Macce 7
7
Kina atte morom fu
1Kinaat markoh ɓo' in, mbaa ɗu heyɗi markohse in. 2Laam findi ɗu na atte'ohe, Kooh atte'ohan ɗu ɗaa te ɓeesohaani ɗu na ɓeesɗohohe, weɗ ɗu ɓeesɗohsan. 3Wa ye tah fu markee ɓoli ŋ hasiŋ morom fu, te wa ndooɗ yakak nik ŋ hasiŋ ɗa ? 4Wala fu min na woyoh morom fu ne : “ Faɗa ŋ nihsiɗ ɗa ɓoli ŋ hasiŋ ɗa ”, te ndooɗi yakki weɗɗi ŋ hasiŋ ɗa ? 5Naafeehaani, koca nihis ndooɗi yakki nik ŋ hasiŋ ɗa. Fu min hot baahiɗ ne fu nihsiɗ morom fu ɓoli nik ŋ hasiŋ ɗe.
6Kinaat eɗ ɓuu ci in ci hoolɗu wuu Kooh bala ca wiirkan nga ɗu, ca faarsoh ɗu, te kinaat njaf per ciŋ ɗu ŋ kot ciŋ mbaam-huk ci bala ca daksohan ca.
Kiimaat, waakaat, laɓɗaat
7Kiimaat, ɗu hey onse ; waakaat, ɗu hey hote ; laɓɗaat, ɗu hey rangsiɗasse. 8Laam ɓo' nu kiim ɗah, a hey onse, ɓo' nu waak ɗah, a hey hote, te ɓo' nu laɓiɗ ɗah, a hey rangsiɗasse. 9Ya ɓa nga ɗu a yi kuɓkiŋ ɗe kiiman ɗe mbuuru, a on ɗe atoh ? 10Wala a kiim ɗe cuurund, a on ɗe iiñ ? 11Nik ne ɗu ɓi baahaaɗiici, e ɗu min on kuɓuuciŋ ɗu in baahiɗ ɗah, ŋ woyisɗi ɗa Baabiŋ ɗu yi ŋ Eel ci, a onanɗi in baahiɗ ɓi na kiimee ɗe wa e ?
12Kon, in ci ɗu waaɗ ne ɓooɓi haɓɗiɗ ɗu ca jen, tumɗaat ɓa ca. Ineem weɗ waasiŋ Musaa nakoh na woosuuɗ ci.
Yahndeer ci kanak ci
13Aasohaat yahndeeri ɓengiɗi laam yahndeeri angiɗi na ɓayohe ŋ boom te waasiŋ wa yooɓpa ; laayiɗ na aasohe nga. 14Waaye yahndeeri na ɓayohe ŋ kipes ki, wa ɓengiɗ, waasiŋ wa sewwa te ɓi hota laayɗi.
Ɓi na kulɓa'kohe woosuuɗ
15Wortukaat ɓooɓi na tume haf ɓa woosuuɗ, ŋ ɗooƴiŋ ɓa, ɓa ɓaakoɓ saahiɗ. Waaye ɓa haye nga ɗu ɗah, ɓa na haye soosiɗ findi mbaal. 16Ɗu na hee ɓa inhisohe in ci pesohaaɗ ciŋ ɓa na rime. Reseñ miniɗ ɓeenohu ŋ ñaaɓaaɓ e ? Wala ndun miniɗ ɓeenohu ŋ ñalkook ? 17Kidig nu baah ɗah, wa na raake rim baahiɗ. Waaye kidig nu baahɗi ɗah, na raake rim baahaaɗi. 18Kidig baahiɗ minɗi raak rim baahaaɗi te kidig baahaaɗi minɗi raak rim baahiɗ. 19Kidig nu raakɗi rim baahiɗ ɗah, wa na ƴoɓse ƴoɓu, wa njafu ŋ yongkaah. 20Mbaa ɗu na hee ɓa inhisohe in ci pesohaaɗ ciŋ ɓa na rime.
Woo na tum
21E ɓooɓi na ɓeeɗkohee so : “ Heɗ ɓoo, Heɗ ɓoo ” jen ɓeɗ na hee aase ŋ Nguuriŋ-Ɗafki haa, waaye a ɓi na haɓɗe waaɗ-waaɗiŋ Baabiŋ ngo yi nik ŋ Eel ci. 22Ɓi ɓo' laayiɗ hey yo woye mbaɗi ne : “ Heɗ ɓoo Heɗ ɓoo, ɓoo meeɗ yegɗoh woo kiŋ Kooh ŋ tiikiŋ ɗa haa e ? Ɓoo aañiɗ jiiniici ŋ tiikiŋ ɗa te ɓoo haɓɗiɗ keemaan laayiɗ ŋ tiikiŋ ɗa. ” 23Ŋ ineem, ŋ hey ɓa woye ne : “ Ŋ moosɗi ɗu inhoh, usaat to ɗu ɓi na haɓɗe ini lahɗi waas. ”
Kahan ci kanak ci
24Weɗ tah ɓoyi na sikɗuke woo kiŋ ngo wii, a pesohee wa, a mandan na ƴaar ñaañiɗ yi taɓah kahan ce ŋ ɗafuk atoh ; 25toɓi keennda, huluɓ ci nupɗeeɗa, puuɗsi puuɗseeɗa, ca tapukka kahneem, waaye wa keenɗi sagu ini wa taɓahu ŋ ɗafuk atoh. 26Waaye ɓoyi na sikɗuke woo kiŋ ngo te a pesohuu wa, a mandan na ƴaar naandiɗ yi taɓah kahan ce ŋ ɗafuk beeñ ; 27toɓi keennda, huluɓ ci nupɗeeɗa, puuɗsi puuɗseeɗa, ca tapukka kahneem, wa keennda, wa yahrukohha jameet. »
28Wa Yeesu ƴut woo woo ceem, mboolnda jen feyuusa ŋ jangɗohiŋ ɗe. 29Jangɗohaaɗaŋ ɗe ɗaloheen na findi jangɗohoh caŋ waasiŋ Musaa na tumohe, laam a woyee keeh-keeh findi kilifa.
Currently Selected:
Macce 7: YM
Tõsta esile
Share
Kopeeri
Want to have your highlights saved across all your devices? Sign up or sign in
© Wycliffe Bible Translators, Inc