Luke 6
6
Yezu udi mfumu wa dituku dia Dikisha
(Mat 12.1-8; Mar 2.23-28)
1Dituku dikuabu dia dikisha, Yezu uvua ukosoluela mu madimi a ntete ya kuenza bukula. Balongi bende bavua batula miepu ya ntete, bayivinga mu bianza, badia ntete.#6.1 dituku dikuabu dia dikisha: tangila Lev 23.5-14. — badia ntete: Diel 23.26. 2Baparushe bakuabu kubakonka ne:
— Nudi nuenza bualu budi mikenji yetu mikandike bua kuenza dituku dia Dikisha bua tshinyi?#6.2 Tangila Tshim 34.21.
3Yezu kubandamuna ne:
— Kanuena babale tshivua Davide wenza dituku divua nzala mibasume, yeye ne bantu bende, anyi? 4Davide kubuela mu nzubu wa Mvidi Mukulu, kuangata mampa avuabu balambule Mvidi Mukulu, kuadia, kuapesha kabidi bantu bende. Kadi mikenji yetu idi yamba ne: mampa awu, badi mua kuadia anu kudi batuangaji nkayabu.#6.4 kuangata mampa: tangila 1 Sam 21.2-7. — batuangaji nkayabu: tangila Lev 24.9.
5Yezu kubambila kabidi ne:
— Muana wa muntu udi mfumu wa dituku dia Dikisha.
Muena tshianza tshifulame
(Mat 12.9-14; Mar 3.1-6)
6Dituku dikuabu dia dikisha, Yezu mumane kubuela mu nzubu wa ditendelela wa bena Yuda, kutuadijaye kulongesha bantu. Muntu uvuamu, muikale ne tshianza tshia balume tshifulame. 7Balongeshi ba mikenji ne Baparushe bavua babambisha Yezu bikole, badiebeja ne: neajikije disama dia muntu awu dituku dia Dikisha anyi? Bualu bavua bakeba mua kumufunda ne: udi wenza bibi. 8Kadi Yezu uvua mumanye meji avua munda muabu. Ke kuambilaye muena tshianza tshibalame ne:
— Juka, imana kuaka, bantu bonsu bakumone.
Muntu awu kujuka, kuimana. 9Ke Yezu kubebeja ne:
— Mikenji yetu idi mianyishe dituku dia Dikisha bua tuenze bimpe anyi bibi? Bua tupandishe muntu anyi bua tumubutule?
10Yezu kubatangila bonsu. Ke kuambilaye muntu awu#6.10 Mu mikanda mikuabu ya kale mbafunde ne: kuambilaye muntu awu ne tshiji ne. ne:
— Olola tshianza tshiebe!
Kutshiololaye. Tshianza tshiende kuakana. 11Kadi baluishi ba Yezu bavua bafika munda bikole, bebejangana tshiyuabu mua kuenzela Yezu.
Yezu udi usungula balongi bende
(Mat 10.1-4; Mar 3.13-19)
12Tshikondu atshi Yezu uvua mubande ku mukuna bua kutendelela. Uvua mushaleku butuku bujima, utendelela Mvidi Mukulu. 13Butshia kubikilaye balongi bende. Kusungulaye munkatshi muabu dikumi ne babidi, kubinyikaye ne: mbapostolu. 14Ke Simone (uvuaye muinyike kabidi dina dia Petro), ne muanabu Andre, Yakobe ne Yowanane, Filipe ne Bartolmayi, 15Matayi ne Tomase, Yakobe muana wa Alfayi,#6.15 muana wa, nansha: muanabu ne. ne Simone (uvua mu tshisumbu tshia baluidi ba ditunga), 16Yudase muana wa Yakobe,#6.16 muana wa, nansha: muanabu ne. ne Yudase Iskariyote uvuile kupangila Yezu.
Yezu udi ulongesha bantu, ujikija masama abu
(Mat 4.23-25)
17Yezu kupueka ne bapostolu bende pa mukuna, kuimana pa muaba mutentema. Balongi bende bakuabu ba bungi bavua muaba awu. Muvua kabidi tshisumbu tshinene tshia bantu ba mu misoku yonsu ya mu ditunga dia Yudeya,#6.17 Yudeya mu Luke ke ditunga dijima dia bena Izrayele, tangila kabidi 1.5. ba mu Yerushalayime, ne ba mu Tire ne Sidone, bimenga bia ku muelelu wa mayi manene. 18Bavua bafika bua kumvua dilongesha dia Yezu, ne bua ajikije masama abu. Bavua ne mikishi mibi ibakengesha, bavua bapanda. 19Bantu bonsu bavua bakeba kumulenga, bualu bukole buvua bufuma kudiye, bubapandisha bonsu.
Bena diakalenga ne bena diakabi
(Mat 5.1-12)
20Ke Yezu kutangila balongi bende, ubambila ne:
“Nuenu bapele nudi bena diakalenga,
bualu nenuikale ne Mvidi Mukulu mu Bukalenga bupiabupia!
21“Nuenu badi ne nzala mpindiewu, nudi bena diakalenga,
bualu Mvidi Mukulu neanudishe, nuukute!
“Nuenu badi badila mpindiewu, nudi bena diakalenga,
bualu nenuseke!
22“Padi bantu banukina, banubenga, banupenda, banupenda bualu bua Muana wa muntu, nudi bena diakalenga. 23Nusanke dituku adi, nutue tshianga, bualu difutu dinene ndinuindile mu diulu. Ke muvua bankambua bakengesha bambi nanku.#6.23 Fuanyikija ne 2 Kul 36.16; MM 7.52.
24“Kadi nuenu babanji, nudi bena diakabi,
bualu nukadi bamane kupeta diakalenga dienu!
25“Nuenu badi ne bintu bionsu mpindiewu, nudi bena diakabi,
bualu nenufue ne nzala!
“Nuenu badi baseka mpindiewu, nudi bena diakabi,
bualu nenubungame, nudile!
26“Padi bantu bonsu banutumbisha, nudi bena diakabi, bualu ke muvua bankambua babu benzela bambi ba dishima nanku!”
Nunange bena lukuna
(Mat 5.38-48; 7.12a)
27“Kadi nuenu badi banteleja, ndi nnuambila ne: nangayi bena lukuna benu; enzelayi badi banukina bimpe. 28Badi banuela mulawu, nubajingile diakalenga. Badi banukengesha, nubalombele kudi Mvidi Mukulu. 29Pikala muntu mukukume dipi ku ditama, umuleje ditama dikuabu. Pikala muntu ukunyenga tshinkutu tshiebe, umupeshe kabidi ne tshilamba tshia pambidi. 30Muntu yonsu udi ukulomba tshintu, umupeshe. Pikala muntu muangate tshintu tshiebe, kutshinanyi nansha. 31Enzelayi bantu bakuabu anu binudi basue bua banuenzele nuenu mene.#6.31 Fuanyikija ne Rom 13.8-10.
32“Panudi nunanga anu badi banunanga, munuapeta difutu dia pa buadi mmunyi? Nansha benji ba malu mabi badi bananga badi babananga. 33Panudi nuenzelangana bimpe anu ne badi banuenzela bimpe, munuapeta difutu dia pa buadi mmunyi? Nansha benji ba malu mabi badi benza kabidi nanku! 34Panudi nusombesha anu banudi batekemena se: nebatupingajilebi, nudi mua kutekemena difutu dia pa buadi bishi? Benji ba malu mabi badi basombesha kabidi benji ba malu mabi, bua babapingajile bia momumue. 35Kadi nangayi bena lukuna benu, benzelayi bimpe. Sombeshayi bantu bintu, kanuyi nutekemena ne: nebatupingajilebi. Nanku nenupete difutu dinene. Nenuikale bana ba Mvidi Mukulu Muena kulu. Bualu Yeye udi wenzela bena kadiwu, ne bantu babi, bimpe. 36Ikalayi ne luse luvule, bu mudi Tatuenu ne luse luvule.#6.36 Fuanyikija ne Tshim 34.6; Mis 86.15.
Kanutangidi bantu bakuabu bu bantu babi
(Mat 7.1-5)
37“Kanutangidi bantu bakuabu bu bantu babi, bua Mvidi Mukulu kanutangidi nuenu kabidi nanku. Kanudiwulu bakuabu, bua Mvidi Mukulu kanudiwulu nuenu kabidi. Nu-mvuilangane luse, nanku Mvidi Mukulu neanumvuile kabidi luse. 38Nupeshe bakuabu bintu, nanku Mvidi Mukulu neanupeshe kabidi. Nebanuelele pa tshilamba bintu bipima bimpe, bishindika, bisekenkeja, biya ne panshi. Nuenzele bantu bimpe ne muoyi wa kalolu. Nanku Mvidi Mukulu neanupe mapa ende ne muoyi wa momumue.”
39Yezu kubelela kabidi lusumuinu ne: “Mpofu udi mua kulombola mpofu nende anyi? Nansha kakese! Padi mpofu ulombola mpofu nende, bonsu babidi nebadishinde mu tshina. 40Mulongi nansha umue kena mua kupita mulongeshi wende. Kadi mulongi yonsu udi mulonge bimpe, mujikije, neafuane mulongeshi wende.
41“Udi utangila anu kasosa kadi mu disu dia muanenu, kuyi utangila mutshi munene udi mu disu diebe bua tshinyi? 42mMunyi muudi mua kuambila muanenu ne: ‘Muanetu, semena, nkumushe kasosa mu disu,’ kuyi umona mutshi munene udi mu diebe? Wewe muena mpala ibidi, bangabanga umushe mutshi munene udi mu disu diebe. Nanku neumone bimpe bua kumusha kasosa kadi mu disu dia muanenu.”
Mutshi ne bimuma biawu
(Mat 7.16-20; 12.33-35)
43“Mutshi muimpe kawena ukuama bimuma bibi. Mutshi mubi kawena ukuama bimuma bimpe. 44Mutshi onsu badi baumanyina ku bimuma biawu. Kabena bapola bimuma bia mfiku ku muonji wa meba, nansha tumuma tua nwinyo ku mingonga. 45Muntu muimpe udi wenza malu mimpe, bualu muoyi wende udi muimpe. Muntu mubi udi wenza amu malu mabi, bualu munda muende mudi mubi. Bualu mukana mua muntu mudi muamba anu malu adi muwule munda muende.”
Lusumuinu lua bibaki babidi
(Mat 7.24-27)
46“Nudi numbikila ‘Mfumu, Mfumu,’ kanuyi nuenza mundi munuambile bua tshinyi? 47Muntu yonsu udi uvua kundi, uteleja miaku yanyi, uyikumbaja, nennuleje udiye mufuanangane nende. 48Udi ufuanangana ne muntu uvua mutuadije kuibaka nzubu. Uvua mumbule mukidi muondoke, muibake tshitaku tshia nzubu pa mabue. Pavua mayi a misulu uwula, apasalala, atuuta ku nzubu, kaavua amunyungisha nansha. Bualu nzubu uvua muibaka bimpe. 49Kadi muntu yonsu udi uteleja miaku yanyi, kayi uyikumbaja, udi ufuanangana ne muntu udi wibaka nzubu wende pa buloba, kayi tshitaku. Padi mayi a musulu atuuta ku nzubu awu, nzubu udi wupuka diakamue, ubutuka yonsu butubutu.”
Currently Selected:
Luke 6: TSH96
Tõsta esile
Share
Kopeeri
Want to have your highlights saved across all your devices? Sign up or sign in
Bible avec Livres Deutérocanoniques en Tshiluba © Société Biblique de la R. D. Congo, 1996