ɛYohana 4
4
ɛYɛso gha kɛ Bol ne ɛDɛ ɛKuk ne iSamariya Gha
1niFarisawa na ne kaa phok wu ɛYɛso gha sɛɛs ninyi ɛ ta i yaak nibhɛ ne ibatisima ɛ phyin ɛYohana yegha. 2(Sɔng ne ma yung so ɛYɛso gha ne ito ɛbhɛ ɛbhɛ kaa yaak ninyi na ne ibatisima de nang, ninɔn ne icwam ɛbhɛ nibhɛ kaa mɔn ɛlɛy). 3Kɛ ne sɛ ɛYɛso gha kɛ seng ɛlɛ wo, ne ɛ tek ivel ne iYahudiya da ɛ kyii ɛ phɛɛs ne ivel ne iGalili.
4iPhɛ kaa ne so ngbingbing ɛYɛso gha phyii roos ɛgarang ne iSamariya. 5Ne ɛbhɛ tuu ɛdɛ ɛgarang ne iSamariya gha ne i bok ɛbhɛ iSiika. ɛGarang ngɛghaa nggyɛ wo so cɛcɛk ne ihwap ne ɛYakub kaa nang ɛNgɔn ɛbhɛ ɛYisifu ye. 6ɛYek ɛYakub kaa ne so ɛnggyɛ wo, ɛYɛso gha ne soos ɛnu ɛyek ka ɛ phɔng, daa ɛli ne ihywel da kaa te ɛbhɛ ɛ ruuti. ɛLɔ yɛ kaa ne so ɛceree ne nggbay.
7Ne sɛ ɛdɛ ɛkuk ne iSamariya gha kɛɛ tuu, ɛ yɛɛs ne tok ne inɛn da, ɛYɛso gha ne yaak ɛbhɛ, “Nang me inɛn ba te n sɔ.” 8ɛLɛy, ninɔn ne icwam ɛYɛso na kaa yek ndɔ ɛgarang nibhɛ yung say ire.
9ɛKuk ka ne kyii nɛ ɛ yɔngɔ, “Ɛ soyɛ ɛnyi ne niYahodawa ne nzo ɛkuk ne iSamariya, aa ne mɔn ɛlii ɛ phom me inɛn baa?” ɛKuk ka kaa boote ɛlɛ wo ɛli ne sɔng ninyi ne niYahodawa na nɛ ninaa ne iSamariya na kaa bok ìtsɛm mang.
10ɛYɛso gha ne kyii ɛbhɛ nɛ ɛ yɔngɔ, “Sɛɛ yɔng ɛ yɛɛ ɛkɔn negha ne ɛTaanggbey yaa nang ngo, ɛ ta i yɛɛ ɛnyi gha ne ɛɛ phomos sɛ inɛn ba nang, ɛ sɛɛ ne ku roo ɛbhɛ, ɛ sɛɛ ne nang ngɛ inɛn ne mpɛ nang iken.”
11ɛKuk ka ne yɔngɔ, “ɛNdiinday, sɔng ɛ bok ɛguuga ne tok inɛn da nang, ɛyek ka ne so kyukyum. Aa ne le ne inɛn da ne mpɛ nang iken da ɛbii? 12Ɛ jung phyin ɛkyɛɛ mos ɛYakub bhe ne ɛbhɛ kaa has njwii ɛyek kɛghaa woo? Ɛ kaa ne sɔ inɛn nɛ, ninɔn ɛbhɛ ma sɔ ᐩigyol ɛbhɛ phyii sɔ.”
13ɛYɛso gha ne kyii nɛ ɛ yaak ɛbhɛ, “Gbik ɛnyi gha ne ɛ kɛ sɔ inɛn nɛdaa wo, irway ɛbhɛ yaa ne jung ta i has. 14Gbik ne iphɛ ɛlɛy, ɛhaa ne ɛ kɛ ne sɔ inɛn da ne naa nang ngo, sɔng aa ne tang phok irway ne has ba nang. iNɛn da ne naa nang ɛbhɛ wo yaa te te ɛncincɛk ndɔ ɛbhɛ wo, mpɛ ne ji naas iken ne inat.”
15ɛKuk ka ne yaak ɛbhɛ, “ɛNdiinday, ne ɛ nang me inɛn nɛdaa nggyɛ wo te mpɛ phoo me irway ne has da, n da kɔɔng me yɛɛset ɛnu ɛyek ka cɛcɛɛy yo nzi tɔk inɛn da.”
16ɛYɛso gha ne yaak ɛkuk ka, “Cwi ɛbhɛ yel-le ɛras mo ɛ yɛɛs nɛ.”
17ɛKuk ka ne yaak ɛbhɛ, “Sɔng n bok ɛ̀ras sang.”
ɛYɛso gha ne yaak ɛbhɛ, “Ɛ kɛ mɔng itin nɛ ne ɛɛ bo wu hang ɛ bok ɛras sa, 18ɛ kɛ sunusi niras sa nibhɛ kɛ hɔn iwii. ɛNyi gha ne ɛ so ɛn ne ɛbhɛ ɛlyilyɛghaa wo sɔng ɛ soye ɛ̀ras mo nang.”
19ɛKuk ka ne yɔngɔ, “ɛNdiinday, nzi yaang ɛ soyɛ ɛnɛbi. 20niKyɛɛ mos sa kaa re ɛTaanggbey yegha ntsong ngga daa ne ɛwarang ngɛwoo nggyɛ, nyinɛn niYahodawa na nang, ɛɛ ne bo ɛn wu iYɛrushɛlɛm iphɛ soye ɛlɔ gha ne yaa bhɛ re ɛTaanggbey yegha ne ntsong ngga.”
21ɛYɛso gha ne yɔngɔ, “ɛGyinɛ ɛNyɛn ɛɛy, nang ne itin nɛ ne ibol de ne nzi tɔng ngɛ wo, nten yaaso ne sɔng ninyi na sɛ ta bhɛ re ɛTaa yegha ntsong ngga ne ɛwarang ngo nang, sɔng nibhɛ sɛ ne ta re ɛbhɛ ne iYɛrushɛlɛm nang. 22Nyinɛn ninyi ne iSamariya na, ɛ re ɛn ɛkɔn na ne ɛ doo ɛn ntsong ngga, njwit niYahodawa na nang njwii ne yɛɛ ɛnyi gha ne njwii re ɛbhɛ nɛ, daa ɛli ne ɛTaanggbey ya sɛ lenɛ nɛ niYahodawa na ɛ phɔt ɛzay ya. 23Gbik ne iphɛ ɛlɛy nten ne yaaso, iphɛ kɛ ma yung ku tuu, nɛ ninaa ne re ntsong ntin da sɛ re ɛTaa yegha ntsong ngga nɛ ntin nɛ gbik ikabyik, daa ɛli ne ihywee ninyi yɛdee nggyɛ wo ne ɛTaa gha i tɔk. 24ɛTaanggbey ya soye ikabyik; iphɛ ne so ngbingbing ninaa ne re ɛbhɛ ntsong ngga re ɛbhɛ nɛ ntin nɛ ne ikabyik.”
25ɛKuk ka ne yɔngɔ, “Nzi yɛɛ ɛMɛsaya gha ne i ta bok ɛbhɛ ɛKiriti, sɛ yɛɛs. Sɛ́ ne sɛ ɛ kɛ yɛɛs so, ɛ sɛ ne i tɔng njwii nikɔn na gbik.”
26ɛYɛso gha ne yɔngɔ, “Mee wo, ne nzi bol ne igyɛ wo, mee nzo me ɛbhɛ.”
27Nten nɛdee nggyɛ wo, ninɔn ne icwam ma ne shii tuu, nibhɛ ne wum ɛnu ɛli nɛ nibhɛ kɛɛ sɛ ɛbhɛ ɛ bol ne ɛkuk ka. Sɔng ɛdɛ ɛbhɛ ne phom ɛYɛso yegha ɛ yaak ɛbhɛ, “iKyee iphɛ kɛ te ɛ bol ne ɛkuk kaa?” Sɔng ɛdɛng ne kyii ta phom ɛkuk ka ɛ yɔngɔ, “iKyee ne ɛ sim mee?”
28ɛKuk ka ne tek iron inɛn ɛbhɛ de ɛ kyii ɛ phɛ ndɔ ɛgarang nga ɛbhɛ yaak ninyi na, 29“Yɛɛs ɛn, ɛ yaang ɛn ɛnyi gha ne ɛ kɛ tɔng me nikɔn na ne nggɛ ku mɔn gbik ko! Hang ɛbhɛ ɛ yung so ɛKiriti gha naa?” 30Ninyi na ne wuusi ndɔ ɛgarang nga nibhɛ phɛɛs ɛlɔ ɛYɛso gha.
31Kɛ ne so ɛnggyɛ wo, ninɔn ne icwam ma ne yaak ɛYɛso yegha, “ɛKyɛɛ ne icwam, re ire de.”
32ɛYɛso gha ne yaak nibhɛ, “N bok idɛ ire de ne naa re ne hame ɛ yɛɛ ɛn ɛkɔn daa ne iphɛ.”
33Ninɔn ne icwam ma ne yaa bol ndɔ nibhɛ nibhɛ bo, “Hang ɛdɛ ɛnyi kɛ yung nang ɛbhɛ idɛ ire de naa?”
34ɛYɛso gha ne yaak nibhɛ, “iRe nge de so; te mɔn ɛkɔn na ne ɛnyi gha ne ɛ kɛ tom me wo ɛ sim, te ne n taal ɛtomɛ gha ne ɛ kɛ nang me wo. 35Ɛ bok ɛn idɛ ibol de ne iphɛ bo, ‘iPhɛl lɛ kɛ mak iphɛ nwaas ji ho ne pha ire de.’ Nzi ne bok nyini, wɛɛ ɛn ɛhay ya yɛnɛng; ire de kɛ bel ne yaa pha wo. 36Kɛ ne ho ne táal ɛhaa ne pha ire gha ilong ɛbhɛ, ɛɛ pha ɛ phɛɛs nɛ ne iken ne inat, te ɛhaa ne tubhus sa ne ɛhaa ne pha gha gbik nibhɛ yɛk irway ihwala. 37ɛBɛ wo ne ibol de ne iphɛ bo, ‘ɛDɛng kɛ tubhus, ɛdɛng ne ji pha,’ ne so itin nɛ. 38Nggɛ tom nyini te ɛbhɛ pha ɛn ire ne hame nyinɛn ɛ kɛ tubhus ɛn. Nidɛng nibhɛ kaa sɔ nggbang ngɛ, nyinɛn ɛ kɛ ne ji pha ɛn ilong nibhɛ de.”
Ninyi ne iSamariya na Kɛ Nang ne iTin nɛ ne ɛYɛso Gha
39Ninyi ne iSamariya na gbom nɛ nibhɛ kaa so ɛgarang ngɛgha nggyɛ wo kaa ne nang ne itin nɛ ne ɛYɛso gha daa ɛli ne ɛkuk ka kɛɛ yɔngɔ, “ɛNyi yɛghaa wo kɛ tɔng me nikɔn na ne ngga ku mɔn no gbik.” 40Ne sɛ ninyi ne iSamariya na kɛ phɛ ɛlɔ ɛbhɛ gha, nibhɛ ne roo ɛbhɛ wu te ɛ kyi phyɔngɔle ɛgarang inɛn na. ɛYɛso gha ne shɛɛ nɛ ɛ hɔn nituk ifaa.
41ɛByin ninyi na gbom ne ta nang ne itin nɛ lenɛ ne ivol ɛYɛso da, 42nibhɛ ne yaak ɛkuk ka, Sɔng njwi kɛ nang ne itin nɛ wo daa ɛkɔn na ne ɛ kɛ mɔng njwii wo nang, njwi kɛ nang ne itin nɛ daa ɛli njwit ne ito mos, njwi kɛ phok ɛbhɛ, njwi kɛ ne ji seng ɛtsak ɛbhɛ ɛ soye ɛHaa ne Phɔt ɛZay ya.
ɛYɛso gha Kɛ te ɛNgɔn ɛNdiinday ɛKen
43Kɛ ne sɛ nituk ifaa na kɛ phee, ɛYɛso gha ne tek ɛgarang ngɛ ɛ phɛ ne iGalili. 44Daa ɛli ne ɛYɛso gha, ne ito ɛbhɛ, kaa ku boote ɛ yɔngɔ, wu hang i nang ɛnɛbi ne ndiinday ɛgarang ɛbhɛ.
45Kɛ ne sɛ ɛYɛso gha kɛ bhɛ tuu iGalili de, ninyi ne iGalili na ne wuru gbarang nibhɛ bhɛ say ɛbhɛ ne irway ihwala, daa ɛli ne kaa sɛ nibhɛ kɛ phɛ ne iDira ne Tes iDee Tsak ko, nibhɛ ne yaang nikɔn na gbik ne ɛ kaa mɔn ne iYɛrushɛlɛm be nten ne idira de.
46ɛYɛso gha ne ta phɛ ne iKaana ne ɛ so ne iGalili, ɛlɔ gha ne ɛ kaa hyere inɛn da mpɛ teye inɛn ɛnap ba. ɛDɛ ndiinday ne ivel la kaa ne so ɛnggyɛ wo ne ɛngɔn ɛbhɛ kaa so ne ɛgarang ne iKafanahum, ɛ so shwa. 47Kɛ ne sɛ ɛnyi yɛghaa nggyɛ kɛ phok wu ɛYɛso gha le ne iYahudiya ɛ yɛɛs ne iGalili de, ne ɛ phɛ ɛbhɛ roo ɛYɛso yegha wu te ɛ yɛɛs ɛbhɛ te ɛngɔn ɛbhɛ ɛken ne ɛ so ɛnu ne iku.
48ɛYɛso gha ne yaak ɛbhɛ, “Sɛ yɔng ɛ kɛ sang yaang ɛn nyu nikɔn ne kparat ta, sɔng ɛ sɛ ne nang ɛn ne itin nɛ nang.”
49ɛNyi yɛghaa nggyɛ wo ne kyii nɛ ɛ yɔngɔ, “ɛNdiinday, yɛɛs njwi hyel ɛngɔn nge gha tang ku!”
50ɛYɛso gha ne kyii nɛ ɛ yɔngɔ, “Hyil lɛ! ɛNgɔn mo gha yaa shɛɛ ɛken.” ɛNyi gha ne nang ne itin nɛ ne ibol ɛYɛso de, ne ɛ kyii ɛ hyil le. 51Kɛ ne sɛ ɛ tɔ ne nkiinɛ ɛɛ hyil le, nikpuru ɛbhɛ ne sɛ ɛbhɛ, nibhɛ ne yaak ɛbhɛ wu ɛngɔn ɛbhɛ gha kɛ te ɛken.
52ɛNyi gha ne phom nibhɛ nten de ne ɛngɔn na kɛɛ te nɛ wo, nibhɛ ne yaak ɛbhɛ, “iBek ɛbhɛ de kɛ tek ɛbhɛ ne ɛryɛ ɛli ne iroy kɛɛ hyereey.” 53ɛLɛy ɛkyɛɛ ɛngɔn na ne seng nten nɛ so cɛcɛɛy ne nten de ne ɛYɛso gha kɛɛ yaak ɛbhɛ, “ɛNgɔn mo gha yaa shɛɛ ɛken.” iPhɛ ɛlɛy yang, ɛnyi yɛghaa nggyɛ wo ne ijwee ɛbhɛ gbik ne nang ne itin nɛ ne ɛYɛso gha.
54ɛNggyɛ wo ɛbhɛ kaa ne so nyu ɛkɔn ne kparat ne ifaa yɛ ne ɛYɛso gha kɛ mɔn ɛtsim mɛ ne ɛ kɛ bhɛ kyii ɛgarang ne iYahudiya de ɛ phɛ ne iGalili de.
Currently Selected:
ɛYohana 4: etxNT
Tõsta esile
Share
Copy
Want to have your highlights saved across all your devices? Sign up or sign in
© Wycliffe Bible Translators, Inc. and
© the Nigeria Bible Translation Trust 2018
in cooperation with
iTen Language and Bible Translation Project