Matayo 9
9
Jeso unamuphoza mutʼu wa kupholoza
(Mariko 2:1-12; Luka 5:17-26)
1Jeso ariphoaphoza ao atʼu airi a mapepo ga vitswa kuko itsʼi ya Agerasa, waphenya mashuwani achivuka riro ziya, achiuya mudzi wa kwao. 2Kuko atʼu achimurehera mutʼu yekala upholoza mwiri wosi, hata ákala ahendamutsukula na lutsʼatsʼa. Jeso ariphoona jisi atʼu ao arivyokala na kuluphiro, yiye mutʼu wa kupholoza wamwamba vivi, “Mwanangu, phenywa ni moyo! Udzisamehewa dambizo.” 3Phapho phákala phana kahi za alimu a shariya anjine, na ao achanza kare kunungʼunika mwao myoyoni kwamba, “Mutʼu yuyu unamukufuru Mulungu!” 4Ela Jeso wakala unagamanya kare maazo gao, na achiamba, “Heka muna maazo mai? 5Ni riphiro ririro dide, ni kumwamba yuno mutʼu wa kupholoza, ‘Udzisamehewa dambizo,’ hebu ni kumwamba, ‘Unuka, wenende’? 6Bee, vivi nindamonyesa kukala, mimi Mutʼu yelaa dzulu nina widimi phapha duniani wa kusamehe atʼu dambi zao.” Phapho Jeso achimwamba yiye mutʼu yekala upholoza vivi, “Unuka uhwale lutsʼatsʼalo, wende vyako mudzini.” 7Yiye mutʼu achiunuka, achenda vyakwe kwao. 8Duu rosi ra atʼu ririphoona gago, áangalala na achogopha, na achimulika Mulungu kwa kwapʼa atʼu dza Jeso widimi uo.
Jeso unamwiha Matayo akale mwanafunziwe
(Mariko 2:13-17; Luka 5:27-32)
9Jeso ariphouka phapho, wakala unaenenda na njiraze, na achimona mutʼu mumwenga aihiwaye Matayo usegere ufisi ya kodi. Jeso achimwamba, “Nituwa!” Matayo achiunuka achimutuwa.
10 #
Luk 15:1, 2 Chidzakoche, Matayo wamupiga karibu Jeso na anafunzie akarye leu kwakwe, phamwenga na atosi a kodi anzie anji, na atʼu anji otsʼiriwa. 11Ndo Afarisayo ariphoona gago, achiauza anafunzi a Jeso kukala, “Heka mwalimu wenu unarya na atosi a kodi na atʼu otsʼiriwa?” 12Jeso achigasikira gago na achiaamba vivi ao Afarisayo, “Azima kʼaana haja ya muganga, ario na haja na muganga ni akongo. 13#Mat 12:7; Hos 6:6Ninahenza mukarisome hata mumanye maanaye Andiko riri rambaro, ‘Ninahenza mwike mbere konerana mbazi, kuriko kunilavira sadaka.’ Maana, mimi tsʼidzire kudzaaiha atʼu adzonao anahenda ga haki atye, ela nákudzaaiha adambi.”
Anafunzi a Johana anamuuza Jeso dzulu ya kufunga
(Mariko 2:18-22; Luka 5:33-39)
14Gariphochira gago, anafunzingwa a Johana Mubatizi ákwenda kwa Jeso, achendamuuza kukala, “Heka uwe Jeso ano anafunzio kʼaafunga, ela sino na Afarisayo hunafunga?”#9:14 Nakala zinjine zinaonjeza: kʼano nyinji? 15Jeso naye achiauza chitʼadi vivi, “Atʼu oambirwa nyambura anaidimadze kushononeka, na hata bwana nyambura ucheri phamwenga nao? Kʼaviidimikika vivyo. Ela ukati undafika urio bwana nyambura undauswa kati yao, na ukati uo ndipho andafunga.
16“Na kʼakuna mutʼu atiyaye chiraka chiphya demuni. Maana, mutʼu achihenda vivyo, chicho chiraka chiphya chindatsonyoka, na riro demu rikaze kwahuka. 17Hebu mutʼu kʼatiya divai mbitsi ndani ya viriba#9:17 Chiriba ni chiya cha chʼingo chofumwa dza chirenje kwa kwikira divai, nyuchi na kwenderera. vya pʼindi. Maana, mutʼu achihenda vivyo, yiyo divai mbitsi yindachemuka, na vyuduke vivyo viriba vibanangike, na yiyo divai yimwagike. Ela divai mbitsi yitiywa ndani ya viriba viphya, na phapho ndipho hata yiyo divai yikachemuka dzadze, kʼavindauduka vivyo viriba.”
Jeso unamuphoza muchetʼu wa muruwo
(Mariko 5:21-34; Luka 8:40-48)
18Jeso ariphokala ucheri kugomba gago, mubomu mumwenga wa Ayahudi achidza. Achimitʼa mavindi mbereze na achiamba, “Bwana, mwanangu wa chiche udzefa sambi yenye. Ela nicheri kukuluphira kukala, uchendamwikira mikonoyo tu, undafufuka.” 19Ndo Jeso na anafunzie achizuka achenda naye.
20Ndo phokala anenda, muchetʼu mumwenga yekala ugaya na ukongo wa muruwo myaka kumi na miri, wamutuwa Jeso nyuma achendakumba mutse wa valore. 21Maazo ga yiye muchetʼu gákala ni, “Mimi nichirikumba valore tu, nindaphola kare.” 22Ndo Jeso achigaluka, achimona yiye muchetʼu na achimwamba, “Mayo, phenywa ni moyo! Kuluphiroro ridzikuphoza.” Muchetʼu yiye achiphola ukati uo kare.
Jeso unamufufula musichana
(Mariko 5:35-43; Luka 8:49-56)
23Jeso ariphomuphoza yiye muchetʼu wa muruwo, waunuriza charoche na yiye mubomu mumwenga wa Ayahudi hata kuko mudzini. Ariphofika kuko mudzini, wakwendaona atʼu anapiga jembe, na anjine anarira. 24Ndo Jeso yiye achiaamba, “Fumukanani, mana, kʼafire yuyu musichana, hata ni urere tu!” Ela ao atʼu achimona Jeso dza kwamba tsʼiye muzima. 25Jeso achiamba okala a mumo nyumbani alaviwe konze, na aripholaviwa, achiphenya, achendamugwira mukono, na yiye musichana achiunuka. 26Na nguma zizo zichigotʼa jimbo riro rosi.
Jeso unaaphoza atʼu airi otsʼiona
27Jeso ariphouka phapho, wakala unaenenda na njiraze, na atʼu airi okala kʼaaona achimutuwa, na kuno anagomba kwa laka ra dzulu kwamba, “Hwonere mbazi mutʼu wa mudzungu wa Daudi!” 28Jeso achiphenya nyumbani, na ao atʼu airi okala kʼaaona achimutuwa mumo. Ndo Jeso achiauza vivi, “Kwani mwimwi munakuluphira kukala, mino ninaidima kumuphoza?” Ao achimuudzidza achimwamba, “Ehʼe hunakuluphira Bwana.” 29Phapho Jeso achigakumba matso gao, na achiamba, “Nindamuhendera dza viratʼu munikuluphiravyo.” 30Na ao atʼu okala kʼaaona achiona. Na Jeso achiafungira kukala, “Mutsʼimwambire mutʼu kamare neno riri.” 31Ela ao achiuka, na achendavumisa nguma za Jeso jimbo riro rosi.
Jeso unamuphoza bubu
32Phokala ao alume airi anauka, atʼu anjine ámurehera Jeso mutʼu mumwenga yekala una pʼepʼo hata udzimuhenda kʼagomba. 33Jeso achimuchemera yiye pʼepʼo, na yiye mutʼu yekala kʼagomba achanza kugomba. Atʼu phapho achangalala hata achiamba, “Kʼagadzangwe kuhendwa gaga phapha Iziraeli!” 34#Mat 10:25; 12:24; Mar 3:22; Luk 11:15Ela Afarisayo ao achiamba, “Yuyu Jeso unaalavya pʼepʼo kwa widimi ahewao ni mubomu wa pʼepʼo.”
Jeso unaaonera mbazi atʼu
35 #
Mat 4:23; Mar 1:39; Luk 4:44 Jeso watsemberera midzi na vidzidzi vyosi vya jimbo riro, achifunza masinagogini mwa atʼu a kuko, na achisumurira Nguma Mbidzo dzulu ya Ufalume wa Mulungu. Chisha, achiphoza makongo gosi, na uwele wa chila aina. 36#Isab 27:17; 1 Afal 22:17; 2 Mgu 18:16; Ezek 34:5; Mar 6:34Jeso aripholola riro duu ra atʼu, waaonera mbazi muno, kwakukala, atʼu ákala anayugika muno, na kwangaika dza magonzi gotsʼina murisa. 37#Luk 10:2Phapho Jeso achiaamba anafunzie vivi, “Kuna nyoha, ela aguwi ni achache. 38Ndo muvoyeni Mulungu mwenye munda ahume aguwi anjine mwakwe mundani akaavize kuguwa.”
Currently Selected:
Matayo 9: CHIDUR
Tõsta esile
Share
Copy
Want to have your highlights saved across all your devices? Sign up or sign in