Genesisi 11
11
Txitezi txa Bhabheli
1Sekoko kotshe ha mafuni, ku ti ti ni lidimi limwelo, ni mawombawombelo mamwewo. 2Ti di ngeto, vathu va to khukha na va txita ngu wutxani, se ve mana libala ditikoni ka Sinari; ve ti akela ka lona. 3Se va to angulana, va txi kha vona:
“He wumbeni sitini, hi si hisa kha kwati ngu mndilo!”
Sitini i ti ti marigwi a kona, ani ndope i ti ti semende ya kona. 4Va to kha vona:
“A hi ti akeleni didhoropa ni txitezi, atxiya txiroro txa kona txi no hoka nzumani, se ditina dathu di na va ni nduma, kasi ku hi si hangalaswi ka otshe mafu.”
5Sekoko Mkoma, ngu konaho, a to relela, kasi kuya wona didhoropa ni txitezi txi vanana va vathu va nga ti aka. 6Se Mkoma a to womba, a txi khene:
“Wonani, taku mbathu vamwevo, kambe votshe mba lidimi limwelo. Akuwa va nga khatisa tiya, txi walo txo va tandekisa kumaha txilo, ka totshe ti va ti lavako. 7A hi txhikeni hi txi ya hambanisa lidimi lawe, kasi ku mmwani asi swi a txi engisa lidimi la mmwani.”
8Sekoko Mkoma, a to va hangalasa txitimwi ka otshe mafu, ve leka kuaka didhoropa. 9Ngu mhaka yeto, m'ti wule wu dhanwa ku#11:9 Ati ti wombako ku pfilu-pfilu. i Bhabheli, nguko ngu koneyo Mkoma a nga hambanisa kuwombawomba ka vathu va mafu otshe, kambe ku khatete koneyo ku hangalaswa ka vathu ni dotshe ditiko ngu Mkoma.
Liveleko la Semi
(1 Makronika 1:24-27)
10Ngu tiya tiveleko ta Seme: Mbimo yi Semi a ngadi ni tanga ya dizana; da malembe, a to veleka Arifaxadhe, ma di pindile malembe mambidi msana ka ndambi. 11Msana ka kuvelekwa ka Arifaxadhe, Semi a hanyile kambe 500 wa malembe, se e veleka vanana va majaha ni vamahorana.
12Arifaxadhe a di ni magumi mararu a malembe ni mtxhanu, se a to veleka Sala. 13Msana ka kuvelekwa ka Sala, Arifaxadhe a hanyile 403 wa malembe, se e veleka vanana va majaha ni vamahorana.
14Mbimo yi Sala a nga va ni tanga ya magumi mararu a malembe, a to veleka Ebheri. 15Se msana ka kuvelekwa ka Ebheri, Sala a hanyile kambe 403 wa malembe, se e veleka vamwani vanana va majaha ni vamahorana.
16Mbimo yi Ebheri a nga ti ti ni magumi mararu a malembe ni mune, a to veleka Pelege. 17Msana ka kuvelekwa ka Pelege, Ebheri a hanyile 430 wa malembe, se e veleka vamwani vanana va majaha ni vamahorana.
18Mbimo yi Pelege a nga va ni magumi mararu a malembe, a to veleka Rewu. 19Msana ka kuvelekwa ka Rewu, Pelege a hanyile 209 wa malembe, e veleka vamwani vanana va majaha ni vamahorana.
20Mbimo yi Rewu a nga va ni magumi mararu a malembe ni malembe mambidi, a to veleka Sarugi. 21Msana ka kuvelekwa ka Sarugi, Rewu a hanyile 207 wa malembe, se e veleka vamwani vanana va majaha ni vamahorana.
22Mbimo yi Sarugi a nga va ni tanga ya magumi mararu a malembe, a to veleka Nahori. 23Msana ka kuvelekwa ka Nahori, Sarugi a hanyile 200 wa malembe, se e veleka vamwani vanana va majaha ni vamahorana.
24Mbimo yi Nahori a nga va ni magumi mambidi a malembe ni mtxhanu ni mune, a to veleka Tera. 25Msana ka kuvelekwa ka Tera, Nahori a hanyile mamwani malembe a 114, se e veleka vamwani vanana va majaha ni vamahorana.
26Se mbimo yi Tera a ngadi ni mtxhanu wa magumi ni mambidi a malembe, a to veleka Abramu, Nahori ni Harani.
Liveleko la Tera
27Ngu liya liveleko la Tera. Tera a to veleka Abramu, ni Nahori, ni Harani. Harani a to veleka Loti. 28Harani a fite a di ngadi a txi hanya tate wakwe Tera, a fete didhoropani ka Uri, ahawa a nga velekelwa kona, ditikoni ka Vakaldheya.
29Abramu ni Nahori va to teka vasikati. Msikati wa Abramu a ti dhanwa ku i Sarayi, msikati wa Nahori a ti dhanwa ku i Milka, mwanana wa dihorana wa Harani, i nga ti tate wa Milka ni Jesika. 30Kambe Sarayi i ti ti txifule, ati si nga ni vanana.
31Tera a to teka mwanana wakwe Abramu, ni mtukulu wakwe Loti, mwana Harani, ni mame wakwe Sarayi, msikati wa Abramu, e rura navo ditikoni ka Uri ka Vakaldheya, ve tsula ditikoni ka Kanana, aniko, va di hokile ditikoni ka Harani, va to aka ve zumba kona. 32Tera a hanyile 250 wa malembe, se ngu msana a fete Harani.
Currently Selected:
Genesisi 11: BEC2016
Tõsta esile
Share
Copy
Want to have your highlights saved across all your devices? Sign up or sign in
A Bíblia em Txitxopi © Bible Society in Mozambique, 2016.