Mwandzo 7
7
1Halafu Mwenyezi Mlungu achimuambira Nuhu, “Injira melini uwe, mcheo na anao osi ili nikutivyeni,#7:1 Ili nikutivyeni: Maneno higa tagamo kpwenye tafasiri zanjina. mana nkaona uwe ndiwe mutu uhendaye haki kahi ya chivyazi chichi. 2Kahi ya nyama a kuriwa, hala nyama sabaa a chilume na sabaa a chichetu. Na nyama asioriwa, hala airi, mlume na mchetu. 3Piya hala nyama a mapha a chila aina sabaa alume na sabaa achetu ili aina zao zisiangamike phapha duniani. 4Siku sabaa kuandzira rero nindareha mvula, na indanya siku mirongo mine, usiku na mutsi, ili niangamize chila chiumbe nrichochiumba phapha duniani.” 5Nuhu wahenda chila chitu ambacho walagizwa ni Mwenyezi Mlungu.
6Nuhu kala ana miaka magana sita wakati Mlungu phoreha mafuriko duniani. 7#Mathayo 24:38–39; Luka 17:27Iye na mchewe, anae na akaza anae ainjira melini ili asedze akahoswa ni go mafuriko. 8Nyama a kuriwa, nyama asioriwa, nyama a mapha na chila aina ya chiumbe chiambalacho photsi, akpwedza kpwa Nuhu, 9airi-airi, mlume na mchetu, achiinjira melini viratu Mlungu vyolagiza. 10Bada ya siku sabaa kusira, mafuriko gachiandza.
Mafuriko
11 #
2 Petero 3:6
Nuhu phokala ana miaka magana sita, siku ya kumi na sabaa ya mwezi wa phiri, pula za madzi za kuzimu zasodoka kpwa nguvu na zichiandza kulavya madzi. Na dzulu mlunguni kpwauduka mvula ya komesha. 12Kuchinya mvula duniani siku mirongo mine, usiku na mutsi. 13Siku iyo-iyo, Nuhu na mchewe, anae ahahu, Shemu, Hamu na Jafeti, phamwenga na achetu ao, ainjira melini. 14Ainjira aho, phamwenga na chila aina ya nyama wa tsakani na wa kufugbwa na chila aina ya nyama a kuhambala na chila aina ya nyama a mapha. 15Chila aina ya viumbe vyakpwedza kpwa Nuhu viiri-viiri, chilume na chichetu na vichiinjira melini, 16viratu vyolagizwa ni Mlungu. Chisha Mwenyezi Mlungu achisindika nyo mryango wa meli.
17Madzi gakala manji hadi meli ichikala inaengelela dzulu-dzulu, mafuriko gaenderera siku mirongo mine. 18Madzi gachienjerezeka sana duniani, na meli ichielea dzulu ya madzi. 19Gachiodzala sana hadi gachiziba myango mire yosi; 20gazidi kuodzala hadi gachifika mita ne dzulu kutsapa virere vya myango. 21Viumbe vyosi duniani vyafwa — nyama, nyama a mapha nyama a kufugbwa, nyama a tsakani, viumbe vyosi vinyendekavyo maipho-maipho duniani phamwenga na atu. 22Viumbe vyosi vyokala moyo kpwenye tsi kavu vyafwa. 23Mlungu waangamiza chila chiumbe chokala moyo duniani — anadamu, nyama, viumbe vihambalavyo na nyama a mapha. Achisala Nuhu tu phamwenga na hara okala naye melini. 24Kuchikala na madzi manji duniani kpwa siku gana mwenga na mirongo mitsano.
Currently Selected:
Mwandzo 7: dig
Tõsta esile
Share
Copy
Want to have your highlights saved across all your devices? Sign up or sign in
© 2019, Bible Translation and Literacy, All rights reserved.