Luka 18
18
A Palung A Chuo The Lipa Nunghlyinung Pakhingpuonabie
1Cakhutaata, Zingsuv ta ziytuv tie kha palung chuo li pata thlaa chuo pari riypa kha pakhingpuonabie a chang yi. 2Ama ta, “Khy khykha lieta Khazing ciy li pata cawsaa hmie zaw a mang lipa bieripatuv byi pakha a aw. 3Capa khy lie ca nunghlyinung pakha aw te, capa nunghlyinung cata, “Tazaa maa cyipa lie hing naa bya thi la,” a vya ta byalya. 4Cuokha chung ca a pakaa, cuorasala a hnangcaw taca, “Khazing ciy li pata cawsaa hmie zaw i mang li raalaa pata 5hing nunghlyinung hing hnaa ina pahnaw pari, a vaw byalya pata riethyi ina pi li riypata a bie ca i ripa aa,” a ta. 6Abyipa cata, “A pha lipa bieripatuv byi ta a ripa hing naathlie tie ung. 7Cacuokieca Khazing ta aa tlawpa, ama'a luo chung zuo ta a upa tie ca ama bie ripa li pata a aw'a yi ma? Iema a bya riypata a pahaa a pasaa'a ma? 8Ica chang yi: Ama bie kha a catli pata a ripa'a yi. Cuorasala Cawsaa Saacapaa aa vaw tiyta alyi lie hing zangna a hmung'a ma?” a ta.
Farasi Tie Hne Ngukhyituv Tie Pakhingpuonabie
9Zingsuv ta hingpa pakhingpuonabie hing, iema'a na iema kha a zangpa, iema kha maa dang tapata a rue yite malie a nutaapa tie kha a chang yi. 10“Cawsaa pahning kha thlaa chuo riypata Biena-ing luo ama cakuo, pakha ca Farasipa cuote a hrangpa pakha ca ngukhyituv ta a cuo. 11Farasipapaa ca ama se ta a daa te hinghaahingta thlaa a chuo, “Vya Khazing, kama ca a ruvhangpa, cawsaa a dung a viepa, aparuvsuena a tuepa hne, hingpa ngukhyituv zaw haahingta i cuo li nakawta icaa law. 12Zaakha chunglie ning hning sa uv ang te, i hmungpa tuokaa bangkhuo taata chehraachekha ica pi,” a ta. 13Cuorasala ngukhyituv ca luohlaapuv luo khata a daa te vuoruo luo hmuo mang nguo li pata a cacunghnaa kha a cung te, ‘Khazing, a suepa kama hing ngie na chi thi tie,’ a ta. 14Ica chang yi: “A hrangpapaa kha cuo li pata hingpapaa hingna duopacu cie pata a ing luo a cakuo; Iema hne iema a cyicalangpa bangkhuo ca pachungpa cuo'a yite, iema hne iema a panepa bangkhuo ca cyicalang pata ama cuo aa,” a ta.
Zingsuv Ta Haatiy Zaw Thluechiy A Pi Yi
(Mat 19:13-15; Mar 10:13-16)
15Cawsaa ta ama saata zaw kha a kuv ta hrie naa se yi tapata Zingsuv'a luo amaa vawkhyi. Ziytuv tie ta ama hmung tiyta cahaa cata tue li riypata khuosa ta ama thlu. 16Cuorasala Zingsuv ta ku yite, “Haatiy zaw ca kama'a luo kha a vaw yi se, thlu kha ung, tahematapakieca Khazing Pena ca hinghaapaapa cawsaa zaw cuo hing tana a cuo. 17Biehmisi tana ica chang yi: Ahunghmuo cuose, Khazing Pena kha haatiyta haahingta a cuhluo lipa ca, capa Pena chung luo ca a ngie khu buohluo'a vayi,” a ta.
A Hnyirungpapaa
(Mat 19:16-30; Mar 10:17-31)
18Uvtuv uvthyi pakha ta Zingsuv kha, “A phapa Saya, chuozaa hringna hmung riypata khaapama i tue aa?” a ta. 19Zingsuv ta, “Khaapanakawma cawsaa phapa ina ta ciy? Khazing ri li pata ahunghmuota pha vayi. 20Phungbie kha na pachang: nungvaathingsuena tue kha, lienaw kha, paruv kha, a hmuo lipa daakhyituv cuo kha, na nung hne na paa kha pa-uvsathyi yi,’ tapata a cuo pakha!” a ta. 21Cawsaapapaa ta, “Hingpa phungbie bangkhuo hing ca i cawta baataata i ziy ciepa na a cuo,” a ta. 22Zingsuv ta capa bie ca a thyi tiyta, “Naa bu kaliepa na suokha a aw. Na hnyipa bangkhuo kha zaa la na tuokaa#18:22 Gk na tuokaa tapa aw vyi. kha siypasapa tie re tie yi, cacuokieca vuoruo lie a hnyirungpa na cuo aa; cakhutaa a vaw la kama kha na ziy tie,” a ta. 23Cuorasala cawsaapapaa ta capa bie ca a thyi tiyta a ngie a chi, tahematapakieca ama ca a hnyirungsa pata a cuo. 24Zingsuv ta ama kha mang te, “A hnyirungpa tie cuota ca Khazing pena chung luo a ngie riypa hing khatluv tama a ruv! 25A hnyirungpa Khazing pena luo a ngie riypa laa taca kala-uv sakha ciphang naakhue chung luo a ngiepa na a na vie,” a ta.
26A bie a thyipa tie ta, “Ahungma khuona ca a hmung khu aa?” ama ta. 27Zingsuv ta, “Cawsaapa cuota a cuo khu lipa hing Khazing cuota ca a cuo khu,” a ta.
28Cakhutaa Piter ta, “Mang tie, Kiema ca ma ing ma lu kha thuse pate nama maca ziy tli,” a ta. 29Zingsuv ta iema kha, “Biehmisi tana ica chang yi: ahunghmuo cuose Khazing Pena kawlieta, ing cuose, a napuv cuose, a uvnu cuose, a nungpaa cuose, a saata zaw cuose a thusepa ca 30ata chuo lie hing ale hluvpuv ta hmung riypa hnyi'a te, a vaw riypa chuo lie chuozaa hringna a hmung aa,” a ta.
Zingsuv Ta A Thiyna Riypa Kaw Hne A Thupakhaana Riypa Kaw A Yithungna A Rilu
31Zingsuv ta ziytuv hlyihning tie kha ku yite, “Naa thlie tie ung! Jerusalem luo vaa'a ung pate capa lieca profet tie ta Cawsaa Saacapaa kaw ama capepa bangkhuo kha a tling aa. 32Ama ca Jentail ming kuv luo pi pata cuo'a te, iema ta ama tue hyalya aa, ama ese aa, ama paciy ta ama pacha aa. 33Tuv'a yite ama thie aa, cuorasala ningthungna lieta a thupakhaa aa,” a ta. 34Cuorasala ziytuv tie ta hingpa kaw hing khaahmuo pachang vayi; a ri khingpa a siyluo kha iema'a taata nu pata a cuo nakawta khaapama a ri tapa kha pachang khu vayi.
A Mingcuepa A Hielepapaa Kha A Patluo Sa
(Mat 20:29-34; Mar 10:46-52)
35Zingsuv ca Jeriko khy luo a vya chiy'a nang caw ta mingcuepa pakha ca luokie lie kha zaa tu te a za hie nguoluo yi. 36A thaalie cawsaazaapuv ama vya cakuolepa pu kha a thyi tiyta, “Khaapama a cuo?” tapata a hiehriy yi. 37Iema ta, “Nazareth khypa Zingsuv na a vawle,” ama ta. 38Ama ta, “Zingsuv, David Saacapaa! Ngie na chi thi tie,” tapata a u. 39Hmie luo lie a awpa cawsaa tie khata duo riypata ama thlu. Cuorasala, David Saacapaa! Ngie na chi thi tie! ta te khuo vie ta a u hryly. 40Zingsuv ca a daa te mingcuepapaa kha ama'a luo a vawkhyi riypata a chang yi. A thaa luo a vya chiy pahne Zingsuv ta, 41“Khapa na tuepa se tapa ma ina khing ciy?” a ta. Ama ta, “Saya na pahmung sa pakhaa tie,” a ta. 42Zingsuv ta, “Hmung tie, na zangnapa na caa patluo sa,” a ta. 43A ming ca sungkha ta vuo pakhaa te, ama kha ziy te Khazing kha a pathuosa. Cawsaazaapuv ta ama hmung tiyta Khazing kha ama pathuosa.
Currently Selected:
Luka 18: LNT1
Tõsta esile
Share
Copy
Want to have your highlights saved across all your devices? Sign up or sign in
New Testament in Chin Lautu © Bible Society of Myanmar, 2015.