Ageini 7
7
Alele Adwong
1Di Rwot oko waco ne Nua be, “Donyi i yi yee, in karacel kede jo me odi dedede, pien ango atieko neno be in keni en kame ipoore i nyima kikom lwak me kare kanataman. 2Ter karacel kedi leini kanyaare acuo, kede kanyaare amon me egere acelacel kalikame obedo leini me kwer, kede leini kobedo me kwer iteri icuo kede dako me egere acelacel. 3Ter da winy me wi yamo acuo kanyaare kede amon da kanyaare me egere acelacel, pi mino egere gi dong di kuo i wi lobo lung. 4Pien ingei ceng kanyaare ango abino cwano kot i wi lobo pi iceng ot ongwon kede iwor da ot ongwon, di ako bino wearo ki wi lobo jamini akuo dedede kame acweo.” 5Di Nua oko timo gi dedede kame Rwot oudo ociko ne pi timo.
6Mwakini me dongo ka Nua oudo tie 600 i kare kame alele oumo kede wi lobo. 7#Matayo 24.38-39; Luka 17.27Di Nua kede awobe mege kede dako mere kede mon me awobe mege oko donyo i yi yee pi bwot ki alele. 8Kikom leini kalikame obedo me kwer kede leini kobedo me kwer, kede winy kede gi dedede kame liao alia i piny, 9are are, icuo kede dako en odonyo i yi yee kede Nua, bala kame Rubanga oudo ociko kede Nua. 10Kikano ingei ceng kanyaare alele oko bino i wi lobo.
11 #
2 Petero 3.6
I mwaka me tol kanyape (600) me kuo ka Nua, i duwe me are, i ceng me tomon kiwie kanyaare (17) me duwe, i ceng nono wang pie kame tie i lobo oko tutucun, di oko yabo dirisan me malo. 12Kot oko cwei i wi lobo pi iceng kede iwor ot ongwon (40). 13I ceng nono Nua kede awobe mege, Sem kede Kam kede Yapesi kede dako ka Nua, kede mon adek me awobe mege oko donyo i yi yee. 14Gin kidonyo karacel kede leini me obar me egere dedede, kede leini me paco me egere dedede, kede gi dedede kame liao alia i piny, kede winy dedede me egere apapat, gi dedede kame tie kede bwom gi. 15Gi dedede kame tie kede ringokom di kikuo oko donyo are are i yi yee karacel kede Nua. 16Cuo kede mon me gi dedede kame odonyo i yi yee oko donyo bala kame oudo Rubanga ociko kede Nua; di do Rwot oko cego gi i yi yee.
17Alele oko meede i lobo pi ceng ot ongwon (40), di pii oko meede, di eko tingo yee malo kakabor kede wi lobo. 18Pii oko cere eko meede pong i wi lobo, di yee oko donyo lemo alema i wi pii. 19Pii oko pong adikinicel paka mwonyo mori dedede abocoboco i wi lobo; 20en emedo ameda pong paka kalamo wi mori kede mita kanyaare. 21Gi dedede kame tie kede ringokom gi di kioto i wi lobo oko to: winy, leini me paco, leini me obar, kede gimogo kame bwote di kinyidinyidi i wi lobo, kede jo dedede; 22gi dedede kame wei di kitie i wi lobo kakatek oko to. 23En ewearo gikame kuo dedede kame oudo tie i wi lobo, jo kede leini kede gikame liao alia, kede winy me wi yamo, en ewearo gin dedede ki wi lobo. Nua kenekene en oko dong, kede jo kame oudo tie kede en i yi yee. 24Pii oko pong i wi lobo pi ceng tol acel kede ot kany (150).
Currently Selected:
Ageini 7: BILKDC13
Tõsta esile
Share
Copy
Want to have your highlights saved across all your devices? Sign up or sign in
Baibuli I Leb Kumam © Bible Society of Uganda, 2013.