Macce 12
12
Kuɓkiŋ ɓoyi a yi Heɗ mbehi na iɗsiɗkohse
1Ŋ jamanoocaam, Yeesu na taalubeeciŋ ɗe kaɗeeɗa, ɓa taammba yohon caŋ beleeca, wa nikee ŋ mbehi na iɗsiɗkohse#12:1 mbehi na iɗsiɗkohse : findi waasiŋ Musaa nakohee wa, Yawuut ci joyeen iɗsiɗuk ngaŋ mbehi yasna-kanakɗoh, weɗ Saafi na woyee gaaw wala samdi.. Wa raak taalubeeci aɗkiɗ, ɓa piikeeɗa nga ca, ɓa ñameeɗa. 2Wa Farisen ca hot ɓa, ɓa woosa ɗe ne : « Waasiŋ ɓoo sangohiɗ nguɗ ŋ mbehi na iɗsiɗkohse. Waaye marka ! Taalubeeciŋ ɗa tumiɗa ! »
3A woosa ɓa ne : « Mand haa ne ɗu moosɗi jangoh ina Dawuuda haɓɗee wa a aɗuk, a yi na ɓooɓa hunee na ɗe. 4A aas ŋ Kahan Kooh, a ɓayya mbuuruuca degsee ŋ taaɓla wuu Kooh, ɓa ñammba ca te raak e seeƴkiɗoh ci dong teyɗohsee wa.#1 Samuwel 21:2-7; Pula 25:23-30; Lewiici 24:5-9 5Te ŋ namee liiɓ ne ɗu jangiɗ ŋ Fiis ciŋ waasiŋ Musaa ne seeƴkiɗoh ci na pangke ŋ Kahan Kooh na iɗsiɗkeeɗi ŋ mbeheem. Kon ɓa na taambɗeeɗi nakoheem, waaye ɓa na ambseeɗi findi ɓoyi tooñ.
6Ñam na woyee ɗu wa, raakiɗ ɓoyi uup Kahan Kooh ŋ ndii. 7Fiis ci namiɗ woo ne : “ Ŋ waaɗ ne ɗu teeɓoh baah kiŋ ɗu ŋ ɓinooɓi, weɗ ngisoh ɗu seeƴkee wuu so.#Hose 6:6 ” Ɗu inheen ini woo keem tokis ɗah, ɗu heeɗi yambe tooñaaɗiicii. 8Laam Kuɓkiŋ ɓoyi a yi Heɗ mbehi na iɗsiɗkohse. »
Yeesu wirɗiɗ heɗ yaah ɓeendkiɗ
9Wa Yeesu kurkoh ndaam, a kaɗta sinaagoga. 10A raakka nga ƴaar, yaahiŋ ɗe ɓeendkee ɓeenduk. Ɓa meekissa Yeesu ne : « Andi wiriɗ ɓo' ŋ mbehi na iɗsiɗkohse teyɗohuuɗ ? » Raak ɓa waakee ini ɓa yamban ɗe. 11A loffa ɓa ne : « E ya ɓa nga ɗu a yi raakan mbaal yino dong, a keen ŋ nung ŋ mbehi na iɗsiɗkohse, a faɗ ɗe nga, a pulɗuu ɗe ? 12Te ŋ hot a ɓo' uup mbaal fuuf ! Kon tum in baahiɗ teyɗohuuɗ ŋ mbehi na iɗsiɗkohse. »
13A woosa ƴaara na yaaha ne : « Raɗsa yaahiŋ ɗa. » A raɗissaa, wa dokukka moɗoɗ findi winoora.
14 Farisen ca pulla, ɓa markeeɗa findi ɓa na hee apohe Yeesu. 15Waaye a inahhaa, a kurkohha ndaam, a cooteeɗa. Mboolo laayiɗ ñaakiɗta ɗe, a wiriɗta kosaayiɗ ca nga jen. 16A woytohha ɓa ndengiɗ ne ɓa kinaat ɗe laamtoh. 17Jaarra ini Kooh woyee taamboh ŋ woosuuɗi Esayi raakka, an :
18« Surgaaniŋ ngo yeɗɗi,
yi ŋ tan, ŋ waaɗta ɗe keeh-keeh,
ŋ neɓuusa nga ɗe.
Ŋ hey tume Fuuɗsiŋ ngo nga ɗe,
a hey yegɗohe kiyurah ŋ cuuɓ ci jen.
19A heyɗi lahtohe na ɓo',
a leehkanɗi,
te ali ɓo' kerhanɗi hoosooriŋ ɗe
ŋ harmban kahan ci.
20A ɗiindohanɗi mbaang hapeel weeriɗ,
a ƴimanɗi laampaani na ɗuuke.
A tumohan ɗaa po
kiyurah raak ndam.
21Kur ci jen hey dege yaakaar ciŋ ɓa ŋ tiikiŋ ɗe. »#Esayi 42:1-4
Yeesu wirɗiɗ fuuliɗ muumiɗ
22Weɗ ɓa ɓayoh ŋ Yeesu ƴaari fu inah ne a jiini fuulɗee ɗe, muumiɗta ɗe. Yeesu wiriɗta ɗe po a jombeeɗa, a hoteeɗa. 23Mboolnda jen feyuusa woyeeɗa ne : « Wa miniɗ nik ne a setiŋ Dawuuda de' ! » 24Wa Farisen ca keraha, ɓa woosa ne : « Uh, a na aañohe jiiniici hatiliŋ Belsebul#12:24 Belsebul : wa ɓaah ŋ tiik ciŋ Seytaani., kilifaaniŋ ca. »
25Yeesu inahha liiɓ ciŋ ɓa, a woosa ɓa ne : « Ɓooɓi ɓaah nguur hiñohee ŋ harmban ɓa ɗah, nguureem hey keene, te ɓooɓi ɓaah kur wala kahan hiñohee ŋ harmban ɓa ɗah, kur keem wala kahneem minanɗi tufuk.
26Kon wa nik ne Seytaani na aañe Seytaani ɗah, a yi hiñoh na haf ce. Kon nguuriŋ ɗe tufkohan na ? 27Nik ne mi na aañohe jiiniici hatiliŋ Belsebul ɗah, moo ɓooɓiŋ ɗu na namee ca aañ, ɓa na aañohee ca winde hatil ? Ineem weɗ tah ɓeɗ atte'an ɗu. 28Waaye nik ne mi na aañohe jiiniici Fuuɗsiŋ Kooh ɗah, kon Nguuriŋ-Kooh reyiɗ nga ɗu. »
29Yeesu degga nga ne : « Ɓo' min na aasoh kahan ɓo' raakiɗ hatil, a ɓay in ciŋ ɗe te a tokɗi ɗe po a ndeng ? Waaye a tok ɗe ɗah, a hey ɓaye in ciŋ kahan ce jen. 30Ɓo' nu langɗi na so ɗah, a sangiɗ to te ɓo' nu nangɗohohɗi so ɗah, a na pasarohe.
Bakaaɗi ɗaasohsanɗi
31Weɗ tah ñam na woyee ɗu wa : Ɓooɓi ɗaasnuk ɗah, ɓa hey ɗaasse bakaaɗ nu bakaaɗ na ɗal nu ɓa ɗal Kooh ɗah, waaye, ɓo' nu ɗal Fuuɗsi Hoolohngaani, Fuuɗsiŋ Kooh ɗah, a ɗaassanɗi. 32Ɓo' nu woo in moɗaaɗi ŋ Kuɓkiŋ ɓoyi ɗah, a ɗaasnuk ɗah, a hey ɗaasse, waaye ɓo' nu woo in moɗaaɗi ŋ Fuuɗsi Hoolohngaani ɗah, a ɗaassanɗi wa ŋ adinaanii na wi na haye.
33Fu woo ne kidgi baahiɗ ɗah, waa ne rim ciŋ wa baahiɗ. Fu woo ne kidgi baahɗi ɗah, waa ne rim ciŋ wa baahɗi. Laam kidig na inhisohse rimiŋ wa. 34Ɗu hiriñ rek, ɗu min na woyoh in baahiɗ, na baahaaɗiiki ɗu baahaaɗi ? Nguɓ na woye ini keeñ riif naa. 35Ɓo' baahiɗ na pulɗe in baahiɗ raakee weɗ nik ŋ ɗaakkiŋ ɗe. Ɓo' baahaaɗi na pulɗe in baahaaɗi raakee weɗ nik ŋ ɗaakkiŋ ɗe.
36Ñam na woyee ɗu wa : Ŋ mbehaŋ atteena, ɓooɓi hey teeɓohe ini tah woo ciŋ ɓa mbalay ci. 37Laam ɓo' nu nga, e woo ciŋ ɗe hoolɗan ɗe wala ceɗ amban ɗe. »
Yeesu lofiɗ ɓi meeksee ɗe firnde
38Weɗ ɓi jangɗohoh ɓaah ŋ ɓiŋ waasi, na ɓi Farisen woyoh ɗe ne : « Jangɗohohi, ɓoo waaɗ ne fu teeɓ ɓoo firnde puloh ŋ Eel ci. » 39A woosa ɓa ne : « Ɓooɓi woti ɓeɗ baahaaɗi, ɓa topɗi ŋ Kooh po haa njaalo'oh, an ɓa na meeksohe firnde ; ɓa eɗsanɗi ali firnde ɗal wiŋ woosuuɗi Yunus. 40Findi Yunus tumohee noh kaahay na wek kaahay ŋ rookaŋ cuurnda yakka,#Yunus 2 Kuɓkiŋ ɓoyi hey name nik noh kaahay na wek kaahay ŋ ɗooƴ kehƴi.
41Ŋ mbehaŋ atteena, ɓi Niniw hey kurke, ɓa teeɓ ɓooɓi woti ne ɓa raakɗi keeh, laam wa ɓi Niniw kerah woo kaŋ Yunus, ɓa ɓoƴsoheen pesohaaɗ keeh-keeh#Yunus 3 ; te moona ini nik ndii, weɗ uup Yunus.
42Buura ɓitɓaŋ Saba pulohee kur usiɗ ne a sikɗuk liiɓohaaɗa moɗɗaŋ Suleymaan.#1 Buur ci 10:1-13; 2 Nguur ci 9:1-12 Te moona raakiɗ ini uup Suleymaan ŋ ndii, weɗ tah mbehi Kooh na hee atte'ohe ɓooɓi, buuri ɓitɓeem hey kurke, a teeɓ ɓooɓi woti ne ɓa raakɗi keeh.
Findi jiini na wiirkohe ŋ ɓo'
43Jiini, na hoolaaɗiiki a hoolaaɗi, faɗta ɓo' ɗah, a na kaɗe ŋ ɓi ɗisik suyiɗ a waakee ɗiski a iɗsiɗkohan waaye a na raakeeɗi. 44Ŋ ineem, a woo ŋ haf ce ne : “ Mi na hee dokke kahnaŋ ngo ŋ puloh. ” A wiiruk ɗah, a raak kahna ɓarang, paɗuuɗ, haɓɗuuɗ moɗoɗ. 45Jaar a kaɗ waaka jiini yasna-kanak ci uup ɗe añaand ; ca kaɗ kahna, ca gen. Ŋ ineem, mirndohaaɗiŋ ɓoyeem weɗ na uupe misik fuuf findi a kocee mand. In mand ɗaa weɗ rahsan ɓooɓi woti, ɓa baahɗi. »
Ɓi kahan Yeesu
46Wa Yeesu nik ndaam, a woyeeɗa na mboolnda, yaay ɓa na taambɗoh ciŋ ɗe ƴaar ci hayya, ɓa tufukka ŋ hara ɓa waaɗta woo na ɗe. [47Raakka ɓoyi woo ɗe ne : « Yaay ɗu na taambɗoh ciŋ ɗa ɓa ɗaa tufukka ŋ hara, ɓa waaɗ woo na ɗa. »]
48Yeesu loffa ɗe ne : « Ɗu amb ne a ɓa yaay ɓoo, e ɓinde taambɗoh ciŋ ngo ? » 49Jaarra a yurhiɗta yaah ŋ taalubeeciŋ ɗe a woosa ne : « Ɓooɓii, ɓeɗ yaay ɓoo, ɓeɗ taambɗoh ciŋ ngo. 50Ɓo' nu na haɓɗe ini Baabiŋ ngo yi nik ŋ Eel ci waaɗ ɗah, ɓoyeem a taambɗoh ho ƴaar mbaa ɓitiɓ wala yaay ɓoo. »
Currently Selected:
Macce 12: YM
Tõsta esile
Share
Kopeeri
Want to have your highlights saved across all your devices? Sign up or sign in
© Wycliffe Bible Translators, Inc