1. Mose 15
15
Gott moakt eenen Bunt met Abram
1No dise Dinj wia daut Wuat Gottes aun Abram en eenem Jesecht aulsoo: Forcht die nich, Abram; ekj sie die een Schild, dien sea groota Loon. 2Un Abram säd: Har, Gott, waut west du mie jäwen? Ekj go doch kjinjaloos doahan, un de Oaw von mienem Hus, daut es Elieser von Damaskus. 3Un Abram säd: Kjikj, mie hast du kjeenen Somen jejäft, un kjikj, de Sän von mienem Hus [Husjebuarna] woat mien Oawe sennen. 4Un kjikj, daut Wuat Gottes wia to mie aulsoo: Nich disa woat dien Oawe sennen, sonda dee ut dienem Lief väakomen woat, dee woat die beoawen. 5Un hee fieed am rut un säd: Kjikj doch nom Himmel un tall de Stierns, wan du dee talen kaust! Un hee säd to am: Aulsoo woat dien Somen sennen! 6Un hee jleewd däm Harn; un hee räakjend am daut to Jerajchtichkjeit. 7Un hee säd to am: Ekj sie de Har, dee die rutjefieet haft ut Ur en Chaldäa, om die dit Launt to jäwen, daut to besetten. 8Un hee säd: Har, Gott, wuaraun saul ekj erkjanen, daut ekj daut besetten woa? 9Doa säd hee to am: Holl mie eene dreejoasche Koo un eene dreejoasche Kos un eenen dreejoaschen Bock un eene Turtelduw un eene junge Duw. 10Un hee hoold am dit aules un vedeeld dee en ne Medd un läd eene jiedre Halft de aundre jäajenäwa; oba de Väajel vedeeld hee nich. 11Un de Raupväajel follen äwa de Opfa häa; un Abram vejuag an. 12Un daut passieed aus de Sonn unjagonen wull, doa foll een deepa Schlop opp Abram; un kjikj, Schrakj, dichte Diestanis äwafoll am. 13Un hee säd to Abram: Jewess saust du weeten, daut dien Somen een Framdlinkj sennen woat en eenem Launt, daut nich daut äaje es; un see woaren an deenen, un see woaren an bedrekjen 400 Joa. 14Oba ekj woa de Nazion uk rechten, dee see deenen woaren; un doano woaren see uttrakjen met grootem Rikjtum. 15Un du, du woascht no diene Vodasch en Fräd engonen, woascht em gooden Ella begroft woaren. 16Un em vieeden Jeschlajcht woaren see hiahäa trigjkomen; dan de Ojjerajchtichkjeit de Amorita es bat hiahäa noch nich voll. 17Un daut passieed, aus de Sonn unjajegonen un dichte Diestanis wia, kjikj doa, doa rieekjad een Owen un eene Fiaflaum, dee tweschen jane Stekja derch trock. 18Aun däm seljen Dach muak de Har eenen Bunt met Abram un säd: Dienem Somen jäw ekj dit Launt vom Ägipten Stroom bat aun dän groote Stroom, däm Stroom Eufrat: 19De Kenita un de Kenisita un de Kadmonita, 20un de Hetita un de Perisita un de Refaim, 21un de Amorita un de Kanaanita un de Girgasita un de Jebusita.
Currently Selected:
1. Mose 15: PBJHF
Tõsta esile
Share
Copy
Want to have your highlights saved across all your devices? Sign up or sign in
© SW-Radio e.V.