Luke 4
4
Diabolu udi uteta Yezu
(Mat 4.1-11; Mar 1.12-13)
1Yezu uvua utumina ku musulu wa Yardene muwule ne Mueyelu wa Tshijila. Ke Mueyelu kumufikisha mu tshipela. 2Diabolu kumutetamu matuku makumi anayi. Munkatshi mua matuku awu, Yezu kavua udia kantu nansha kamue. Nanku matuku aa mamane kupita, kumvuaye nzala. 3Ke diabolu kumuamba ne:
— Ne#4.3 Ne: apa, ne mu kan. 9, badi mua kuandamuna kabidi ne: bu muudi. udi Muana wa Mvidi Mukulu, utume diyi, dibue edi diandamuke diampa.
4Yezu kumuandamuna ne:
— Mukanda wa Mvidi Mukulu udi wamba ne: “Muntu kena ne muoyi anu bua diampa nkayadi.#4.4 Diel 8.3.”
5Diabolu kuya nende mulu mule. Kumulejaye makalenga a pa buloba onsu musangu umue. 6Kumuambilaye ne:
— Nenkupeshe makalenga onsu aa, ne bubanji buawu. Bualu bavua bampeshe bionsu ebi. Meme kabidi ndi mua kubipesha undi musue. 7Nanku wewe munkukuile, bionsu ebi nebishale biebe.
8Yezu kumuandamuna ne:
— Mukanda wa Mvidi Mukulu udi wamba ne: “Kukuila Maweja-Nangila Mvidi Mukulu webe, umuenzele anu yeye nkayende mudimu.#4.8 Diel 6.13.”
9Ke diabolu kufikisha Yezu mu Yerushalayime, kumuimanyika ku musonga wa nzubu wa Mvidi Mukulu, umuamba ne:
— Ne udi Muana wa Mvidi Mukulu, tumpika kulu, umate panshi. 10Bualu mukanda wa Mvidi Mukulu udi wamba ne: “Mvidi Mukulu neatumine batumibue bende diyi bualu buebe, bua bakulame.” 11Mukanda awu udi wamba kabidi ne: “Nebakuambule mu bianza biabu, bua kututshi dikasa diebe ku dibue.#4.11 Kan. 10 ne kan. 11: Mis 91.11-12.”
12Yezu kumuandamuna ne:
— Mukanda wa Mvidi Mukulu udi wamba ne: “Kutetshi Maweja-Nangila Mvidi Mukulu webe.#4.12 Diel 6.16.”
13Diabolu mumane kuteta Yezu mishindu yonsu, kumushiyaye bua kupingana musangu mukuabu.#4.13 musangu mukuabu: badi mua kuandamuna kabidi ne: tshikondu tshimane kujadika.
Yezu udi utuadija mudimu wende mu Ngalileya
(Mat 4.12-17; Mar 1.14-15)
14Yezu muwule ne bukole bua Mueyelu wa Tshijila, kupinganaye mu Ngalileya. Bantu bavua bayukila bualu buende bikole mu buloba bujima abu. 15Yezu uvua ulongesha mu nzubu ya ditendelela ya bena Yuda. Bantu bonsu bavua bamutumbisha.
Bena mu Nazarete badi bapetula Yezu
(Mat 13.53-58; Mar 6.1-6)
16Yezu kuya kabidi mu Nazarete, muvuabu bamukoleshe. Dituku dia dikisha kubuelaye mu nzubu wa ditendelela wa bena Yuda, bu muvua tshibidilu tshiende. Kujukaye kulu bua kubala Mikanda ya tshijila. 17Kumupeshabu mukanda wa muambi Yeshaya. Kuuvungululaye. Kusanganaye muaba uvuabu bafunde ne:
18“Mueyelu wa Maweja-Nangila mmuntulukile.
Udi munsungule, bua ntuadile bapele Lumu lua Disanka.
Uvua muntume, bua mmanyishe bena lukanu ne: nebanulekele;
mmanyishe kabidi bampofu ne: nenutabale;
kabidi bua mpikule badibu bakengesha,
19bua mmanyishe bantu tshidimu tshidi Maweja-Nangila mua kubasungidila.#4.19 Yesh 61.1-2, muvua bena Ngreke bandamune miaku eyi kale.”
20Nanku Yezu kuvunga mukanda, kuupingajila uvua muulame. Kusombaye. Bantu bonsu bavua mu nzubu wa ditendelela wa bena Yuda kushala bamulengamena. 21Ke Yezu kubambila ne:
— Miaku eyi, inuvua bumvue mu mukanda wa Mvidi Mukulu, mmikumbane lelu, amu pamvua muyibale apu.
22Bantu bonsu bavua bamukema, bakatshila bua miaku ya pa dinanga ivuaye muambe. Bavua bakonkangana ne:
— Yeye ki mmuana wa Yozefe anyi?
23Yezu kubambila ne:
— Bulelela nenungelele lusumuinu lua ne: “Wewe munganga, wadiondapa nkayebe!” Nenungambile kabidi ne: “Bimvua bumvue wewe muenze mu Kefamawume, ubienze kabidi munu mu tshimenga tshienu.”
24Kuambaye kabidi ne:
— Bulelela ndi nnuambila ne: muambi nansha umue kabena bamuangate ne mushinga mu tshimenga tshiabu to. 25Ndi nnujadikila bulelela ne: mu tshikondu tshia Eliya, bakaji bakamba bavua ba bungi mu Izrayele. Bidimu bisatu ne ngondu isambombu mvula kavua muloke to. Tshiyole tshikole tshia nzala tshivua mu ditunga dijima.#4.25 Tangila 1 Bak 17.1 26Kadi Mvidi Mukulu kavua mutume Eliya kudi mukaji mukamba nansha umue wa kudibu. Uvua mumutume anu kudi mukaji mukamba wa mu tshimenga tshia Sarepta mu ditunga dia Sidone.#4.26 Tangila 1 Bak 17.8-16. 27Mu tshikondu tshia muambi Elisha, muvua kabidi bena nsudi bavule mu Izrayele. Kadi nansha umue wa kudibu kabena bajikija disanka diende, kadi anu dia Naamane wa mu ditunga dia Siriya.#4.27 Tangila 2 Bak 5.1-14. Ditunga dia Siriya, ke dia bena Arame.
28Bantu bonsu bavua mu nzubu wa ditendelela wa bena Yuda, bumvua anu miaku ayi, kubindulukabu bikole. 29Kujukabu kulu, kumusakila ku mpenga kua tshimenga, kumufikisha ku lusongu lua mukuna uvuabu bashile tshimenga tshiabu, bua bamusakile mu lupongu. 30Kadi Yezu kupitshila munkatshi muabu, kuya.
Yezu udi uleja bumfumu buende
(Mar 1.21-28)
31Ke Yezu kuya ku tshimenga tshia Kefamawume, mu ditunga dia Ngalileya. Dituku dia dikisha uvua ulongeshamu bantu. 32Bantu bavua bakema bua dilongesha diende, bualu uvua wakula ne bumfumu. 33Mu nzubu wa ditendelela muvua muntu uvua ne mukishi mubi. Muntu awu uvua wela mbila mikole ne:
34— Akia! Yezu wa mu Nazarete, udi musue kutuenzela tshinyi? Udi mulue kutubutula anyi? Ndi mukumanye bimpe ne: udi Wa Tshijila! Mvidi Mukulu mmukutume!
35Yezu kukanyina mukishi mubi bikole, wela diyi ne:
— Puwa! Patuka munda mua muntu ewu!
Ke mukishi mubi kukulula muntu panshi, bantu bonsu batangile. Mukishi awu kupatuka munda mua muntu, kauyi mumuenzele bualu bubi nansha bumue. 36Bantu bonsu bavua bakema, bakonkangana ne:
— Edi ndiyi dia mushindu kaayi? Muntu ewu udi utumina mikishi mibi diyi dia bumfumu ne dia bukole, yoyi payi ipatuka! 37Nanku bantu bavua bayukidilangana bikole bualu bua Yezu mu buloba bujima abu.
Yezu udi ujikijila babeedi ba bungi masama
(Mat 8.14-17; Mar 1.29-34)
38Yezu umuka ku nzubu wa ditendelela wa bena Yuda, kuyaye ku nzubu wa Simone. Mamuende wa Simone uvua usama mubidi luya lukole. Nanku kulombabu Yezu bua amujikije disama. 39Yezu kuinama pavuaye, kutumina disama dia mubidi luya diyi. Disama kujikadi! Mamu awu diakamue kutuadija kubalongoluela biakudia.
40Diba dimane kubuela,#4.40 Tangila Mar 1.32 ne diumvuija . bantu bonsu kuya kudi Yezu ne babeedi bavua ne masama mashilangane. Yezu uvua ubatenteka bianza ku muntu ku muntu, ujikija masama abu. 41Mikishi mibi kabidi ivua ipatuka munda mua babeedi bavule, yela mbila ne: “Wewe udi Muana wa Mvidi Mukulu!” Kadi Yezu uvua uyikanyina, uyikandika bua kayakudi, bualu ivua mimanye ne: Yezu udi Kristu, Musungidi mutulaya.
Yezu udi ulongesha mu ditunga dia Yudeya
(Mar 1.35-39)
42Butshia, Yezu kumuka mu tshimenga, kuya pa muaba wa nkayende. Bantu bavule kumukeba. Bamane kumusangana, bavua basue bua ashale munkatshi muabu, bamukandika kabidi bua kayi muaba mukuabu to. 43Kadi Yezu kubambila ne:
— Ndi ne bua kulongesha kabidi Lumu lua Disanka lua Bukalenga bua Mvidi Mukulu mu bimenga bikuabu. Ke tshidi Mvidi Mukulu muntumine!
44Nanku kuyaye kulongesha mu nzubu ya ditendelela ya mu ditunga dia Yudeya.#4.44 Yudeya: tangila 1.5 ne diumvuija .
Currently Selected:
Luke 4: TSH96
Tõsta esile
Share
Kopeeri
Want to have your highlights saved across all your devices? Sign up or sign in
Bible avec Livres Deutérocanoniques en Tshiluba © Société Biblique de la R. D. Congo, 1996