GÉNESIS 5
5
Adanpac huahua huahuacunamanta
(1 Cr 1.1-4)
1Caicunami Adanpac huahua huahuacunapac shuticunaca. Diosca runata ruhuashpaca, pai shinatami ruhuarca. 2Diosca shuc carita, shuc huarmita ruhuashpami bendiciashpa, chai punzhallatac paicunataca Runata shutichirca.
3Adanca patsac quimsa chunga huatayuc cashpami, pai shinatac shuc churita charirca. Paitaca Settami shutichirca. 4Adán Setta charishca quipaca pusac patsac huatata causashpami churicunatapish, ushicunatapish charirca. 5Adanca iscun patsac quimsa chunga huatata causashpami huañurca.
6Setca patsac pichca huatayuc cashpami, Enós churita charirca. 7Setca Enós churita charishca quipaca pusac patsac huatata causashpami churicunatapish, ushicunatapish charirca. 8Setca iscun patsac chunga ishcai huatata causashpami huañurca.
9Enosca iscun chunga huatayuc cashpami, Cainán churita charirca. 10Enosca Cainán churita charishca quipaca pusac patsac chunga pichca huatata causashpami churicunatapish, ushicunatapish charirca. 11Enosca iscun patsac pichca huatata causashpami huañurca.
12Cainanca canchis chunga huatayuc cashpami, Mahalaleel churita charirca. 13Cainanca Mahalaleel churita charishca quipaca pusac patsac chuscu chunga huatata causashpami churicunatapish, ushicunatapish charirca. 14Cainanca iscun patsac chunga huatata causashpami huañurca.
15Mahalaleelca sucta chunga pichca huatayuc cashpami, Jared churita charirca. 16Mahalaleelca Jared churita charishca quipaca pusac patsac quimsa chunga huatata causashpami churicunatapish, ushicunatapish charirca. 17Mahalaleelca pusac patsac iscun chunga pichca huatata causashpami huañurca.
18Jaredca patsac sucta chunga ishcai huatayuc cashpami, Enoc churita charirca. 19Jaredca Enoc churita charishca quipaca pusac patsac huatata causashpami churicunatapish, ushicunatapish charirca. 20Jaredca iscun patsac sucta chunga ishcai huatata causashpami huañurca.
21Enocca sucta chunga pichca huatayuc cashpami, Matusalén churita charirca. 22Enocca Matusalén churita charishca quipaca Dios munashca shinami causarca. Shinallatac quimsa patsac huatata causashpami churicunatapish, ushicunatapish charirca. 23Enocca quimsa patsac sucta chunga pichca huatatami causarca. 24Enocca Dios munashca shinami causarca. Chaimantami Dios apacpi chingarirca.
25Matusalenca patsac pusac chunga canchis huatayuc cashpami, Lamec churita charirca. 26Matusalenca Lamec churita charishca quipaca canchis patsac pusac chunga ishcai huatata causashpami churicunatapish, ushicunatapish charirca. 27Matusalenca iscun patsac sucta chunga iscun huatata causashpami huañurca.
28Lamecca patsac pusac chunga ishcai huatayuc cashpami, shuc churita charirca. 29Chai huahuataca: «Dios allpata mana alli nishcamanta allpapi yalli ñucanchic rigracunahuan sinchita trabajacucpimi, samachinga» nishpami Noeta shutichirca. 30Lamecca Noé churita charishca quipaca pichca patsac iscun chunga pichca huatata causashpami churicunatapish, ushicunatapish charirca. 31Lamecca canchis patsac canchis chunga canchis huatata causashpami huañurca.
32Noeca pichca patsac huatayuc cashpami, Sem, Cam shinallatac Jafet churicunata charirca.
Currently Selected:
GÉNESIS 5: QCA10
Tõsta esile
Share
Copy
Want to have your highlights saved across all your devices? Sign up or sign in
Biblia Quichua Cañar, Dios Rimashcata Quillcashcami © Sociedades Biblicas Unidas, 2010.