MATHIUS, NOPUKU AFASAO SORE, 7.
NOPUKU AFASAO SORE, 7.
1NATSHICINA acowa koutucua Ioria pe aia seioria acowa.
2Ma hepe acowa ioria, aia kaioria acowa; ma hepe acowa kotufwa anea, aia katufwa foci iacowa.
3Tiaha akoi kowcitia ane isa sisi ia foimata o tshou noso, kaia sectiamana ane isa sore konofo ia tshou foimata?
4Mo tiaha akoi koutucua ia tshou noso, Erefia avau kamke ane isa sisi konofo ia tshou foimata; ma sectiamana ane isa sore konofo ia tshou foimata?
5Akoi aroto erua, mokagi amke ane isa sore watafa tshou foimata; ma wamuri ia akoi kowcitia erefia keiamke ane isa sisi watafa foimata o tshou noso.
6¶ Sekatufwa ane tapu ia akuli, foci jimra nagi aperl tshowa emoa apakasi, mo acre takamia acre iraro novai tshare, ma tafuri komai foci eifasia acowa.
7¶ Nogia, ma aia katufwa iacowa; sara, ma acowa kamo; tuctucia, ma aia katshike iacowa.
8Ma iotshi tagata kanogia, katufwa iacre; aia kasara aia kamo; ma ia aia katuctucia aia katshicea.
9Mo wehe tasi tatane o acowa, pe tshana nontariki nogia aia keitufwa aofa, ma aia katufwa aia ta fatu?
10Mo pe aia kanogia eika, tiaha katufwa aia agata?
11Pe acowa tagata isa, keiro keitufwa ane erefia ia erecriki tshowa, sore kagi acowa Tamanowa ia taragi katufwa ane iotshi erefia ia acre kanogia aia iateia.
12Ia ane nei ane iotshi acowa acitiafakarafia tagata keimna iacowa, erefia acowa magane hepra iacre; ma tinei kafakairo o tafasao tapu ma o aprofeta.
13¶ Roro acowa ia tafeitoca kivi; ma sore tafeitoca, ma sore ta teretu, fano ia ta karoiai, ma tagata nalupai kororo ia aia.
14Ia ane nei kivi tafeitoca, ma kivi ta teretu, fano ia aneamouri, ma tagata toru ana kacitia ma roro iai.
15¶ Fatshigeia acowa ma natshicina aprofeta korefu, acre koromai iacowa ia umega o ta sip, kaia arotorea iauiai ane hepe akuli eiro.
16Acowa keiro acre ia magane tshare. Tiaha tagata kaitoria veini o asoni, mo tsharupe o tereakau matatara?
17Hepra iotshi foirerakau erefia amo nuhua erefia, kaia foirerakau isa kofua nohua isa.
18Ta foirerakau erefia sekofua nohua isa, hepe ma ta foirakau isa puspusi kofua nohua erefia,
19Iotshi foirakau sekofua nohua erefia kotoutshiace, ma kofakarerecea ia tiafi,
20Ia tshare nohua acowa keiro acre.
21¶ Jimra iotshi tagata koutucua iatavau, Teriki sore, karoro ia ta vaka o taragi; kaia aia maganerefia hepe ta fakairo o tshaku Tata ko ia taragi.
22Nalupia tagata katucua iatavau ia taha nopoge, Teriki sore, acime nifasao ia neigo tshou, mo? ma ia neigo tshou acime segeake agelo isa mo? ma ia neigo tshou acime neimna ane sore nalupia mo?
23Ia taha nopoge tira avau katucua iacra, Avau sekeiro acowa; roro acowa natshicina avau, acowa tagata maganisa.
24¶ Ia ane nei, aia nifakarogona afasao tira tshaku, ma maganerefia iateia, avau katucua aia hepe tatane arapaku, aia nifakaturia tafare tshana iluga tafatu sore;
25Towa nito, tavai tafe nitafe sore, tumtagi sore ma nisau, ma tafare sekoto ma aia nikeria tshana tave fare iluga tafatu sore.
26Acre iotshi tane fakarogono afasao tira tshaku, ma semaganerefia iateia, katucua aia hepe tatane tano nifakaturia tshana fare iluga tawne;
27Towa nito, tavai tafe sore iateia, ma tumtagi nisau, nipuria tafare; aia nito, ma neifasia aia isa.
28¶ Ane nei nimai, wamuri Iesu neitucua iotshi afasao tira, tagata iai nimasaro ia tshana fakairo;
29Ma aia nifakairo acre hepe tasi niamo tomatua, ma jimra hepe tagata serea tatapuria nifakairo.
Currently Selected:
MATHIUS, NOPUKU AFASAO SORE, 7.: ANT
Tõsta esile
Share
Copy
Want to have your highlights saved across all your devices? Sign up or sign in