MATEO 4
4
Edosiquiaa Jesosa queamimishi epomeejji nisho a-ajjacapoa
(Mc 1.12-13; Lc 4.1-13)
1Majoya aje Edojjoshahuapameya Jesosa dojocapoa se-ejjama' meshijabohuasijje. Ma meshijabojo nequiya edosiquiaa Jesosa queamimishi epomeejjinisho a-ajjacapoa.
2Jesosa majotii nequi 40 cahuime huiso epojja mecajje pea-ai ijjiaijjiajjimanei aniapoa, bobima'tii poa. Jamajjeya oya queashoenee poani jjabaquiapoa. 3Majotii o anijoya edosiquiana Jesosa queamimishi pomeeya nisho jjanequichipiquiapoa oque. Ohuaya Jesosa jama acapoa ba'a: —Miya e'ejojonei Eyacuiñajjija Bacuaejjanei poani jjabaquimajje jiquio ani meicuana pahui pojji acue.—
4Jesosaa oya saja-acapoa jama ba'a: —¡Chojja de! Eyacuiñajjija esohui etehue jaa jama poani ba'a: “Dejjacuana caca bobineijotii pojjeama eshe ba'ecapoquiani. Ojjaña Eyacuiñajjija esohui pea-ai bacajji queajjashahuabaquija'a eba'epoquijji.”—
5Majoya aje edosiquiaa Jesosa dojocapoa Eyacuiñajjija meshi queapamenee Jerusalenyasijje. Majo aniya edosiquiaa Jesosa dojosohuaquicapoa Eyacuiñajjija equi-aijamacoo quea-aonee aniyasijje. 6Oja equi-aijamacoo quea-aoneejo nequiya edosiquiaa Jesosa jama acapoa ba'a: —Miya e'ejojonei Eyacuiñajjija Bacuaejjanei poani jjabaquimajje jiquiojo nequi tohua'yocue meshiyasijje. Eyacuiñajjija esohui etehue jaa jama poani ba'a:
“Eyacuiñajjiya oja angelcuana huoojeacaje mi jaahuananeineiya.
Miya oqueajo iñacajjequije angelcuaa oja emeya.
Jamajjeya miya emano'yojji pojjeama poaje.
Miya ejjajeojjiquecuasajaquijji pojjeama poaje joya anica meicuanajo
che bisonei cuanama'.”—
7Jesosaa oya saja-acapoa jama ba'a: —Eyacuiñajjija esohui etehue jaa jama poani pea ba'a: “A'a Eyacuiñajji queaca'aneetii poani ebajji, a'a ohuaya jaahuanacaje ebajji, ¡a'a Eyacuiñajji miquea Emeshimesenei jama ajji!”—
8Majoya edosiquiaa Jesosa dojosohuaquicapoa eyiyojamacoo quea-aonee nequiyasijje. Majo nequiya edosiquiaa Jesosa ojjaña meshicuana ecuiña se-ejjajji, ojjaña aquianacuana pea-ai bameejeyocapoa queapamenee queaquemonee ani. 9Ojjaña meshicuana bameejeyomajje edosiquiaa jama acapoa oya ba'a: —Ojjaña jiquio miya baña huisotii eyaya miya jjeya quiaje e cojjaneijo miya ecuioshajjajo nequiajo e bihuiajji.—
10Jesosaa oya saja-acapoa jama ba'a: —Chojja de, queahuesha miya ebionei eshahua Satanás poquicue jiquio enijje nequi. Eyacuiñajjija esohui etehue jaa jama poani pea ba'a: Emeshimesenei, mique Eyacuiñajji oya oenei bihuiapoquiacue, ojoneitii jjashajja-ajjaquipoquicue.—
11Ohua esohui jama acajo edosiquiaa Jesosa jiñacapoa. Majotii ani Jesosa bobiacapoa angelcuaa oque poemajje.
Jesosaa oja echacojji acoocapoa provincia Galilea meshijo nequiya
(Mc 1.14-15; Lc 4.14-15)
12Majoya aje quijjepishana Juan ona iñajeanobiajji poani dejja jeanobiacanaje cuaa ejjajeanobiaquijji ani equiyasijje esohui yecapoa cuaa. Jesosa ma meshijo pea-ai ani ma esohui shajja-ajjamajje poquiapoa provincia Galilea meshiyasijje. 13Jesosa Nazaret meshijo anipishanamajje poquiapoa pueblo Capernaúm meshiyasijje majo ba'eya. Capernaúm meshi baesahuapejjeneijo aniapoa. Ma meshi Zabulonja osecuacuanaja, Neftalija osecuacuanaja pea-ai poa. 14Jamaya Jesosa ma meshijo ba'yapoa ma ecua yahuajonei esohuihuohuijji poa dejjaa Isaías bajjaniya tehuecapoa majoya ba'eje jayojjaya.
15-16Isaiasya jama tehueme acapoa ba'a: “Zabulonja jjeshe meshicuiñajjicuana, Neftalija jjeshe meshicuiñajjicuana pea-ai, joya Jordán cuei eshequi jaasohuanimijijje ba'ecacuana pea-ai, joya Galilea bae-aisahuajo ba'ecacuana pea-ai ma judío pojjeamachipineijo ba'ecaya quea-aapo jayojja ba'epoquinaje macuiñajjicuanaya. Jjeya oe queajeaja'anee poani bacanaje cuaa oja meshijo nequi. Ojjaña joya quea-aapo jayojja ba'ecacuana, joya emano'yo jayojja poanicuanaya jeaja'acaje maaya.” Jama tehuemeya acapoa yahuajonei.
17Ma ba'ijotiiya aje Jesosaa esohui huohuicoocapoa cuana. Jama huohuime acapoa ba'a: —Pea jjashahuabaquime quiana oe po'yocue miquianaja mimishijo. Eyacuiñajji, ojjañacuana huoojeapoquiajjitii poani, jjeyahuanei poeje.—
Jesosaa nahuooshojeajji poanicuana iyaacapoa onijje epo'yojji
(Mc 1.16-20; Lc 5.1-11)
18Majoya aje Jesosaa Galilea bae-aisahuajje poquijeya Simón, oja chahua Andrés pea-ai bacañaquiapoa nahuoo shojeapoequi. Oya nahuooshojeajjinei poa. Simón bajjani pea poa ba'a: Pedro pea-ai. 19Jesosaa ma beca dejja huohuicapoa jama ba'a: —Enijje po'yocue. Jjeya miquiaa nahuoo shojeapajeaje'yo. Jiquio ecua miquiaa nahuoo sa-ajjaneinequinaje jama pea-aiya miquiaa dejjacuana sa-ajjaje ecuea epeejji epo'yojji.—
20Jamajjeya manei eshequi nequijotiiya ojaya eshojeajjicuana jeacana'yapoa Jesosanijje epo'yojji. Majoya oya poqui'yapoa onijjetii.
21Jesosaa poquipishananiya pea dejja Santiago bacapoa Juannijje, o dohue pea-ainijje nequi. Oya Zebedeoja bacuaejja poa. Oya bishe'aijotii ani nahuooshojeajji sipi'yo po-aniapoa. Jesosaa oya iyaapea-aicapoa o dohue pea-ai. 22Jamajjeya manei eshequi nequijotiiya ma beca dejjaa oja bishe'ai, oja chii Zebedeo pea-ai jeacana'yapoa Jesosanijjetii epo'yojji.
Jesosaa esohui huohuicapoquiapoa queahuiso pea meshicuanajo ba'ecacuana
(Lc 6.17-19)
23Majoya aje Jesosa ojjaña provincia Galilea meshiyasijje poquinequiapoa. Cua o poquije meshicuanahuasijje Jesosaa judioja equi-ai ejjachichaquijjijo nequiya sohuihuohuicanequiapoa cuana. Ohuaya esohui queapame huohuicapoquiapoa cuana Eyacuiñajji poecuajije ojjañacuana huoojeapoquiajjitii po'yohua. Emano jaacacuana jja-ajameequica'yapoa pea-ai, ma queanee poacuana pea-ai huaquiameeca'yapoa Jesosaa. 24Queahuisocuaa ojjaña Siriacuiñajjicuaaya shajja-ajjacapoa Jesosajo ohua emano jaaca jja-ajameequica'yonajejo. Jamajojoya aje macuiñajjicuaa provincia Galilea meshiyasijje emano jaacacuana queahuisonee yecapoa Jesosaque. Joya queamanonee jaacuana, pea queanee jaacuana, pea eshahuamase yamijjicuana, pea sapaniñecuana, pea jeoajjacuana pea-ai yecapoa cuaa Jesosaque. Ma pojjajotiiya aje ohuaya onaja ye ojjañatii emanocuana jja-ajameequica'yapoa, huaquiameeca'yapoa cuana pea-ai.
25Jamajjeya queahuiso meshicuiñajjicuana Jesosanijjetii nequipoquiapoa cua o poquije meshicuanahuasijje. Galileacuiñajjicuana, Decapoliscuiñajjicuana, Jerusalén meshijo ba'eca, Judeacuiñajjicuana, Jordán cuei eshequi jaasohuanimijijje ba'ecacuana pea-ai onijjetii nequicapoquiapoa.
Currently Selected:
MATEO 4: ESE
Tõsta esile
Share
Copy
Want to have your highlights saved across all your devices? Sign up or sign in
Copyright Mision Nuevas Tribus, 2006