Za 3
3
Yeesu i Nikodeemë
1Faawu fabë muutu bëlëteelaangë Nikodeemë, wabë mu cinguuku ci Sifalisyaanu. Naandi wabë fumu Sizwiifë. 2Naandi wuyisë yi bwiilu wukuzakënë Yeesu i kun'kaambë : « A Fumu, beeso tuzabisi ti Nzaambi wakufilë mu kutuloongë, cibilë wun'velë ve wum'podi kuvaangë bimaaku dedë mweekë njeeyi wulë mu kusilaangë mooti Nzaambi wukeeli yaandi kuve. » 3Yeesu wusë n'vutulilë : « Cibeeni, miinu yikukaambë licyelikë: muutu ve wum'podi kumonë Lwaangu lu Nzaambi, mooti naandi sye be butu mbutukulu yimoonë kuve. » 4Nikodeemë wusë n'yufulë : « Lya kubeelë buni ti muutu wakweelë mu kube butu mbutukulu yimoonë? Mu cibilë ocyo, naandi kupodi ve kube vutukë mu civumu ci nguli mu kube butu vyaasi yimwaali? » 5Yeesu wusë vutulë : « Cibeeni, yikukaambë licyelikë: muutu ve wum'podi kukotë ku Lwaangu lu Nzaambi mooti naandi sye butu kuve mu masi i mu Ciluunzi. 6Cinë cibutukë mu baatu lu moonyi, muutu kukeeli, i cinë cibutukë mu Ciluunzi ci Nzaambi, cyaawu ciluunzi. 7Keelë wulëtulumukë cibilë miinu yakukaambë ti : “Beeno booso lufweeni kubutukë mbutukulu yimoonë.” 8Mpeemu yim'pukaangë fosuku yizolisi, njeeyi wulë mu kuwu ncyeembi, kasi wusye zaabë kuve kuni yaawu yin'fuminë i kuni yin'kwendë. Bwa boobo bwa bun'vangininaangë mu wosuku muutu wum'butwaangë mu Ciluunzi ci Nzaambi. »
9Bwaawu, Nikodeemë wusë vutulë : « Lyaawu buni lim'podi kuvangininë? » 10Yeesu wun'vutulë : « Njeeyi mati n'loonji ku Islayeelë, njeeyi sye zaabë maawu kwe? 11Licyelikë, licyelikë, miinu yikukaambë : tun'tubaangë mo tuzabisi i tun'vanaangë cimbaanji mu mo twamonë, kasi beeno lusë n'zolaangë kuve kucikunë cimbaanji ciitu. 12Ningë lusye kun'teelë maanë kuve fanë yilukambilë maambu më buloongo be buubu, buni lukun'nyuwulu ningë yibe lukaambë maambu mëyilu? 13Muutu ve wumakë ku yilu, kanuku Mwaanë Muutu wufuminë ku yilu#3.13 Big 30.4; Lom 10.6. ! 14Dedë mweekë Moyiizë wutelikë nyookë mu ntaandu ciyumi#3.14 Lut 21.9., bwa boobo, lufwenikini kutelikë Mwaanë Muutu, 15bwiinji wosuku wun'ta maanë mu naandi wum'bakë luziingu lu sakë yi sakë. 16Cibilë Nzaambi wuzolë buloongo n'viipë, wuvaanë mwanaandi mweekë vwiili mu kuba wunë wun'ta lyaanë mu naandi wuleembu kunyambëkënë kasi wubakë luziingu lu sakë yi sakë. 17Nzaambi sye filë mwanaandi mu buloongo ko mu kubufundisi, kasi mu kubuvuuci mu naandi. 18Wunë wun'ta maanë mu Mwaanë bisë kun'fundisi kuve, kasi wunë wun'kaambu kuta maanë bëkufundisi, cibilë wusye teelë maanë ko mu Mwaanë viingu wu Nzaambi. 19Talaanu lufundusu buni lun'kwisilaangë: cyeseesë ciyisë mu buloongo, kasi baatu bëzolisi citoombi kuvyookë cyeseesë, cibilë mëvaangë maawu mëbi. 20Wosuku wun'vaangaangë libi, wun'kwakënaangë yi cyeseesë, cibilë wum'maangaangë mëvaangë maandi mëbi kumonikë fë ciyalëlë. 21Vandi kasi wunë wun'salilaangë cyelikë, wun'kwisaangë kuke cyeseesë, bwiinji bëmonë mëvaangë maandi mëboti mëdedëkënë yimunë Nzaambi. »
Yeesu i Za
22Kumanë ofo, Yeesu i bilaanzi byaandi bëyendë ku libweeti li Zudee. Naandi wukalë mwa ntaangu yi baawu i naandi wulëbatizyalaangë#3.22 4.1-2.. 23Za yivaandi wulëbatizyalaangë ku libweeti li Enoonë libelëmë yi Saliimë, cibilë kwaawu kwabë masi më mpaapë. Baatu bëlëkwisaangë ke naandi i wulëbëbatizyalaangë. 24Licyelikë mu ntaangu beenë, Za wabë yibuunu kutuulu mu buloko#3.24 Mat 14.3; Mak 6.17; Lik 3.19-20..
25Bwaawu, mwa bilaanzi bëmesë bi Za bëtatikë kufindënë simpakë yimunë Zwiifë mweekë mu cibilë ci simpaangu si bëlyomisi. 26Baawu bisë kweendë ke takënë Za i bisë n'kaambë : « A N'loonji, njeeyi wulë mu kutebukë moonyi mu muutu wabë yaaku ku lisimu limesi li mwiilë wu Yulëdaanu, wunë njeeyi wuteelë cimbaanji? Naandi mati wakum'batizyaalaangë i baatu booso yakwendaangë ke naandi! » 27Za wusë bëvutulilë : « Muutu ve wum'podi kubakë cin'viipë mooti Nzaambi sye n'vaanë kuve. 28Benuveekë kupodi kuta cimbaanji : “Miinu yikeeli Kliistu kuve, kasi bëkun'tumë fë ntwaalaandi#3.28 1.20; Mal 3.1. .” 29Muutu wubakisi n'kasi, naandi na n'nuni, kasi ndiku n'nuni wutelëmë fëke naandi i mu kun'kuwu i naandi ke liyaanji mu kuwu mbeembu yi n'nuni. Nyeenzi be yooyo yaami miinu i yaawu yifwanëkënë. 30Naandi fwenikini kumakë, bwiinji miinu yikulukë. »
Wunë wufuminë ku yilu
31Wunë wufuminë ku yilu, naandi wuvyokilë bakë booso, kasi wunë wubutukë mu n'toto, naandi wufuminë fë n'toto i wun'tubaangë maambu më n'toto. Muutu wunë wufuminë ku yilu, naandi kuvyokilë bakë booso. 32Naandi mbaanji mu manë kwamonë i mo kwakuwu, kasi muutu ve wun'vitikë cimbaanji cyaandi. 33Wunë wun'vitikë cimbaanji cyaandi, naandi wun'sisiminë ti Nzaambi na cyelikë. 34Muutu wo Nzaambi wafilë, naandi wutubaangë maambu më Nzaambi, cibilë Nzaambi wukun'vanaangë Ciluunzi lunduu. 35Taatë be zolë Mwaanë i naandi wuvaanë byakë byooso mu lutumu lwaandi. 36Muutu wunë wun'teelë lyaanë mu Mwaanë wum'bakë luziingu lu sakë yi sakë. Wunë wun'kaambu kuteelë lyaanë mu Mwaanë, naandi wusë mbakë luziingu ko, kasi mwaangu Nzaambi wun'kalilë yaandi.
Currently Selected:
Za 3: NTVIL
Tõsta esile
Share
Copy
Want to have your highlights saved across all your devices? Sign up or sign in
© 2019, Wycliffe Bible Translators, Inc. and © Alliance Biblique du Congo. All rights reserved.