Bahisa 14
14
1Jennaani AABBO Waaqi waan Musani jed'e, 2Waan atini worra Israelitini jettu, ke deebia, fulla Pi-Hahirothi, jiddu Migdolifi galaana Diima, d'aatu Baal-Sefoni qubad'a. 3Faraoni hegeri waan worri Israeli lafti aloo bahu d'owarte, worri gara yau wollaalu seha. 4Duuba anini garaa Farao jabeesa, inni duuba isani reebe, anini isaafi gumi isaale dabsad'e, akasiini worri Misiri aka anini AABBO Waaqa beekha. Jennaani worri Israeli waan Musani jed'eeni ch'ufa tolche.
5Hayyuuni Misiri aka worri sunini baqate iti himani jennaani isaafi hojattuuni isaa herega garagalfatani waan jed'ani, Nu qara maani taane worra Israeli gad'iimne amma tissele d'amne? 6Jennaani Faraoni gaari lolaa ka fardi hirkisufi askarti isaale kurfefate. 7Duuba gaari fardi hirkisu dadansa d'ibba jaatiifi gaari fardi hirkisu ka lafa Misiri keesa jiru ch'ufa, ka kamu nami askarti gudda ke jiru, wolti guure kae iti d'aabate. 8AABBO Waaqi garaa Farao jabeese, inni worra Israeli ka isa dabsate kae godaane reebe. 9Askartiini Misiri, ta ch'ufti gaari fardi hirkisu keesa jirtu, ta kamu ooftu ufii qabdu, gumi Israeli reebde fulla worri bule ta d'aatu galaana Diima, ta Pi-Hahirothi jed'ani, d'aatu Baal-Sefoniti d'aqabde. 10Faraoni worrati d'iaate jennaani worri Israeli ufira millate, askarti Misiri ta iti gad'ufu jirtu arge guddo sodaate, AABBO Waaqati bohani 11waan Musani jed'ani, Fulla iti nu awaalaniti lafa Misiri keesa injirre mo? Atini maafi lafa aloo tanati baafte nu fit'a? Waan atini lafa Misiri keesaa baafte nu tolchite laali! 12Nu lafa Misiri keesati, Wonti kunini intaatu, lakisi, nu worra Misiri hojanna siini injenne? Fulla lafa aloo tanati yaane hobaanu.
13Musani waan jed'eeni, Insodaatina, jabaad'a, aka AABBO Waaqi isani baasu arra laala; wonti akanatiifi worri Misiri ka arra agartani kana deebitani haga jiru jireennale ingartani. 14AABBO Waaqi isanii kalcha, yo isani takaa taatani jabaattani.
15AABBO Waaqi waan Musani jed'e, Maafi nati boota? Worra Israelitini, Durati yaa jed'i. 16Ule tante olfuud'i, harka d'eerefad'i, galaana ira qabi, aka inni gargari ch'ite, worri Israeli lafa goddu ira taaku argatu. 17Anini garaa worra Misiri jabeese, aka worri worra Israeli gula yau; duuba anini Faraofi gumi isaatiifi askarti isaa ta gaari fardi hirkisuni yaatufi ta fardaani yaatule dabsad'a. 18Yo anini Faraofi askarti isaa ch'ufa dabsad'e, worri Misiri imbeekha, aka anini AABBO Waaqa.
19Duuba malaikaani Waaqaa, ta qara worra dura deemtu, eege worrati deebite. Baldooni dumansa taanileeni dudda duuba deebite 20worra Israelitiifi ka Misiri jiddu ejite. Dumansi kaani worra Misiri lafa iti dukaneese halkani tolche, ammo worra Israeliti ifse, tanaafi worri halkani suni wolti d'iaachu dad'abe.
21Duuba Musani harka galaana ira qabate jennaani AABBO Waaqi bubbe guddo ilaboruti d'ufeeni bubbeeni taani bisaani gargari gama lamati kute, lafti godduuni jiddu mullatte; bisaani gargari ch'itani, bubbeeni suni halkanii bubbisaa bulte. 22#1 Kor 10.1-2; Ebr 11.29Duuba worri Israeli galaana suni jiddu lafa goddu ira taake, bisaani gooraani mirgaa bitaa worraa ejani. 23Jennaani farda Faraotiifi gaari fardi hirkisufi jari isa ka fardaani reebuleeni ch'ufti reebu Israeliti jed'ani jiddu galaana buani. 24Ganama ato lafti bolgoddu, AABBO Waaqi baldo dumansaa keesa aka ibida askarti Misiriti mullate naasise mudamsiise. 25Ammalle inni miila gaari worra Misiri lafati mat'anse, duuba gaari worraa chochou d'owe. Worri Misiri waan jed'e, Worra Israeli kana biraa nu baqachiisa. Wonti akanatiifi Waaqati worraa kalche nu had'uu jira!
26Jennaani AABBO Waaqi waan Musani jed'e, Harka kanke galaana ira qabi, ha bisaani worra Misiritiifi gaari worraatifi farda worrale ch'ufa ira deebianiti. 27Duuba Musani harka isaa galaana ira qabe, lafti bariinaani bisaani galaana irre jabduuni deebiani. Worra Misiri ka jiddu baqachuu jiru AABBO Waaqi bisaani ira deebise hobaase. 28Bisaani deebiani, gaari fardi hirkisufi worra fardaani yaufi worra Farao ch'ufa ira deebiani, tokole bahu d'owani. 29Ammo worri Israeli lafa goddu ira galaana keesa jiddu bisaani goorae ejaati kaani taake.
30Akanaani AABBO Waaqi guyya suni worra Israeli harka worra Misiri keesaa baase. Worri Israeli reefa worra Misiri ka afaani galaana ch'iisu arge. 31Worri Israeli aka Waaqi irree guddooni worra Misiri dabsate arginaani AABBO Waaqafi Musa hojattu isaale d'ugeefate.
Faaru Musaa
Currently Selected:
Bahisa 14: BOR
Tõsta esile
Share
Copy
Want to have your highlights saved across all your devices? Sign up or sign in
Borana Bible © Bible Society of Kenya, 2019.