1. Mose 25
25
Abraham befriet sikj nochmol - sein Doot un Bejrafnis
1Un Abraham neem wada eene Fru, met Nomen Ketura. 2Un see jebua am Simran un Jokschan un Medan un Midian un Jischbak un Schuach. 3Un Jokschan jebua Scheba un Dedan; un de Säns Dedan wieren de Assurim un Letuschim un Leumim. 4Un de Säns Midian: Efa un Efer un Hanok un Abida un Eldaba. Aul dise wieren Säns de Ketura.
5Un Abraham jeef däm Isaak aules, waut hee haud. 6Un de Säns de Näbenfrues, dee Abraham haud, jeef Abraham Jeschenkja; un hee leet an, aus hee noch läwd, von sienem Sän Isaak nom Oosten gonen, en daut Launt em Oosten.
7Un dit sent de Doag de Läwensjoaren von Abraham, dee hee jeläft haft: 175 Joa. 8Un Abraham neem auf un storf en gooden Ella, oolt un de Doag saut, un wort too sienem Volkj jesaumelt. 9Un siene Säns Isaak un Ismael begrowen am en de Heel von Machpela, opp däm Flekj Efron, vom Sän Zohar, däm Hetita, daut ver Mamre licht, 10däm Flekj, daut Abraham von de Kjinja Het jekoft haud; doa worden Abraham un siene Fru Sara begroft. 11Un daut passieed no Abraham sien Doot, doa säajend Gott Isaak, sienem Sän; un Isaak wond bie däm läwendjen Borm, dee mie sitt [Lachai-Roi].
Nokomen von Ismael
12Un dit sent de Jeschlajchta von Ismael, von Abraham sienen Sän, däm am Hagar, de Deenstmejal von Sara jebuaren haud; 13un dit sent de Nomes von Ismael siene Säns, no äare Jeschlajchta: De Ieeschtjebuarna von Ismael: Nebajoth, un Kedar un Adbeel un Mibsam 14un Mischma un Duma un Massa, 15Hadad un Tema, Jetur, Nafis un Kedma. 16Daut sent Ismael siene Säns met äare Nomes, en äare Häw un Zeltloagasch; 12 Ferschten no äare Stam. 17Un dit sent de Läwensjoaren von Ismael: 137; un hee neem auf un storf un wort no siene Velkja vesaumelt. 18Un see wonden von Hawila bat Sur, daut ver Ägipten licht, no Assierien han. Hee wond ver aul siene Breeda.
Nokomen von Isaak; Esau un Jakob
19Un dit sent de Jeschlajchta von Isaak, Abraham sienem Sän: Abraham jebua Isaak. 20Un Isaak wia 40 Joa oolt, aus hee sikj Rebekka to Fru neem, de Dochta Betuel, däm Aramäa ut Paddan-Aram, de Sesta von Laban, däm Aramäa. 21Un Isaak bedd däm Harn fa siene Fru, dan see wia onfruchtboa; un de Har leet sikj von am erbedde, un Rebekka, siene Fru, wort schwanga. 22Un de Kjinja staden sikj en ar; un see säd: Wan daut soo es, wuarom traft mie dit? Un see jinkj han, däm Harn too befroagen. 23Un de Har säd to ar: 2 Nazionen sent en dienem Lief, un 2 Velkja woaren sikj tranen ut dienem Ennalichen; un een Volkj woat stokja sennen aus daut aundre, un de Ellra woat däm Jinjren deenen.
24Un aus äare Doag erfelt wieren, daut see jebäaren sull, kjikj, doa wia een Poakje en äarem Lief. 25Un de ieeschta kaum rut, rootlich, aum gaunzen Lief aus een hoaja Mauntel; un maun jeef am däm Nomen Esau. 26Un nodäm kaum sien Brooda rut, un siene Haunt hild Esau siene Hak; un maun gauf am däm Nomen Jakob. Un Isaak wia 60 Joa oolt, aus see jebuaren worden.
27Un de Junges wosse naun. Un Esau wort een Jäajamaun, een Stapmaun; oba Jakob wia een saunfta Maun, dee enne Zelten bleef. 28Un Isaak haud Esau leew, dan een Wiltbrode wia no sienem Mul; oba Rebekka haud Jakob leew.
Esau vekjaft sein Ieeschtjeburtsrajcht
29Un Jakob koakt eene Speise; un Esau kaum vom Flekj un wia meed. 30Doa säd Esau toom Jakob: Lot mie doch äten von de roode Speise, däm Rooden doa, dan ekj sie meed! Doarom jeef maun am däm Nomen Edom. 31Un Jakob säd: Vekjeep mie vondoag diene Ieeschtjeburt. 32Un Esau säd: Kjikj, ekj go däm stoawen entjäajen, un toowaut doa daut Ieeschtjeburtsrajcht? 33Un Jakob säd: Schwia mie vondoag! Un hee schwua am un vekoft sien Ieeschtjeburtsrajcht däm Jakob. 34Un Jakob jeef Esau Broot un eene Lensenspeise; un hee aut un drunk un stunt opp un jinkj doavon. Soo veacht Esau daut Ieeschtjeburtsrajcht.
Currently Selected:
1. Mose 25: PBJHF
Tõsta esile
Share
Kopeeri
Want to have your highlights saved across all your devices? Sign up or sign in
© SW-Radio e.V.