Bahisa 8
8
1Jennaani AABBO Waaqi waan Musani jed'e, Faraoti olseeni waan jettuuni, Worra kiyya galakisi, aka worri na kad'atu. 2Ammo yo atini worra gad'iisu didde, lafa tante ch'ufa raachaani balleesa. 3Raachi galaana ch'ufa guute ira dabre, mana kanke fulla atini bultu, sire tante, maneeni hojattu tanteetiifi fulla iti wo d'aabani, ibida ch'ufa guuta. 4Eege d'ufe sifi hojattu tantetile kore gubbaa yaa.
5Duuba AABBO Waaqi waan Musani jed'e, Waan atini Harunini jettu, Ule tante galaana, dambala, fulla bisaani naqattu ch'ufa ira qabi, aka akanaani raachi lafa Misiri ch'ufa keesa guutu. 6Tanaafi Harunini bisaani Misiri ch'ufa harka ira olqabate, raachi gabaafate lafa Misiri ch'ufa guute. 7Ammo worri wo tolchu kaani akuma suni wo tolche lafa Misiri keesa raachaani d'ufe.
8Jennaani Faraoni Musafi Haruni yaame waan jed'eeni, AABBO Waaqa kad'ad'a aka inni raacha kana naafi lafa tiyyale iraa balleesu. Anileeni worra keesani galakisa, aka d'aqani sorio Waaqaa baasani. 9Musani waan jed'eeni, Anini inuma kad'ad'a, ammo hojja anini sifi hojattu teeti, worra lafa teetiti kad'ad'u nati himi, aka raacha suni sifi worra kanke keesaa balleesani galaana Nile ch'alla keesati hambisani.
10Inni waan jed'eeni, Ha bori taatu, Musani waan jed'eeni, Aki atini jette ha tahu. Akanaani aka Waaqi d'ibiini, ka aka AABBO Waaqa keenna jiru, injirre beeta. 11Raachi sifi worra keeti, hojattu teeti, worra lafa teeti ch'ufa iraa bade galaana lafa Misiri ch'alla keesati hafa. 12Duuba Musafi Harunini Farao biraa yaani, Musani waan raacha suni, ka AABBO Waaqi Faraotiini d'ufe, Iraa balleesi jed'e, Waaqa kad'ate. 13AABBO Waaqi akuma Musani jed'e tolche, raachi manafi qayeefi ka oobru ke jiruleeni ch'ufti hobae. 14Raacha ch'ufa wolti guurani tuulani, lafti ajoofte. 15Ammo Faraoni aka raachi hobae arginaani garaa jabaate Musafa ch'aqasu dide, akuma qara AABBO Waaqi jed'e.
Biinni
16Jennaani AABBO Waaqi waan Musani jed'e, Waan Harunini jettu, Harka d'eerefad'u, ule tante olfud'ad'u, lafaani d'ai, duuba awaarti kaatu ch'ufa biinni taati. 17Jennaani Harunini ule lafaani d'ae, awaarti kaate, awaarti lafa Misiri keesati kaate ch'ufti biinni taate. 18Worri wo tolchu kaani tolcha ufii tolche, aka biinni gabaasu, ammo indad'abani. Biinnini suni nama, bineensa, horile ch'ufati baafatte. 19#Luk 11.20 Duuba worri wo tolchu kaani waan Faraoni jed'e, Kunini waan Waaqi tolche. Ammo Faraoni garaa jabaate, akuma AABBO Waaqi qara jed'e kaani worra ch'aqasu dide.
Tiite
20Jennaani AABBO Waaqi waan Musani jed'e, Bori ganama lafaa kai, Farao gara galaana deemu eegi waan jettuuni, AABBO Waaqi waan jed'e, Worra kiyya gad'iisi, aka worri na kad'atu. 21Yo atini gad'iisu didde, anini tiite heddu sifi hojattu tanteetiifi worra lafa tanteetiifi maneeni teesaniti buusa. Maneeni gosa Misiri tiiteeni guute, biyyeeni lafaleeni ch'ufti tiite taati. 22Anini ammo guyya suni arda Gosheni, ka worri kiyya keesa jiru, illakisa, aka tiiteeni tokoleeni achi ind'umne. Akanaani aka anini, AABBO Waaqi, lafa tana keesa jiru beeta. 23Akanaani worra kiyyafi kanke gargari baasa. Akheekhi kunini bori guutama. 24AABBO Waaqi akuma suni tolche; duuba tuuti tiite guddooni mana Faraotiifi ka hojattu isaa iti duude. Lafa Misiri ch'ufa haguma geetuuni tiiteeni balleese.
25Jennaani Faraoni Musafi Haruni yaame waan jed'e, Beena, lafa tana keesati sorio qala. 26Ammo Musani waan jed'e, Akasi nuu intaatu, wonti akanatiifi sorioni nu AABBO Waaqa keenna baamnu worra Misiriti waan laguti. Yo nu sorio akana tana, ta worri Misiri lagatu, ila worraa dura qalle, worri d'akhaani nu had'a. 27Akasi intahu, nu guyya sadi imaltu lafa aloo ke yaane AABBO Waaqa keenna sorio baasu male, akuma inni nuuni jed'e.
28Duuba Faraoni waan jed'eeni, Inuma isani gad'iisa, aka AABBO Waaqa keesani lafa alooti sorio baaftanifi, ammo imfagaatiina. Nale Waaqa kad'ad'i. 29Musani, waan jed'eeni, Anini ammumatana si biraa deeme AABBO Waaqa kad'ad'a, aka inni tuuta tiite tana sifi hojattu tanteetiifi worra kankele bori iraa balleesu. Ammo atini deebite nu sobde worra keenna AABBO Waaqaa sorio baasu ind'owiini. 30Duuba Musani, Farao biraa deeme AABBO Waaqa kad'ate. 31AABBO Waaqi akuma Musani, kad'ate tolcheefi. Tuuti tiite taani ch'ufti Faraofi hojattu isaatiifi gosa Misiri ch'ufa iraa badde; tiiteeni tokochi qubaleeni inhamne. 32Ammo Faraoni akuma kaani garaa jabaate biyya taani yau d'owe.
Aka Horiini hobae
Currently Selected:
Bahisa 8: BOR
Tõsta esile
Share
Copy
Want to have your highlights saved across all your devices? Sign up or sign in
Borana Bible © Bible Society of Kenya, 2019.