GÉNESIS 4
4
Cainwan Abelwan
1Evaqa wijsayoj rikhurerqa qosan Adampaj. Onqokorqataj Cainta, nerqataj: Tiyapuwan uj qhari wawa, kaytaqa Señor qowan. 2Chay qhepaman onqokullarqataj Caimpa wauqen Abeltañataj. Abelqa ovejasta michej, Caintaj jallp'ata llank'aj.
3Qhepamantaj Caenqa uj p'unchay jaywanata Señorman aparqa llank'aspa poqochisqasninmanta. 4Abelpis apallarqataj Señorman jaywanata ovejasninmanta uj sumajnin kajta, kuraj kaj uñasmanta. Señortaj may kusisqa Abelta qhawarerqa, jinallatataj oveja apasqan jaywanantapis. 5Caintari mana jinatachu qhawarerqa, nillataj jaywanantapis. Chaymanta Caenqa maytapuni phiñarikorqa, uyampis uj jinayarqa. 6Señortaj nerqa: Imaraykutaj jinata phiñakunkiri, uyaykipis uj jinayanri? 7Sichus allinta ruwawaj chayqa, mana jina uyayojchu kawaj. Qanqa mana allintachu ruwanki, chayrayku juchaqa atipaytaña munashasunki. Manachus jina kawaj chayqa, juchata atipawaj.
8Uj kuti Caenqa Abelta pusarqa, jaku campoman, nispa. Chay campopi kashaspataj, Caenqa wauqen Abelta maqayta qallarerqa wañuchinankama. 9Señortaj Cainta taporqa: Maytaj wauqeyki Abelri?, nispa. Paytaj kuticherqa: Mana yachanichu. Noqachu wauqey Abelta qhawanay karqa imatajri?
10Diostaj nerqa: Imanarqankitajri? Wauqeykej yawarninta jich'asqaykeqa jallp'amantapacha qhaparimushawan. 11Chayrayku qanqa maldicisqa kanki, wijch'usqataj kanki kay jallp'amanta, mayqenchus wauqeykej yawarninta upiykun, wauqeykita wañuchisqaykej yawarninta. 12Kunanqa llank'ashajtiykipis jallp'aqa manaña poqosqanta jinachu poqonqa. Qanqa mundontimpi muyuskiri kanki, mana jayk'aj samarikuyta tarejtaj.
13Caintaj Señorman kuticherqa: Noqapaj kayqa ancha jatun jasut'i. 14Kunan qanqa qharqowanki kay jallp'amanta. Puriskiri kamusaj mundontimpi qanmanta karupi, ni jayk'aj samarikuyta tarispataj. Pipis taripaspaqa wañuchillawanqachari.
15Señortaj chayman kuticherqa: Pipis qanta wañuchejqa qanchis kutita jasut'isqa kanqa. Chaymantataj Señorqa Cainman uj señalta churarqa, pipis taripaytawan ama wañuchinampaj. 16Caenqa Señormanta t'aqakuspa riporqa. Tiyakorqataj Nod jallp'api, Edenmanta inti llojsimuyninnejpi.
Caimpa miraynin
17Caimpa warmin, wijsayoj rikhurerqa, onqokorqataj wawan Enocta. Chaymanta Caenqa uj llajtata sayacherqa. Chay llajtata suticharqa wawan Enocpa sutinwan. 18Enocqa karqa Iradpa tatan, Iradtaj karqa Mehujaelpa tatan. Mehujaeltaj Metusaelpa tatan karqa, Metusaeltaj Lamecpa tatan. 19Lamecqa iskay warmisniyoj karqa. Ujnin kajpata Ada sutin karqa, ujnin kajpatataj Zila. 20Adaj wawan karqa Jabal, chaypa wawasnintaj karqanku toldospi tiyakojkuna, uywasta uywajkuna. 21Wauqenqa Jubal karqa, chaypa wawasnin karqanku arpata, qenatawan tocajkuna. 22Zilapis wawayojllataj karqa, sutintaj karqa Tubalcaín. Chaytaj herrero karqa, ruwaj broncemanta, fierromantawan. Tubalcaimpata panan tiyarqa, sutintaj Naama karqa.
23Uj kuti Lamecqa nerqa warmisninman: Ada, Zila, sumajta uyariwaychej imatachus nisqayta: Warmisníy: Uj runata wañuchini wajtawasqanrayku; uj waynatataj sajmawasqanrayku. 24Sichus Cainta qanchis kutita jasut'enqanku chayqa, noqataqa jasut'iwanqanku qanchis chunka qanchisniyoj kutista.
Adampata Evajtawan kinsa kaj wawanku
25Adampa warmin ujtawan onqoj rikhurerqa. Ajinamanta uj wawan kallarqataj, suticharqankutaj Setta. Nerqataj: Dios qowan uj wawatañataj Abelpa cuentanmanta, pitachus Caín wañucherqa chaymanta.
26Setpatapis wawan kallarqataj, sutin karqa Enós. Chaymantapacha qallarerqanku Diosmanta mañakuyta, Señorpa sutinta oqharispa.
Currently Selected:
GÉNESIS 4: QCHSB
Tõsta esile
Share
Copy
Want to have your highlights saved across all your devices? Sign up or sign in
Qheshwa Biblia DC © Sociedades Bíblicas Unidas, 1986.