BEGGAR 2
2
Kvn Aalho Pwnbov Doonunam
1Ho swcw-nyodongam, hoo doonyi-pool takar-tasar hog mwlwngam pwiyum kunum. 2Hoo aal kvnho Pwnbov mwwg bonam nyinam hoqgv nyiyum kunum, hoo mwwg bonam nyiknam mwlw hoqgv aal kvn deenho mwv nyikmab doonu kunum. 3Ho Pwnbov kvn deen aalam xinam gob mvnum hoo ham dvrwq gob mvnum, hoggab hoq aalho Pwnbov mwv swcw-nyodongam bvl pwnam hoqgv mwwg bon mwlwngam nyikmab doonunum.
Nyega ngamla Nyem mam Pwnam
4Hwdlo swcw-nyodongam bvl pwxo yik hoqgv,
Pwnbo At Sw swcw-nyodongam bvl pwxo yik aal jaq hoqgv,
soq hosiq tulu si lengknum.
5Hwdlo gvda so nwmw-nwsinv hoo svvn teriv beggar maata yikho—Pwnbo At Sw gvda so nyodo hom dvb mvma tayikho, hoo nyia kov ked aoso bonam nyima tayikho, 6hoo gvda hoqgv haapamv aob juucanum hoo ked mwlwngam iss jinum— 7ho Pwnbo At Sw nyiam diimwr hoqgv pwnum hoo swwg dooiyam mwwg nyupum lo miqlwqnum, hoo nyia kov swwnbo svdin gob nyiknum. 8Hoo Pwnbo At Sw dou-caga ho Iden boolu ak mvpnum, hoo mwwg pwnum nyiam mwv hoqho doomnum. 9Hoo Pwnbo At Sw ked hoqgv luucw-deedy svvnam kangam dvb la dvs gob nyim dvb pwnum. Boolu lvpa ra ho swwgwg svvnam daqmnum, hoo alboam la almanam cengn bo svvnam daqmnum.
10Pobu ak tolinl Iden boolungam iss jinum, hoo hoqhv pobu hopy gob topin kunum. 11Otuq pobu hoqg eminv Pison. Hoqhv hun dook nyook Habila gvdab tol wiyiqnum. 12Hoo hoq gvda hoqgv hunv aljaqnum; hoqho sungam bov la onex xinam wlwngv kam doonum. 13Pobu honyi deen hoqg eminv Gihon. Hoqhv Kus gvdab tol wiyiqnum. 14Hoo pobu houm deen hoqg eminv Taigwris, hoqhv Assiriyag dou-cagab tol wnum. Hoo pobu hopy deen hoqg eminv Iupratas.
15Pwnbo At Sw nyiam naalayil mwam Iden boolungam rongo nyil hoo kaaya mvdwb apnum. 16Hoo Pwnbo At Sw nyiam gaml jil begamv, “Jvqtw jaqb no boolug svvn aaxy mwlwngam dvla tayin, 17hvbmabde alboam la almanam cengn bo svvn aaxiam no dvmabv, hoggab hwdlo aalam no hoq aaxiam dvk baloqkam no hoggub nyijaqkam sitayin.”
18Ho Pwnbo At Sw benum, “Nyi si vp-cwkwb doonam si alma; ngo mwam jubdub svka bo ajin lo ak pwjtayin.” 19Ho Pwnbo At Sw diimwr hoqgv hog mwlwngam naarabl pwnam nyorog gunggo-nyiiyongam, hoo doag pvta mwlwngam nyi dookho bulam boatvl hoo nyi hv bulam kaal-kaal mwv emin mingnum. Hoo nyi hv swwnbo svdinam hog bvxeq goqnum, hoqhv bulug eminb nyiknum. 20Nyi hv tuun-meengam hoo doag pvtangam hoo nyorog svdin mwlwngam emin mingknum. Hvbmabde Adam gab mwam jubdub svka bo kaapa maanum. 21Ho Pwnbo At Sw nyiam yubngaql geqp dvb mvnum, hoo mwv yubdu yikho mwwg oxub soogwn naalinum hoo hoqg naarongam aiyaq lvgab koqtumnum. 22Hoo Pwnbo At Sw nyi hoqgv oxub naalinam ham mwv nyem ak gob pwnum hoo mwnwn nyi dook ho boa jiknum. 23Ho nyi hv benum,
“Vjaqsu bo si ngoqg alog alongv;
ngoqg aiyaqg aiyaqkv;
mwnwn Nyemv hvl eminum,
hoggab mwnwn Nyi hoqgv naalinum.”
24Hoqgab nyegangv mwwg abam la mwwg annam apaq peel mwwg nywxw lvgab vnyiq-hang pwkin gob swwbam tayin, hoo bulug soodinv akin gob nyitayin. 25Hoo nyegangv la mwwg nywxwngv vnyi-vnyiv talonum hoo bulv hvnyw maanum.
Currently Selected:
BEGGAR 2: NYISBSI
Tõsta esile
Share
Copy
Want to have your highlights saved across all your devices? Sign up or sign in
Nyishi Bible - DVRWQ PVVB
Copyright © 2015 by The Bible Society of India
Used by permission. All rights reserved worldwide.