Jẹnẹsis 2
2
1Kẹnẹ a ma odjuvwu vẹ akpọ kugbe obo re vọnrọ ejobi wan. 2Vwẹ ẹdẹ rẹ ighwrẹ iruo rẹ emama rẹ Ọghẹnẹ ruru ejobi de rhi re, o de rovwoma vwẹ ẹdẹ rẹ ighwrẹ na vwẹ enu rẹ iruo ro ruru. 3Ọtiọye Ọghẹnẹ de bruphihọ ẹdẹ rẹ ighwrẹ na, ọ da vwẹ ọghọ kẹ, fikiridie ẹdẹ yena Ọghẹnẹ vwo rovwoma vwẹ enu rẹ iruo ro ruru vwẹ emama rọye.
4Enana keye uvwiẹ rẹ odjuvwu vẹ akpọ vwẹ ọke ra vwọ ma ayen. Vwẹ ẹdẹ rẹ Ọrovwohwo Ọghẹnẹ vwọ ma akpọ vẹ odjuvwu nu, 5Vwẹ ọke rẹ okankọn vuọvo je djẹ vwẹ aghwa na eyẹ odi vuọvo je djẹ phiaa– kidie Ọrovwohwo Ọghẹnẹ je rhọ osio phihọ akpọ na-a, yẹ ohwo je dia ro voro otọ na-a; 6ẹkẹvuọvo evwru kọye di muẹ nẹ otọ na kpenu ọ Me rhe kpọrhọ otọ na ejobi– 7kọye Ọrovwohwo Ọghẹnẹ da vwẹ ekpẹn rẹ otọ na vwọ ma ohwo, ọ da wẹn ẹwẹn rẹ arhọ na phihọ iwen rọye, ohwo de hirhe ohwo ọkpokpọ.
Udju rẹ Idẹn
8Ọrovwohwo Ọghẹnẹ de voro udju phihọ Idẹn vwẹ ẹbẹre rẹ ọnre da vacha, kẹ Etiyin o phi ohwo rọ mare na phihọ. 9Vwẹ evun rẹ otọ na kọye Ọrovwohwo Ọghẹnẹ tare nẹ urhe kurhe ro yovwiri, fẹro ji fẹriọ gba djẹrhe, urhe rẹ arhọ na rọ ji uherevie rẹ udju na, kugbe urhe rẹ erianriẹn rẹ erhuvwu vẹ umiovwo.
10Urhie da va phia vwẹ Idẹn rere ọrhuọrhuọ udju na, Etiyin ọ da jẹn eghọn ẹne. 11Odẹ rẹ ọrẹsosuọ Pishọn, ọna re djẹ nene ubrotọ ri Havila, ra da mrẹ oro; 12oro rẹ otọ na pha yoyovwi; bideliọm vẹ oragha rẹ oniks; je otọ na rhe. 13Odẹ rẹ urhie rivẹ ki Gihọn, urhie nana re djẹ wan ubrotọ ri Kush. 14Odẹ rẹ urhie rerha ki Tigris, rọ djẹ nene obọrhe rẹ Asira. Urhie rẹne ki Yufretis.
15Ọrovwohwo Ọghẹnẹ da reyọ ohwo na o de phio phihọ udju rẹ Idẹn na rere ọ sẹro rọye. 16Ọrovwohwo Ọghẹnẹ de ji urhi kẹ ohwo na, nẹ, Wọ sa re omamọ komamọ rẹ udju na obo ri jẹn we; 17ẹkẹvuọvo urhe rẹ erianriẹn rẹ erhuvwu vẹ umiovwo na wọ riọọ, kidie ẹdẹ re wọ rerọ ku wo ghwu.
18Ọrovwohwo Ọghẹnẹ da ta, Oyoma rere ọshare ọvo vwọ dia sogono-o, Me ma ọchuko ro fori vwọ kẹ. 19Kọye vwẹ evun rẹ otọ na re, Ọrovwohwo Ọghẹnẹ da ma eranvwe keranvwe rẹ aghwa na kugbe ọphran kọphran rẹ enu na, ọ da ghwẹ ayen vwọ kẹ ohwo na sọsa mrẹ obo ro se ayen; obo rẹ ohwo na se eranvwe keranvwe ekpokpọ na, kẹ odẹ yena ese. 20Ohwo na de mu odẹ kẹ uchuru ejobi, vwọ kẹ ephran rẹ obenu na, ji te eranvwe rẹ aghwa na, ẹkẹvuọvo vwọ kẹ ekpuyovwi rẹ ohwo na a gbe mrẹ ọchuko ro fori vwọ kẹ-ẹ. 21Kọye Ọrovwohwo Ọghẹnẹ da vwẹ ovwerhe rode vwo mu ohwo na, rọ vwọ vwerhẹ re ọ da reyọ ubiedada rọye ode ko di; 22ubiedada rẹ Ọrovwohwo Ọghẹnẹ reyọre nẹ oma rẹ ọshare rhe na o da vwọ ma aye ọ da reyọ vwọ kẹ ọshare na. 23Etiyin ọshare na da ta, Ọnana ubeku mẹ kugbe uvwo rẹ uvwo mẹ, ke se nẹ Aye, fikiridie oma rẹ ọshare esiro nurhe. 24Fiki rẹ ọtiọye na ọshare vwọ yan jẹn ọsẹ rọye vẹ oni rọye vwo kọ rhe gbanọ aye rọye, ayen ke dia oma ọvo. 25Te ọshare na ve aye rọye da ban phihọ, yẹ oma vo aye-en.
Currently Selected:
Jẹnẹsis 2: UBV77
Tõsta esile
Share
Copy
Want to have your highlights saved across all your devices? Sign up or sign in
Bible in Urhobo © United Bible Societies, 1977.