Luka 12
12
Phahruocuo Tie A Raaring Ung
(Mat 10:26-27)
1Cawsaa ca a thawthaw ta a vya hmya yite amaa tlawpuole ciemuo ning kha Zingsuv ta a suokhana ta ziytuv tie kha, “Farasi tie thiynung kha a raaring tie ung—a phahruo amaa cuo pakhina kha. 2Buvkhungpa bangkhuo kha pahawpa cuo diy'a te, nupa bangkhuo hing phu pata a cuo aa. 3Cacuonakaw a zingna lie nama ripa ca ningchung a vuona lie pathyi sa diy pata cuo'a te, ingchiy a khaakhungna chunglie a paruv ta nama ripa kha thlungkhuv daw taata u pata a cuo aa.
Ciy li Pata Phu Riypa
(Mat 10:28-31)
4Viesaa zaw, ica chang yi, pangpasaa dyi thie khu te a hnang taata capa laata a chie viepa a tue khu lipa kha ciy kha ung. 5Ahungma ciy riypa tapa kha ica chang'a yi: Pangpa a thie khu taata hell#12:5 Gk Gahenna luo pathla khunapa cahrana a hnyipa Khazing kha ciy tie ung. A cuo, ica chang yi, ama kha ciy tie ung. 6“Mingbaw sapangaa ca piehning tana ama zaa cuo vama? Cuorasala mingbaw sakhata kha hmuo Khazing ta maw vyi. 7Nama luv cung lie nama suo hmuota a ri diy. Nama thlaa zang kha se; mingbaw hluvpuv laata nama sungnaa vie.
Khrih Cuhluona Hne Thawna
(Mat 10:32-33; 12:32; 10:19-20)
8Ica chang yi: ahunghmuo cuose cawsaa hmielie naa daakhyipa ca Cawsaa Saacapaa zaw ta Khazing avuoming hmielie i daakhyi ra aa. 9Cuorasala cawsaa hmielie naa thawpa ca Cawsaa Saacapaa ta Khazing avuoming hmiekunglie i thaw ra aa. 10Ahunghmuo cuose Cawsaa Saacapaa thuo a pachipa ca a ngiethepa ama cuo aa, cuorasala Thlaapa Pathe thuo a pachipa ca a ngiethepa cuo'a vayi. 11Apungna-ing lie cuose, ruo-uv byi a cuo li kie nawhnyituv tie hmie luo aca chiykhyi tiy yi ta tuokhaa ta a pahrang'a ang tema tuokhaa ta i ri aa tapa kha nama palung rie thyi kha se. 12Tahematapakieca capa cuo lie ta nama ri riypa ca Thlaapa Pathe na caa chang'a yi,” a ta yi.
A Ngaapa A Hnyirungpa Pakhingpuonabie
13Cawsaazaapuv hraw taata pakha ta, “Saya, i paa ru kha ina che riypata i uvta kha na changpa tie,” a ta. 14Zingsuv ta, “Liechung, ahungma niema pahning a lala lie bie chipa riypata naw naa pi?” a ta. 15Cakhutaata iema bangkhuo kha, “Karuo-awna phangting taakhata a cadang tie ung, tahematapakieca cawsaa pakha hringna ca a hnyirungna lie kha aw vyi,” a ta yi. 16Cakhutaata pakhingpuonabie suokha a chang yi: “A hnyirungsapa pakha ca a lu taata kung a vyi laalaw. 17Catiyta a palung chunglie kha; ‘I sa bangkhuo hing i china tlaw va tli. Tuokhaata i tue kie ma a pha aa?’ a ta. 18Cakhutaata, ‘Hinghaahingtana i tue aa: I sa-ing hing phi'a ang tena a le vie ta i sa aa. Capa lieca i sa hne i hmang bangkhuo kha i chi aa,’ a ta. 19Cakhutaa i thlaapa kha, Vya i thlaapa! Kung syipuv acaa de riypa hmang ca na hnyi mangtli. A pahy hyalya la, ning la, dang la a nuosa pata hring tie, i ta aa,’ a ta. 20Cuorasala, Khazing ta, ‘A ngaapa! Ata zuo hrahring hingta na hringna ca a chuo aa; cacuonakaw na cuota naa pacungpa hmang bangkhuo hing ahung huo tama a cuo aa? a ta,’ a ta. 21Cacuonakawta ama cuota chechiy aa pacung raalaa pata Khazing hmielie a hnyirung tlung lipa ca ama haa hing tana ama cuo,” a ta.
Palung Riethyi Pata Aw Kha Ung
(Mat 6:25-34)
22Zingsuv ta ziytuv tie kha, “Cacuonakaw ica chang yi: nama ning riypa sa kawlie cuose, namaa tue riypa caw kawlie cuose, nama hringna kawlie palung rie thyi pata aw kha ung. 23Hringna ca sa laata biepuv vie te pangpa ca caw laata a biepuv vie. 24Ra-aa khiy rue tie ung: saciy vaa vayi, sa zaw hrie vayi; sa chinapa be hne sa-ing zaw hnyi vayi; cuorasala Khazing ta a caw yi! Niema ca pavaa laata nama sungnaa vie karaa! 25Nama palung rie a thyi nakawta nama hringna siymaluo pakha chuo a pasyi sa the viepa pakha chuo nama aw ma? 26Cahaapaapa chechiy cawta hmuo nama tue khu li kieca khaapanakawma a hrangpa kawlie ca nama palung rie a thyi? 27Ruo paapaapa khiy tuokhaatama ama le tapa kha mang tie ung: re hrie vayi, palaa zaw pahie ra vayi. Cuorasala ica chang yi: Solomon Siepahruopa rungnaana bangkhuo tahmuo hingpa paapaapa suokha puvthena hing a tluv vyi. 28Cuorasala ata ning hring te mawluo myi ta rue riypa aphuvpa hing Khazing ta hing tluv ta a tuepangi kieca, niema changchiy ca khatluv tama aca tuepangi vie'a yi? Nama zangna hing a caw hringhruo de! 29Cacuonakawta ning riypa hne dang riypa kaw kyalya rue pata nama palung rie thyi kha se. 30Tahematapakieca chuelyiming dyi ca muo hingpa hmang ca a ruepari yi ta. Nama Paa ta hingpa hmang zaw hing namaa hu tapa kha a pachang. 31Cacuonakawta ama pena#12:31 Hluo vie caa-uv lieca Khazing Pena a ta. kha huv taa ungla, capa hmang zaw ca pichiy pata nama cuo aa,” a ta.
32Tuvrung cawta zaw, nama thlaa zang kha se, tahematapakieca niema'a luo Pena pi riypa kha nama Paa palungtluona tana a cuo. 33Nama hnyipa kha zaa ungla siypasapa tie kha pi tie ung. A caw the lipa tuokaa baw kha a tue ungla a ruvhangpa ta a paruv khu li na lie hne, alungpa ta a para khu lina vuoruo lie kha a chuo the li riypa sue kha a pacung tie ung. 34Tahematapakieca nama sue awna lie kha nama pathiypalung zaw a aw ra aa.
A Raaringsapa Sii
35“A ting pacie pata aw ungla, nama myi-ing kha vuo pacie tie ung. 36Napuv chiyna pyi taata a vya diy te ingchiy a cakhaw pahne pahaw khu paluo riypata ama byipaapa a huopa tie haakhata a raaring pata aw tie ung. 37Ama byipaapa a vya kaa tiyta a hra te a raaringna a hnyipa sii ca khatluv ta thluechiypa ma a cuo! Biehmisi tana ica chang yi, a tesaw kha a saw'a te, ning riypata patu'a yite, iema kha a ysy'a yi. 38Zuocang ta a vya diy kie cuose, khydyi caw ta a vya diy kie cuose, a ting pacie pata ama aw pata a hmungpa sii tie ca thluechiypa tana ama cuo.
39Cuorasala hingpa hing pachang tie ung: ing a hnyituvpapaa ta a paruvpa a vawna cuo kha a pachang kieca a ing kha paruv sa'a vyi. 40Niema zaw a raaring ung, tahematapakieca nama mangkhuo linapa cuo lie khana Cawsaa Saacapaa ca a vaw aa,” a ta.
Zangtluo A Tlapa Sii Hne Zangtluo A Tla Lipa Sii
(Mat 24:45-51)
41Piter ta, “Abyipa, hing pakhingpuonabie hing kiema ma malie na ta khing, a cuo li kie cawsaazaapuv cuota ma a cuo?” a ta. 42Abyipa ta, “Ahung kha ma zangtluo aa tlapa hne a singpa tluotlakhuekhuotuv ca a cuo? Zangtluo aa tlapa hne a singpa tluotlakhuekhuotuv ca a byipaapa ta a ingchungkhue mangchiy riypa hne a hrangpa sii tie kha ama'a na a cuota lie ama cuvu sa pi riypata a chipapaa khana a cuo. 43A byipaapa kha ing luo a vya chiy tiyta cahaa cata a za tue nguoluo pata a hmungpa sii ca thluechiypa tana a cuo! 44Biehmisi tana ica chang yi: cahaapaapa sii ca a byipaapa ta a chechiy bangkhuo a mangchiytuv tana a chi aa. 45Cuorasala capa sii cata, ‘I byipaapa ca a syisa a ru kalie aa,’ ta sala sii a hrangpa canung zaw capaa zaw kha tuv yite, ning dang te a pariy kieca, 46vya chiy thlu'a valie a ta ning hne a pachang li cuo ning kha a byipaapa ca a vya chiy aa. A byipaapa ta a cekary diy'a te ri a ngie lipa tie hne khata a chi hne aa. 47A byipaapa ta a patue sa khingpa a pachang thluo pata, a tingtuo pata a patue sa khingpa kha a tue lipa sii ca a pasasapa tuvna na a ang aa. 48Cuorasala a byipaapa ta a patue sa khingpa a pachang li pata tuv aa tlapa hmang a tuepa ca dyadyata tah tuvpa tana a cuo aa. A hluvsa pipa ca a hluvsa hiepa cuo'a te, a hluv vie pipa ca a hluv vie ta hiepa a cuo aa.
Zingsuv Ca Pachetuv Tana A Cuo
(Mat 10:34-36)
49“Alyi hing myi ta pahlaa riypa tamuo i vaw ta, a hlaa hunglung tli sala a pha'a pakha! 50Tiy a naw riypa suokha hnyi ang te, capa hmang a tlung hluo li ca khatluv ta ma i palung rie a thyi! 51Alyi luo diena phya riypatana aa vaw tapata ma ina rue ungciy? Cuo vyi, ica chang yi: a chena tlaku na i za phya. 52Ata taahingta papangaa a tapa chungkhue tie ca a che'a yite, pathung ta pahning kha a du'a yite pahning ta pathung kha amaa du aa. 53Iema ca amaa che aa:
Paa ta saacapaa kha a du'a te
saacapaa ta paa kha a du aa,
nung ta sacanung kha a du'a te
sacanung ta nung kha a du aa,
piynung ta munung kha a du'a te
munung ta piynung kha a du aa,” a ta.
Cuo Pachang thena
(Mat 16:2-3)
54Zingsuv ta cawsaazaapuv kha, “Niema ta ningtla taata amyi a kya thupa kha nama hmung tiyta, sungkha ta, ‘khy na a saa aa,’ ta ung cate a saa sasaw. 55Sungluo taata thliy a kya hruo tiyta, ‘a vya paling aa,’ ta ung cate a paling sasaw 56Phahruocuo tie! Niema ta alyi hne avuo kha mang ung cate khy saa riypa hne khy huo riypa kha nama pachang khu; cacuokie khaapanakawma ata chuo ningkhue aw zya hing nama pachang va?
Caa Dutuv Hne Vaa Re Ung
(Mat 5:25-26)
57Khaapanakawma hmangphapa tue riypata nama pathiypalung lie bie namaa chi khu va? 58Cakhutaata tazaa caa cyipa hne bieripatuv byi hmie luo nama cakuo ning kha luopuv lieta ama hne a dawraw riypa kha a zue tie; cahaa cata na tue li kieca, bieripatuv byi hmie luo kha ca chiykhyi'a yite, ama ta paliy byi kuv luo ca hluo'a te thaw aca pathla'a yi. 59Ica chang yi: duo aca tepa yi a chuopatlienapa piekha te ta na pi diy hluo li thaw taata pya'a vaciy,” a ta.
Currently Selected:
Luka 12: LNT1
Tõsta esile
Share
Copy
Want to have your highlights saved across all your devices? Sign up or sign in
New Testament in Chin Lautu © Bible Society of Myanmar, 2015.