Za 18
18
Lubwilulu lu Yeesu
(Mat 26.47-56; Mak 14.43-50; Lik 22.47-53)
1Fë mbusë mamoomo, Yeesu wuyendë yimunë bilaanzi byaandi ku lisimu limesë li mwiilë bën'teelë Sedëloonë#18.1 Mak 11.1.. Faawu, fabë citumbu ci n'siitu naandi wukukotë yimunë bilaanzi byaandi. 2Zuda wunë wulën'sumbisi, wuzaabë yivaandi fabeenë, cibilë Yeesu i bilaanzi byaandi bëlëkwisaangë faawu#18.2 Lik 21.37; 22.39.. 3Zuda wusë kweendë ku citumbu ci n'situ be cyoocyo, wunatë nkoongë mësodaadi i mëluungë bëfilë ke bëkuluutu bë singangë-Nzaambi i cinguuku ci Sifalisyaanu. Baawu babë yi binwanunu i bëlë ke nataangë miindë i bisisi bi mbaasu. 4Oboobo, Yeesu abu kwazaabi makë mooso manë mu lun'kwisilë, wusë belëmë fëke baawu i wusë bëkufulë: « Beeno nani luke toombaangë? » 5Baawu bisë n'vutulilë : « Yeesu li Nazaleetë. » Yeesu wusë bëkaambë : « Miinu awu. » Zuda wunë wun'sumbisi, wabë foofo yimunë baawu. 6Bunë Yeesu wubëkaambë : « Miinu awu », baawu bisë vutukë mbusë i kubwa fë n'toto. 7Yeesu wusë bëkufulooso : « Beeno nani luke toombaangë? » Baawu bisë tubë : « Yeesu li Nazaleetë. » 8Yeesu wubëvutulilë : « Miinu yalukaambë lyaawu mi wuuwu. Ningë ti miinu luke toombaangë, biikaanu bëmesë beendë. »
9Mati boobo bwaawu, bëfitë vangininë libuungu lyo naandi wutubë : « Miinu yisye zimbisi muutu ko mu banë njeeyi, Taatë, wukum'paanë#18.9 6.39; 17.12.. » 10Simu li Pyeelë wabë yi cisabë, naandi wucibaasi, wuyukë ciseelu cin'kuluutu singangë-Nzaambi i wusë n'cyeelë kutu ku mëbakëlë. Ciseelu be cyoocyo bëkun'teelaangë Malëkiisë. 11Kasi Yeesu wukaambë Pyeelë : « Vutulë cisabë cyaaku mu lukutulu. Njeeyi wum'balë ti miinu m'ba yisë nwa ko mbuungu simpasi yo Taatë wakum'paanë#18.11 Mat 26.39; Mak 14.36; Lik 22.42. ? »
Yeesu bën'natë ke Aanë
12Nkoongë mësodaadi i kumaandë kwaawu i miluungë bëkuluutu bi Sizwiifë bisë siimbë Yeesu i kun'kaangë misiingë. 13Baawu bisë n'natë ntetë ke Aanë#18.13 Lik 3.2.. Naandyaawu wabë cikweesi ci Kayiifë awu wabë n'kuluutu singangë-Nzaambi mu n'vu beenë. 14Kosuku, Kayiifë na wuvaanë ndoonji ke mikwa-lwaangu Sizwiifë : « Lifwenikini mu beeno muutu mweekë kufwa mu cibilë ci baatu bakë booso#18.14 11.49-50.. »
Pyeelë wutunë kuba cilaanzi ci Yeesu
(Mat 26.69-70; Mak 14.66-68; Lik 22.55-57)
15Simu li Pyeelë i cilaanzi cin'ka bëlëlaandaangë Yeesu. Cilaanzi be cyooci cimesi cyabë cizabëkënë ke n'kuluutu singangë-Nzaambi, bwaawu naandi wukotilë fë cimweekë yimunë Yeesu ku luumbu lu n'zo n'kuluutu singangë-Nzaambi. 16Kasi Pyeelë wusë kalilë ku ngaandë, belë-belë yi munu-n'zo. Bwaawu, cilaanzi cimesi, cinë cizabëkënë ke n'kuluutu singangë-Nzaambi, wusë basikë i kukaambë n'cyeetu wulëluungaangë munu-n'zo i naandi wusë kosi Pyeelë. 17Ciseelu ci n'cyeetu cili luungaangë munu-n'zo wukaambë Pyeelë: « Njeeyi kwe yivaaku cilaanzi ci muutu be woowee? » — Pyeelë wusë vutulë : « Moniko miinu kuve! »
18Cyoosi cyabë, bwaawu biseelu i miluungë bëtatikë mbaasu mu kotë. Pyeelë yivaandi wabë faawu i wulëkotaangë mbaasu.
N'kuluutu singangë-Nzaambi wuyufulë Yeesu
(Mat 26.59-66; Mak 14.55-64; Lik 22.66-71)
19N'kuluutu singangë-Nzaambi wuyufulë Yeesu mu linë lin'talë bilaanzi byaandi i mu liloonji linë naandi wulëvaanaangë. 20Yeesu wun'vutulilë : « Miinu yilëtubaangë fë ciyalëlë ke baatu booso, yilëloongaangë mu bizutununu i mu n'zo-Nzaambi, fanë fëlëzutënaangë Sizwiifë syooso, miinu yisye tubilë lin'viipë ku mësweeci ko. 21Cibilë-mbici njeeyi wulë mu kun'kufulilë? Yufulë banë bëyuwu linë miinu yibëkaambë: baawu bëzabisi buboti linë yilëtubaangë. » 22Mu mamoomo, wumweekë mu biluungë wabë faawu wubulë Yeesu mbatë i wutubë : « Njeeyi boobo bwa wufwenikini kuvutulilë n'kuluutu singaangë-Nzaambye? » 23Yeesu wusë n'vutulilë : « Mooti libi yitubisi, tuleesi libi mbi twavaangë, kasi ningë lyo yitubisi libe fwaanë, mu cibilë-mbici wakum'bulilë? » 24Aanë wusë n'filooso myooko yikangëmë ke Kayiifë, n'kuluutu singangë-Nzaambi.
Pyeelë wutunooso Yeesu
(Mat 26.71-75; Mak 14.69-72; Lik 22.58-62)
25Mu ntaangu be syoosyo, Simu li Pyeelë, wabë faawu mu kotë mbaasu. Bisë n'kufulë : « Njeeyi kwe yivaaku cilaanzi ci muutu be woowee? » Kasi Pyeelë wutunë i wutubë : « Moniko, miinu kuve. » 26Wumweekë mu biseelu bi n'kuluutu singangë-Nzaambi, awu wabë cifuumbë cimweekë yi muutu wo Pyeelë wucyelë kutu, wun'kaambë : « Njeeyi kwe, yimonë yimunë naandi ku cituumbu ci n'situ? » 27Kasi Pyeelë wutunë fë vyaasi yin'ka. Mu ntaangu be yooyo susu yikokilë.
Yeesu fë ntwaalë Pilaatë
(Mat 27.1-2,11-14; Mak 15.1-5; Lik 23.1-5)
28Faawu, bisë natë Yeesu ke Kayiifë ku luumbu lu n'kwa-lwaangu wu Loomë. Yabë mu micye-cyeelu bi bwiisi. Kasi bëkuluutu bë Sizwiifë bësye kotë ko ku luumbu bwiinji baawu bëleembu kusumukë i kulya ndiiwu yi Paakë. 29Mati bwaawu, Pilaatë wusë bëtakënë ku ngaandë. Naandi wusë bëyufulë : « Beeno ntoondo mbi lwabakë muutu be woowo? » 30Baawu bisë n'vutulilë : « Ningë naandi wusye ba civadë-mbi ko, nkanë beeso tusye kwiisë ko mu kun'vakulë ke njeeyi. » 31Pilaatë wusë bëkaambë : « M'boonjyaanu benuveekë i lun'fundisyaanu bo bun'kwendilë n'kaakiinu. » – Baawu bisë n'vutulilë : « Beeso tukeeli yi n'swa ko, mu kuvoondë muutu. »
32Mati boobo, bwabufitë vangëninë libuungu linë Yeesu kutubë mu kusulikë mpilë lufwa kulëfwiilë#18.32 3.14; 12.32.. 33Pilaatë wusë kotooso ku luumbu, wutelë Yeesu i wun'yufulë : « Njeeyi fumu Sizwiifë? » 34Yeesu wun'vutulë : « Njeeyi wun'tubilë oboobo cibilë wali balë njeveekë voo cibilë bën'ka batubilë mu miinu? » 35Pilaatë wuvutulë : « Miinu Zwiifë yikeeli? Banë bëkalë yaaku i bëkuluutu bë singangë-Nzaambi ba bakuvakulë ke miinu. Njeeyi mbici wavaangë? » 36Yeesu wusë vutulë : « Lwaangu lwaami lukeeli lu buloongo be buubu ko. Ningë ti lwaangu lwaami lwaabë lu buloongo be buubu, nkanë biseelu byaami bëlën'waanë mu kumaangë baawu kun'vakulë ke mikwa-lwaangu Sizwiifë. Kasi moniko, lwaangu lwaami lukeeli lu buloongo be buubu ko. » 37Pilaatë wusë be tubooso : « Njeeyi Fumu wukeelye? » Yeesu wusë vutulë : « Njeeyi walitubë : miinu Fumu. Miinu yibutu, i yiyisë mu buloongo mu kutubë cimbaanji mu bucyelikë. Wosuku muutu wun'zingilë mu bucyelikë, wun'kuwu maambu yin'tubë. » – 38Pilaatë wun'yufulë « Cyelikë beenë mbicye? »
Yeesu ban'tabë lufwa
(Mat 27.15-31; Mak 15.6-20; Lik 23.13-25)
Fë mbusë bikumë obyo, Pilaatë wuyendooso kwe zakënë Sizwiifë ku ngaandë. Wusë bëkaambë : « Miinu yisye monë libooti ko linë yifwenikini kuvaanë lutabu ke muutu be wuuwu. 39Kasi dedë mweekë bo bubikilë mwa nkulu, miinu yilubasilaangë wumweekë mu buloko mu kadë n'saangu Paakë. Beeno lun'toombë yilubasilë fumu Sizwiifë? » 40Baawu bisë n'vutulilë yi nkasu yooso : « Moniko, naandi kuve! Beeso Balabaasë naandi tun'toombë! » Kosuku Balabaasë be woowo wabë civadë-mbi#18.40 Mëv 3.14..
Currently Selected:
Za 18: NTVIL
Tõsta esile
Share
Kopeeri
Want to have your highlights saved across all your devices? Sign up or sign in
© 2019, Wycliffe Bible Translators, Inc. and © Alliance Biblique du Congo. All rights reserved.