Uumama 46
46
1Yakobooni waan qabu ch'ufa fud'ate Beersheba d'aqe achiti sorio Waaqa abba isaa Isaaqoti baase. 2Waaqi halkani daayya keesa dubbateeni, Yakobo, Yakobo! jed'e yaame. Yaa, anini kuno, Aabbo jed'e owaate.
3Anini Waaqa, Waaqa abba keetiti; lafa Misiri d'aqu insodaatini; achiti gosa guddo si tolcha. 4Anini gara lafa Misiri si geese hegerile gadi si deebisa gaafa atini doote Yusufuti si awaala jed'eeni.
5Jennaani Yakobooni Beershebaa kae, ilmaani isaa, isaafi ijoolle worraa didiqo, ammalle nad'eeni worrale ch'ufa gaari Faraoni erge yaabachiifte. 6#Huji 7.15 Jennaani worri horifi waan lafa Kanaani keesati horate ch'ufa fud'ate lafa Misiriti godaane. Yakobooni nama isaa ch'ufa ufi gula fud'ate: 7ilmaani isaatiifi akhakhowani isaati, dubra isaale.
8Nami worra Yakobo ka isa woliini lafa Misiriti godaane kana: angafa isaa Reubenifi 9ilmaani Reubeni: Hanoki, Palu, Hesroni, Karmi. 10Simeonifi ilmaani isaa: Yemueli, Yamini, Ohadi, Yakini, Sohari ammalle Shauli, ilma niiti gosa Kanaani. 11Lawifi ilmaani isaa: Gershoni, Kohathi, ammalle Merari. 12Yudafi ilmaani isaa: Shela, Peresi, ammalle Zera. (Ilmaani Yuda ta d'ibiini, Erifi Onani lafa Kanaaniti doote.) Ilmaani Peresi Hesronifi Hamuli. 13Isakarifi ilmaani isaa: Tola, Pua, Yashubu, Shimroni. 14Zabulonifi ilmaani isaa: Seredi, Eloni, Yaleeli. 15Tunini ilmaani Leani Yakoboo d'alte lafa Mesopotamia keesati, intala isii Dina wolti. Ilmaani mana Lea ch'ufti wolti nama sodomi sadi.
16Gadifi ilmaani isaa: Sefoni, Hagi, Shuni, Esboni, Eri, Arodi ammalle Areli. 17Asherifi ilmaani isaa: Imna, Ishva, Ishvi, Beria, ammalle oboleeti worraa Sera. Ilmaani Beria Heberifi Malkieli. 18Kud'ani jaani tunini ilmaani Zilpaani, intalti Labaniini Leaa kenne, Yakobo d'alte.
19Niitiini Yakobo ta Raheli jed'ani ilmaani lama d'alteefi: Yusufufi Benjamini. 20#Uum 41.50-52 Lafa Misiri keesati Yusufuuni ilmaani lama d'ale, Manaseefi Efraimu; ijoolle tana Asenathi, ta dubra Potifera, ka qaallu lafa Oniti, isaa d'ale. 21Ilmaani Benjamini tana: Bela, Bekeri, Ashbeli, Gera, Naamani, Ehi, Roshi, Mupimu, Hupimu ammalle Ardi. 22Kud'ani afraani tunini ilmaani Raheliini Yakobo d'alte.
23Danifi ilma isaa Hushimu. 24Naftalifi ilmaani isaa: Yaseeli, Guni, Yaseri, Shilemu. 25Torbaani tunini ilmaani Bilhaani, intalti Labaniini Rahelii Kenne, Yakobo d'alte.
26Ilmaani Yakobo, ta lafa Misiriti godaante, nad'eeni worraa male, isiini ch'allaani jaatami jaa. 27#Huji 7.14 Lafa Misiri keesa Yusufuuni ijoolle lama d'ale, tanaafi worri Yakobo ch'ufti wolti torbatama, ka lafa Misiriti godaane.
Yakobofi worra isaa lafa Misiri keesa
28Yakobooni Yuda ufi dura erge Yusufuuni, Lafa Gosheniti wolargina jed'e. Worri artini bahe 29jennaani Yusufuuni gaari ufii yaabate lafa Gosheni abba yoyifachu d'aqe. Wolarginaani Yusufuuni abbaati mamarate guddo bohe. 30Yakobooni waan Yusufuuni jed'e, Amma yo due womaniti, fuula ke si arge, aka atini jirtu ya beekhe.
31Jennaani Yusufuuni waan oboleyaani isaatiifi worra abba isaa ch'ufaani jed'e, Anini d'aqe waan Faraoni jed'u, Oboleyaani tiyyafi worri abba kiyya ch'ufti, ka duri lafa Kanaani keesa tau, ya nati d'ufe. 32Worri kunini tissitu; looni, ree ammalle hori waan qabu ch'ufaani ya d'ufate. 33Hojja Faraoni isani yaame, Hujiini teesani maani? jed'e isani gaafate, 34waan jettaniini, Nufi worri keennaleeni haguma d'alanne tissitu horiti. Akanaani inni lafa Gosheni isani teesisa. Wonti Yusufuuni akasi jed'eefi, tissituuni horii aada worra Misiri keesa falfala.
Currently Selected:
Uumama 46: BOR
Tõsta esile
Share
Copy
Want to have your highlights saved across all your devices? Sign up or sign in
Borana Bible © Bible Society of Kenya, 2019.