Matayo 15
15
Mafunzo ga akare
(Mariko 7:1-13)
1Tsʼiku mwenga, Afarisayo na alimu a shariya kulaa Jerusalemu ákwenda kwa Jeso achendamuuza vivi, 2“Heka ano anafunzio anavunza jadi za akare? Hʼaya heka hata achikala anarya anavunza jadi yehu kwa kutsʼaoga mikono!?” 3Jeso naye achiauza vivi, “Heka mwimwi namwi munavunza malagizo ga Mulungu kwa mutuwe jadi zenu? 4#Kul 20:12; Kʼumb 5:16; Kul 21:17; Alaw 20:9Maana, Mulungu waamba, ‘Aishime abayo na ameyo,’ na ‘Amulaphizaye muvyaziwe bee, unawirya kunyongwa.’ 5Ela mwimwi vino, munaafunza atʼu kukala, kʼaatakiya kwaogopha avyazi ao kwa kwamanya gao arigo nago haja, hata mutʼu achikala una mwiyo wa kumokolera muvyaziwe, ela achiamba, ‘Mwiyo uu mino náulaga kumupʼa Mulungu,’ hʼaya yiye ni kukala udzigamala. 6Bee manyani kukala, mwimwi munaphurya neno ra Mulungu kwa mutuwe jadi zenu enye. 7-8#Isa 29:13Mwimwi mu alumakwiri! Na hata maneno gogombwa chimbere dzulu yenu ni mugomvi wa Mulungu Isaya ni ga jeri. Mulungu kuchirira yiye Isaya waamba,
‘Atʼu aa anaamba mulomoni ananihenza,
ela myoyoni kʼaanenzi.
9Na hata kuko kunabudu kwao,
tsʼikona dza chitʼu.
Mana, ao ahwala shariya zotungwa ni atʼu,
akazifunza kuno achamba ni zangu!’ ”
Maneno gamutiyago mutʼu najisi
(Mariko 7:14-23)
10Ndo Jeso achisumiza riro duu ra atʼu, na achiamba, “Gahegereni masikiro mugamanye gaga nimwambirago! 11Leu kʼarimutiya mutʼu najisi, ela mutʼu utiywa najisi ni manenoge mwenye agagombago.”
12Phapho anafunzie achimusengerera achimwamba, “Mwalimu, unamanya kukala gano godzigomba gadziakosa Afarisayo muno?” 13Jeso yiye achiaudzidza achiaamba, “Chila muhi urio kʼauphandirwe ni Baba ariye mulunguni, undangʼolwa. 14#Luk 6:39Kwa vivyo, ao aricheni, mana, ni vilongozi otsʼiona, na analongoza otsʼiona! Na mutʼu yetsʼona achimulongoza munziwe yetsʼona vivyo, osi airi andavoromoka bopʼoni.” 15Ela Pʼetero yiye achimwamba, “Mwalimu, hungʼazire yiyo tʼadi.” 16Jeso achiamba, “Yaani hata mwimwi namwi kʼamudzangwe kumanya? 17Vino bee kʼamumanya kukala, chiriwacho chenda uhumboni, na chidzako nikunyewa? 18#Mat 12:34Ela maneno agombago mutʼu galaa moyoni, na ndigo gamutiyago najisi. 19Mana, maazo mai, kuulaga, uzinzi, udiya, wivi, kutsuna na kulavya ushaidi wa ulongo, gosi gago galaa moyoni mwa mutʼu, 20na ndigo gamutiyago mutʼu najisi. Ela kurya leu photsʼi koga mikono, bee kʼakumutiya mutʼu najisi.”
Musichana wa Chiyunani unaphozwa
(Mariko 7:24-30)
21Jeso ariphouka phapho, wakwenda pʼande za Tʼiro na Sidoni. 22Ndo kuko muchetʼu mumwenga muvyalwa wa Kanani, achimutuwa na achigomba kwa laka ra dzulu achiamba, “Nonera mbazi Bwana, mutʼu wa mudzungu wa Daudi! Mwanangu wa chiche una pʼepʼo hata kʼadzimanya kahiri.” 23Ela Jeso yiye kʼamuudzidzire utʼu. Ndo phapho anafunzie achimusengerera achimwamba, “Mwalimu, mwambe auke yiye muchetʼu. Hʼaya unahutuwa-tuwa tu, na kuhupigira kʼululu.” 24Jeso phapho achiudzidza achiamba, “Mino náhumwa kwa Aiziraeli hichiyao tu, ario áricha kutuwa malagizo ga Mulungu hata anga dza magonzi goyaya.” 25Jeso ariphoamba vivyo, yiye muchetʼu hata achendahendamitʼa mavindi mbereze, na achimwamba, “Bwana, nokolera mwanangu!” 26Jeso achimuudzidza vivi, “Tsʼi vidzo kuhwala leu ra anache, na kuritsuphira madiya.” 27Yiye muchetʼu naye achimuudzidza achimwamba, “Ni gago jeri Bwana, ela ao enye madiya achibitʼa pʼukupʼuku, gago madiya nago ni paka galambe.” 28Phapho Jeso achimwamba, “Mayo, kuluphiroro ni bomu, na nagahendeke vivi gago uhenzago.” Ndo yiye mwanawe wa chiche achirichirwa ukati uo kare.
Jeso unaaphoza atʼu anji
(Mariko 7:31-37)
29Jeso aripholaa phapho, watsegatsega ziya ra Galilaya achambuka hata mwangoni achisagala kuko. 30Maduu-maduu ga atʼu achiphirika akongo ao kuko. Anjine ákala ana virema, anjine achikala kʼaaona, anjine achikala ni viswere, mabubu, na anjine anji okala ni akongo, achendalazwa mbere za Jeso, naye achiaphoza. 31Phapho duu riro ra atʼu achangalala muno, phoona mabubu anagomba, okala ana virema adzuyatʼo, viswere anenenda, atʼu otsʼiona anaona, na osi achimulika Mulungu wa Aiziraeli.
Jeso unaapʼa leu atʼu odzichira helufu ne
(Mariko 8:1-10)
32Jeso ariphomala kwaphoza akongo osi, waaiha anafunzie, achenda kwakwe na achiaamba, “Ninaaonera mbazi aa atʼu, kwakukala, hudzikala hosini tsʼiku tʼahu, na vino kʼaana leu. Sambi tsʼenzi kwausa na nzala, kwakukala, anaidima akendairika njirani.” 33Anafunzie achimuuza vivi, “Bee naswi phano hata hu nyika, leu ra kwamvunya atʼu ano osi hundaripataphi?” 34Jeso naye achiauza vivyo achiaamba, “Kwani mwimwi muna mikahe mingaphi?” Ao achimuudzidza achimwamba, “Huriyo nayo sino, ni mikahe mifungahe na mabeshe machache.” 35Ndo Jeso phapho achiaamba ao atʼu asagale photsʼi. 36Achihwala yiyatʼu mikahe mifungahe na vivyo vibeshe, achilavya mumvera kwa Mulungu. Chisha, achanza kuyimega-mega na kuvivunza-vunza vivyo vibeshe, na achiapʼa anafunzie, na ao achiapʼa atʼu agavyane. 37Osi phapho achirya hata achimvuna. Na anafunzi a Jeso achitsola-tsola visiku vya mikahe na vya vivyo vibeshe vyokala visala, na achiudzaza vikaphu vifungahe. 38Alume hichiyao orya, ákala ni helufu ne photsʼiatara achetʼu na anache. 39Ndo Jeso achialaga atʼu, yiye achiphenya mashuwani achenda boma ra Magadani.
Currently Selected:
Matayo 15: CHIDUR
Tõsta esile
Share
Copy
Want to have your highlights saved across all your devices? Sign up or sign in