Luk̆a 14
14
Yeso ar Farisurişi Oxoris Ren
1Yeso, ar Sap̆at̆oni Ndğas, Farisuri ar tişineri k̆oçişi oxoris gyarişa mendaxtu. İri-xolok hemus tolis oʒ̆k̆et̆es. 2Ʒ̆oxle muşis, xura txomuroni ar k̆oçi kort̆u. 3Yesok, Ʒ̆k̆onda K̆anonepeşi mamgurapalepe do Farisurepes “Sap̆at̆oni Ndğas zabunepe ok̆au ʒ̆k̆onda k̆anonis reni, va reni?”-ya do k̆itxu. 4Hentepek çkar nena var eşiğes. Yesok k̆oçis xe nontxu, dok̆au do oxori muşişa mendoşku. 5Yesok hentepes haşo uʒ̆u: “Tkvani doloxe namuk, biç̆i muşi varna xoci muşi Sap̆at̆oni Ndğas k̆uis kodoluluk̆o manişa var eşionams?” 6Hentepes mutu var atkves.
7Yesok, ç̆andaşa na moxtespe, doxunuşeni k̆ai svalepe na nʒxunuman koxuʒ̆onu. Hentepes ham memgapura dup̆aramitu: 8“Ar mitxanik ç̆andaşa dogicoxuna eni k̆ai svas si mot doxedur! Beki oxormances skanden beciti ar mitxani docoxineri uonun. 9Magidas kodoxedina, juriti na gicoxes mitxani, skanda moxtas do ‘Sva skani ham k̆oçis komeçi!’ dogiʒ̆umers. Hem oras oncğorete eisel do uk̆açxes kek̆axedur. 10Hemuşeni, ar ç̆andaşa gicoxesna, k̆ap̆ula k̆ele ar sotxa kek̆axedi! Si na gicoxuk moxtas do ‘K̆ata çkimi, ʒ̆oxle k̆ele kodoxedik̆o’-ya giʒ̆vas. Hem oras skani k̆ala na xenanpeşi doloxe si didi dokkaçanen. 11Ti muşi didi na dokaçums iç̆ut̆anasen, ti muşi tude na dokaçumsti ididanasen.”
Ç̆andaşi Memgapura
12Uk̆ule Yesok, mus na ducoxu Farisuris haşo uʒ̆u: “Si ondğeneri varna lumcineri gyari dovaşi, varti k̆atape, varti cumalepe, varti mzaxalepe, varti zengini manz̆agerepe skani vaşa ucoxa! Uk̆açxe, hentepekti si kodogicoxaman. 13Mara ç̆anda dovaşi, fuk̆arapes, ast̆enarepes, topalepes do utolepes ucoxi; 14Haşote ixelare; hemuşeni ki, hentepes skanda meçamuşeni mutu var uğunan; ʒ̆ori k̆oçepe ğuraşen edgitanşk̆ule mutu ganç̆en niçinasen.”
15Hem oras gyaris na xenanpeşen artik haya ognuşi Yesos, “Şana bedi muşis, Ğormotişi Mapobas gyari na ç̆k̆omasen!”-ya uʒ̆u.
16Yesok hemus haşo uʒ̆u: “Ar k̆oçik, didi ar lumcineri gyari kododgu, dido k̆oçepesti koducoxu. 17Do lumcineri gyarişi oras na docoxupes: ‘Moxtit, gyari dixaziru’-ya do memçinuşeni ç̆k̆ori muşi mendoşku. 18Mara mtelik, ok̆otkveri rt̆esk̆osteri ‘Mixat̆irit’-ya tkves: Maartanik, ‘Ar ona dobiindri, oxtimoni do oz̆ironi bore, gela ma mixat̆iri’-ya uʒ̆u. 19Majuranik ‘Xuti çifti xoci kep̆ç̆opi, hentepe meʒaduşa bulur, gela domixat̆iri’-ya. 20Arçkva majuranikti ‘Ma ağne biçili, hemuşeni var memalen.’
21Do ç̆k̆ori goiktu do oxormance muşis hantepe dup̆aramitu. Hem oras oxormances guri muxtu do ç̆k̆ori muşis: ‘K̆ap̆ineri, noğaşi cadaxepeşa, avlapeşa idi, fuk̆arape, ast̆enarepe, utolepe do topalepe hak komooni!’-ya uʒ̆u.
22Ç̆k̆orik haşo uʒ̆u: ‘Mance çkimi, na miçinadvi dop̆i. Mara xoloti sva koren.’ 23Oxormancek ç̆k̆oris: ‘Gamaxti gzalepeşa do ğoberepes elaoni, miti z̆irare zorişatina komooni do oxori çkimi ipşas’-ya. 24‘Haya giʒ̆vat ki, ipti na dobucoxepeşi doloxe çkartik gyari çkimi var gyaʒadasen!’-ya.”
Yesoşi Mamguralepe
25Yeso k̆ala dido milletepe nulurt̆es; Yesok hentepes haşo uʒ̆u: 26“Miti çkimda mulun, nana do baba muşi, çili do berepe muşi, cumalepe do dalepe muşi do soğunis şuri muşi va naşkvaşakis çkimi mamgurale var iven. 27St̆avro muşi mxucis eidvas do var ek̆emaonaşakis, miti çkimi mamgurale var iven.
28Tkvani doloxe ar mitxanik k̆ule ok̆odus guris uğunna, ‘Ham oçodinuşeni na mik̆orems para miğuni, var miğuni’-ya do ipti doxedun do na xarcasen para var k̆oreʒxumsi? 29Mesoni kogoç̆k̆a do var açodinasna, haya na z̆iranenpek: 30‘Ham k̆oçik ok̆odus kogyoç̆k̆u mara var açodinu’-ya do hemus noz̆iʒes.
31Varna, nam mapak, çkva ar mapa k̆ala ok̆ok̆idinuşa ulurt̆uşk̆ule, ‘Eçi şilya askerite na mulun duşmanis, vit şilya askerite goʒ̆omadgineni?’-ya do var moixesap̆ams? 32Var goʒ̆udgitasna, majurani mapa mendra rt̆aşi ozaduşeni elçepe mendoşkums.
33Hantepesteri, tkvani ar mitxani, na uğun var naşkvaşakis, çkimi mamgurale var ivasen.
34Cumu k̆ai ren, mara cumu unostone renna, muç̆ote hem nostoni ak̆vanasen? 35Hea, varti let̆as, varti lazmas apelen, kot̆k̆oçaman. Uci na uğun ognas!”
Currently Selected:
Luk̆a 14: LZZ
Tõsta esile
Share
Copy
Want to have your highlights saved across all your devices? Sign up or sign in
Laz Luke © Bible Society in Turkey (Kitabı Mukaddes Şirketi) 2020