LUKA, 1
1
O LE MATAUPU I.
O le fanau mai o Ioane, ma le valoaga a Sakaria.
1E toatele ua taumafai ona tusi faasolo le tala i mea ua mautinoa e i tatou, 2e faapei ona tuuina mai ia te i tatou e i latou na matamata ai, ma auauna ai i le upu talu le amataga; 3o le mea lea ua ou manatu ai, ona ua ou matuā sue i mea uma lava talu le amataga, ou te tusi faasolo atu ia te oe le alii e, Teofilo, 4ina ia e silafia le faamaoni o ia tala ua a‘oa‘oina ai oe.
5O ona po o Herota le tupu o Iutaia, sa i ai le tasi faitaulaga e igoa ia Sakaria, sa i le vasega o Avia; o lana avā foi o lo sa Aronā, 6e igoa ia Elisapeta. Sa amiotonu i laua i luma o le Atua, o savavali i poloaiga ma tulafono uma a le Alii e le mata‘uleagaina. 7E leai sa la fanau, ina ua pa o Elisapeta, ua la matutua uma lava. 8Ua faia e ia le faiva o le faitaulaga i luma o le Atua, e aua‘i i lona vasega, 9pei o le tu a faitaulaga, o lona tofi e ulu i le malumalu o le Alii e faamu ai mea manogi; 10ua tatalo foi i fafo le motu o tagata uma, i le itu aso e mu ai mea manogi. 11Ona faaali lea ia te ia le agelu a le Alii, o loo tu i le itu taumatau o le fata e mu ai mea manogi. 12Ua iloa e Sakaria, ona atuatuvale ai lea, ua oo ia te ia le mata‘u. 13Ua faapea mai le agelu ia te ia, Sakaria e, aua e te mata‘u; auā ua faafofogaina lau tatalo; e fanau lau avā o Elisapeta sou atalii, e te faaigoa ia te ia o Ioane. 14E ia te oe le fiafia ma le olioli; e toatele foi e fiafia i lona fanau mai. 15Auā e sili o ia i luma o le Alii; e le inu o ia i le uaina po o le ‘ava; e faatumuina foi o ia i le Agaga Paia e afua ina fanau mai o ia. 16E faaliliu e ia le fanauga a Isaraelu e toatele i le Alii lo latou Atua. 17E muamua atu o ia i ona luma ma le loto o Elia ma lona faamalosi, e faaliliu e ia loto o mātua i le fanau, e faaliliu foi e ua faalogogata i le poto o e amiotonu; e sauni le nuu e faatatauina mo le Alii. 18Ona fai atu lea o Sakaria i le agelu, Pe faapefea ona ou iloa le mea nei? auā ua ou toeaina, o la‘u avā foi ua loomatua ia. 19Ua tali mai le agelu, ua faapea mai ia te ia, O a‘u o Kaperielu, o lē tu i luma o le Atua; ua auina mai a‘u e fai atu, ma ta‘u atu ia te oe lenei tala lelei. 20Faauta foi, e gūgū oe, e te le magagana seia oo i le aso e fai ai nei mea, auā ua e le talitonu mai i a‘u upu, o mea ia e taunuu lava pe a oo i ona po. 21O loo faatali le nuu ia Sakaria, ma ofo ina ua faatuai o ia i le malumalu. 22Ua alu ia i fafo, a ua le magagana ia te i latou; ua latou iloa ai ua na vaaia se faaaliga i le malumalu; a o ia ua genogeno atu ia te i latou, ua gūgū pea ia. 23Ua uma ona aso na fai ai le galuega, ona alu ai lea o ia i lona aiga. 24Ua mavae ia aso, ona to lea o Elisapeta lana avā, ua nofo faalilo o ia i ona masina e lima, ua faapea ane, 25Ua faapea ona faia e le Alii ia te au i ona aso ua silasila mai ai o ia, e ave ese ai lo‘u luma i tagata.
26O le ono o masina ua auina mai ai e le Atua o le agelu o Kaperielu i le aai o Kalilaia, o Nasareta le igoa, i le taupou o le aiga o Tavita, 27ua faufautane i le tagata e igoa ia Iosefa; o Maria foi le igoa o le taupou. 28Ua ulufale mai le agelu ia te ia ona faapea mai lea o ia, Si o‘u alofa ia te oe le ua alofaina, ua ia te oe le Alii; amuia oe i fafine. 29Ua vaai atu foi o ia, ona atuatuvale lea o ia i lana upu, ua taumanatunatu foi o ia, pe se a le uiga o lenei alofa. 30Ua fai mai foi le agelu ia te ia, Maria e, aua e te fefe; auā ua alofaina mai oe e le Atua. 31Faauta foi, o le a to oe, ma e fanauina se tama tane, e te faaigoa ia te ia o Iesu. 32E sili o ia, e ta‘ua foi o le Alo o le Silisili ese; e foai atu e le Alii o le Atua ia te ia le nofoaiga a Tavita lona tamā; 33e fai o ia ma tupu i le aiga o Iakopo e faavavau; o lona malo foi e leai sona gataaga. 34Ona fai atu lea o Maria i le agelu, A faapefea le mea nei; auā ou te lei iloa se tane? 35Ua tali mai le agelu, ua faapea mai ia te ia, E afio ifo le Agaga Paia i luga ia te oe, e faamalumalu ifo foi ia te oe le mana o le Silisili ese; o le mea lea e ta‘ua ai le tama paia, o le Alo o le Atua. 36Faauta foi, o lou aiga o Elisapeta, ua to o ia ina ua loomatua, o le tama tane foi lana tama; o le onoga masina lenei i lē na ta‘ua e pa; 37auā e leai lava se mea e tasi e le mafaia e le Atua. 38Ua fai atu Maria, Faauta, o a‘u nei o le auauna a le Alii; ia faia ia te au e tusa ma lau fetalaiga. Ona alu ese ai lea o le agelu ia te ia.
39Ua tulai Maria i ia ona aso, ua faatelevave atu i le atu mauga, i le tasi aai o Iuta; 40ua ulu atu foi o ia i le fale o Sakaria, ma alofa atu ia Elisapeta. 41Ua faalogo mai Elisapeta i le alofa o Maria, ona osooso ai lea o le tama i lona manava; ua faatumuina foi Elisapeta i le Agaga Paia; 42ua alaga ia, ua leo tele, ua faapea mai, Amuia oe i fafine, amuia foi lē a fanau mai ia te oe. 43Pe faapefea foi lenei mea, ina ua sau le tinā o lo‘u Alii ia te au nei? 44Faauta foi, ua oo mai le leo o lou alofa i o‘u taliga, ona osooso ai lea o le tama i lo‘u manava ma le olioli. 45E manuia foi le fafine e talitonu, auā e taunuu upu na fetalai mai le Alii ia te ia. 46Ona fai ane lea o Maria, Ua vivii atu lo‘u loto i le Alii. 47Ua fiafia lava lo‘u loto i le Atua lo‘u Faaola; 48ina ua silasila mai o ia i lana auauna fafine ua faamaulaloina; auā e amata mai nei ona faaamuia mai ia te au o tupulaga uma. 49Auā o Le e ona le mana, ua faia e ia mea silisili mo a‘u; e paia foi lona suafa. 50O lona alofa foi i e matatau ia te ia e āu tupulaga lava lea. 51Ua faamalosi lona aao, ua faataapeapeina e ia o e faamaualuluga i manatu o latou loto. 52Ua tulei ifo e ia o alii nai o latou nofoālii, a ua faaeaina e ia o e faamaulalo. 53Ua fagaina e ia i mea lelei e sa fia aai, a o e mau mea ua aufuaina atu e ia. 54Ua fesoasoani ia i lana auauna o Isaraelu, ina ua manatu mai le alofa ia. 55Aperaamo ma ana fanau e faavavau, pei ona fetalai mai o ia i o tatou tamā. 56Ua nofo Maria ma ia, pe tolu masina, ona foi ai lea o ia i lona aiga.
57Ua oo i le masina o Elisapeta e fanau ai, ona fanau ai lea e ia o le tama tane. 58Ua faalogo e ua latou tuaoi atoa ma lona aiga, ua alofa tele mai le Alii ia te ia, ona olioli ai lea o i latou faatasi ma ia. 59Ua oo i le aso valu, ona o mai lea o i latou e peritome ai le tama, o le a faaigoa e i latou ia te ia i le igoa o lona tamā, o Sakaria. 60Ona fai atu lea o lona tinā, ua faapea atu, Aua; e igoa lava o ia ia Ioane. 61Ona latou fai mai lea ia te ia, E leai se tasi o lou aiga e igoa i lea igoa. 62Ua latou genogeno atu i lona tamā, pe se a lona loto i sona igoa. 63Ona fai ane lea o ia i se papatusi e au mai, ona tusi ai lea e ia, ua faapea, O Ioane lona igoa. Ona latou ofo uma ai lea. 64Ona matala loa lea o lona leo ma lona laulaufaiva, ona tautala lea o ia, ma faafetai i le Atua. 65Ua oo ai le mata‘u i e ua latou tuaoi uma, ua soo foi le atu mauga uma o Iutaia i le tala i nei mea uma. 66O i latou uma na faalogo ai ua mafaufau i ai, ua faapea ane, Pe iu ina faapefea lena tama? Ua ia te ia foi le aao o le Alii.
67Ua faatumuina Sakaria lona tamā i le Agaga Paia, ona perofeta ane ai lea o ia, ua faapea ane, 68Faafetai i le Alii le Atua o Isaraelu, ina ua asiasi mai o ia, ma togiolaina lona nuu, 69ma ua faatuina le nifo o le olataga mo i tatou i le aiga o lana auauna o Tavita, 70(faapei ona fetalai mai e ia i fofoga o ana perofeta paia talu mai anamua,) 71o lo tatou olataga lava lea i e ua fai i tatou ma fili, ma lima o e ita mai uma lava ia te i tatou; 72i lona alofa i o tatou tamā, ma lona manatu mai i lana feagaiga paia; 73le tautoga na ia tauto ai ia Aperaamo lo tatou tamā; 74e foai mai ina ia laveaiina i tatou mai lima o e ita mai, tatou te le fefefe ai, a e 75auauna ia te ia ma le paia ma le amiotonu i ona luma i aso uma o lo tatou ola. 76O oe foi le tama, e ta‘ua oe o le perofeta a le Silisili ese, auā e te muamua atu i luma o le Alii e sauni i ona ala; 77e faailoa atu le olataga i lona nuu i le faamagaloina o a latou agasala, 78ona ua muitmuti vale le alofa o lo tatou Atua, ua asiasi mai ai le malamalama mai lugā, 79e faamalamalama ai i e nonofo i le pouliuli ma le ata o le oti, e ta‘ita‘i i o tatou vae i le ala o le manuia.
80Ua tupu le tama, ma ua malosi lona loto; sa i le vao o ia, ua oo i le aso na faaalia ai o ia ia Isaraelu.
Currently Selected:
LUKA, 1: SOV
Tõsta esile
Share
Kopeeri
Want to have your highlights saved across all your devices? Sign up or sign in
Samoan Edited Old Version © Bible Society of the South Pacific, 2017.