Lucuotuv 6
6
Byatuv Uvthyi Pasariy
1Capa cuo hrawning ca, ziytuv tie ca hluv vie le lawmaw yite, Grik ryi a cyipa Judah ming ta Hebru ming kha ningting sa ning riypa a rena kawlie tana kiema nunghlyi tie ca hnang malie ama chawpa vie, tapata ama kaw ama ri. 2Cacuonakawta lucuotuv hlyihning tie ta ziytuv bangkhuo kha pakiy yite, “Sapitiypi#6:2 Or Tuokaa kaw patungpatiena kawlieta a ta kawlieta Khazing bie ri kha hnang ma chaw kieca pha the'a vyi. 3Cacuonakawta uvnu zaw, niema hraw taahingta singna hne Thlaapa ta a bipa pasariy kha a tlaw ungla hing re hing iema pi pata cuo sala, 4kiema hing ca thlaachuona hne Khazing bie rina lie tuv kha thaa pahrang vie pata cuose,” ama ta. 5Ama bie ta zaapuv palung kha patluo te, zangna hne Thlaapa Pathe ta a bipa Steven, Filip, Prokhoras, Nikanor, Timon, Parmenas, hne Antiok khy taata Judah biena luo a ngiepa Gentailpa Nikolaus kha amaa tlaw. 6Iema kha lucuotuv tie hmiekunglie padaa yite, ama luv cunglie kha ama kuv khang yite thlaa ama chuopa.
7Khazing bie ca aa ze hryly. Jerusalem khy chunglie kha zangtuv hluv hryly yite tluobyi hluvpuv zaw ta ca zangna ca amaa paw ra.
Steven Ama Patuv
8Khazing vihnyina hne cahrana ta a bipa Steven ta kharuehaana hne pahmungsana hmanglepa kha cawsaa zaw hrawlie ta a tue. 9Cuorasala sii taata hya a zangpa tie biena-ing lie a pungpa chekha, Sairin, Alexandria, Silisia hne Asia taata a vawpa tie kha a daa yite Steven hneta bie amaa i. 10Cuorasala Steven ca singna hne Thlaapa Pathe ta bie a ri nakawta te khu vayi. 11Cacuonakawta, cawsaa chekha kha, “Moses hne Khazing thuo pachi pata bie a ripa na ma thyi,” ta riypata biesakue ama khe. 12Cahaa cata cawsaazaapuv, uvthyi tie hne phungbie saya tie kha pasu yite Steven kha patuv yite bierituvphuv hmie luo kha ama vya chiykhyi. 13A hmuo lipa pachangkhyituv kha ku yite iema cata, “Hingpapaa hingta a pathepa ma biena-ing hne phungbie kha a du pata bie ri pari te, 14hing Nazareth khypa Zingsuv hingta hingpa Biena-ing hing para patlaa diy'a te Moses ta malie a pipa phungbie bangkhuo hing a thle diy'a ne tapata a ripa kha ma thyi,” tapata ama ri. 15Bierituvphuv chunglie a tupa bangkhuo ta Steven ca taapuo pata mang yite a hmie ca avuoming hmie hneta aa lupa kha ama hmung.
Currently Selected:
Lucuotuv 6: LNT1
Tõsta esile
Share
Kopeeri
Want to have your highlights saved across all your devices? Sign up or sign in
New Testament in Chin Lautu © Bible Society of Myanmar, 2015.