kasi bisë m'bondililë: « Kalë yiitu, bwiisi bwasiindi i bwiilu bwabelëmi. » Mu lyalyooli, naandi wukotë i wusë kalë yaawu. 30Naandi wukalë yaawu fë meesë, wuboongë limpa i wutoondë Nzaambi. Fë mbusë, naandi wulimukënë i wusë bëvaanë lyaawu. 31Boobo, meeso maawu mësundilë kuzibukë i baawu bisë n'zaabë. Kasi naandi wusë zimbilë fë ntwaalaawu. 32Baawu bëtubënë baveekë yi baveekë : « Nusye monë libaasë kwe buke mbaasu, yilëviikë mitimiitwe bunë naandi wulëtukambilaangë mu nzilë i wulëtuzimuninaangë manë mësonëmë? »
33Mëlengë-lengë baawu bisë telëmë i bëvutukënë ku Yelusaleemë. Baawu bisë zakënë kuumi cilaanzi cimweekë bëdukënë yimunë bayaawu, 34i bakë booso bëlëtubaangë : « Licyelikë, Fumu wavulumukë! Simu wam'monë! » 35I bilaanzi bi byooli yivaandi bisë bëzabikini makë mooso buni mëvangënë mu nzilë i buni baawu bëzabilë Yeesu bunë kwabë kumukënë limpa.
Yeesu wayileesi ke bilaanzi byaandi
(Mat 28.16-20; Mak 16.14-18; Za 20.19-23; Mëv 1.6-8)
36Baawu bulëtubangooso, bunë Yeesu naveekë wuyiyileesi fë meeyaawu i wusë tubë : « N'sikë we bayiinu! » 37Baawu bisë waalë yi boomë, i mu lutekutu, cibilë baawu bëbalë ti bamonë n'kulu. 38Kasi Yeesu wusë bëyufulë : « Cibilë-mbici mitimiinu yeekë yekësë-yekësë? Mu mbici beeno lwekilë yi mëketikini ku kati ku mitimiinwe? 39Monaanu myookwaami i maalu maami : Mati miinu! Nsiimbyaanu i monaanu, cibilë n'kulu wukeeli ko yi n'sunyi i mivesi, tiilyoko mu miinu, bo lum'podi kumweenë. » 40Naandi wusë tubë bikumë obyo i kubëleesi myooko i maalu maandi. 41Bunë baawu bisye be bakooso ko likanë mu kuta lyaanë, bo liyaanji lisë vyokililë i bëtulumukë, naandi wusë bëyufulë : « Lukelyaanu yi cin'viipë ci kulya afa? » 42Baawu bisë kun'vaanë citini ci mbisi ciyoku. 43Naandi wuboongë cyaawu i wusë lya fë meeso maawu. 44Fë mbusë, naandi kubëkaambë : « Bunë yabooso yiinu, tala manë yilukaambë : maambu manë mësonëmë mu cibilë cyaami mu n'kaakë Moyiizë, mu mëbuuku më Mibici, i mu libuuku li Twiimbu mëfwenikini kuvangënë makë mooso. » 45Mu lyalyooli, naandi wusë bëvaanë mëlyeelë më kubakulilë maambu mësonëmë, 46i naandi wusë bëkaambë : « Tala manë bësonikë : Kliistu wufwenikini kumonë simpasi i kuvulumukë mu nkoongë bëfwa fë cilumbu cin'tatu#24.46 Ezy 53; Ose 6.2., 47i bufwenikini kulongilë mu lizinë lyaandi fë mëkaandë makë mooso, mu kutoninë ku Yelusaleemë. Mu kukaambë baatu mu kubalulë sindyatulu#24.47 kubalulë ndyatulu: kubalulë mëvaangë kaambofo kuvilukë. i kutambulë n'leenvu wu mësumu. 48Beeno lweekë mbaanji mu makë mooso ama. 49Miveekë yilufilë likabu linë Tataami wukanyi mu beeno, kalilaanu mu livulë tee beeno lun'walilë mu lutumu lu yilu#24.49 Mëv 1.4-5.. »
Yeesu wanangukë ku yilu
(Mak 16.19-20; Mëv 1.9-11)
50Fë mbusë, Yeesu wusë bënatë ku ngaandë livulë, belë-belë yi Betani#24.50 Mak 11.1., kuunë, i faawu, naandi wusë nangunë myooko i wusë bësakumunë. 51Bunë kwamani kubësakumunë, naandi wusë kabukë yaawu i wusë nangukë ku yilu#24.51 Mëv 1.9.. 52Bilaanzi bisë n'dumisi i bisë vutukënë ku Yelusaleemë, bëwaalë liyaanji linenë. 53Baawu bisë kalilë mu n'zo-Nzaambi i ke dumisyaangë Nzaambi.
Currently Selected:
Liikë 24: NTVIL
Tõsta esile
Share
Copy
Want to have your highlights saved across all your devices? Sign up or sign in
© 2019, Wycliffe Bible Translators, Inc. and © Alliance Biblique du Congo. All rights reserved.